Jekjek ko An Gospel
Priesthood Eo: Juon Emjak Em̧ool
Jān Elder L. Tom Perry (1922–2015)
Jān Doulul eo an Jon̄oulruo Rijilōk ro
Elder L. Tom Perry ekar kōpooje bwebwenato in ilo Māe 28, 2015, ruo raan m̧okta jān an jako, n̄an kwaļo̧k ippān rikabwijer priesthood ro rem̧m̧an dettāer.
Kajoor eo eļaptata ilo mour eo aō ekar priesthood eo an Anij. Ij tōmak enaaj barāinwōt juon emjak epen n̄an kom̧ likao ro. Ak an wōr kajoor ilo mour eo am̧, kwoj aikuj meļeļe kake im kōjerbale.
En̄jake ko m̧okta ippān Priesthood ro
Ikar dik im rūttoļo̧k ilo juon jukjukin pād eo ejokne ilo Logan, Utah. Ikar jab inepata ke ikar dik kōn m̧ōn̄ā ak em̧ ak jeļāļo̧kjeņ. Ak bōlen kōnke mour ekar pidodo, ikar aikuj juon men eo n̄an jirōk likatōttōt ie bwe en maron̄ kapen eō.
N̄an n̄a emjak eo ekar priesthood eo an Anij. Ikar pād ilo juon jekjek eo eoktak ke ikar rūttoļo̧k. Jema kar kūri bwe en erom bisop eo ke ekar juon aō iiō, im ekar bisop eo aō ium̧win 19 iiō ko. An tōl āinwōt juon jemān im jetōb ekar juon jipan̄ elukkuun em̧m̧an n̄an kar n̄a.
Ij ļōmņak bwe ekar un eo in etke ikar lukkuun reim̧aanļo̧k n̄an bōk Aaronic Priesthood eo ke ekar 12th aō iiō. Ij keememej raan in ejenolo̧k ke ikar en̄jake pein jema ioon bōra ke ekar kapit eō. Ālikin wōt, ikar maron̄ kālōn̄ļo̧k jān opiij ko an Aaronic Priesthood eo im bōk kūr ko rekar em̧m̧an ippa.
Ajeje kwojkwoj eo ekar juon men elukkuun aorōk n̄an n̄a. Komaron̄ loe an armej ro kallim̧ūri er make n̄an pokake Irooj im kōjparok kien ko An ilo aer bōk m̧ōttan kōkkaļļe ko an Ānbwinnin im Bōtōktōkin.
Rūttoļo̧k ilo Meleļe kōn Priesthood eo
Ke iien rekar eļļāļo̧k, ikar kadiwōjļo̧k jān high jikuuļ, im ālkin juon iiō ilo kaļōj, ikar kūr n̄an juon mijen. Ikar m̧ōņōņō kajjojo minit im kar iakwe kampānien ro aō. Ekar wōr juon aō mijenede kampānien ekar juon jipan̄ ekajoor n̄an n̄a. Ikar ekkatak eļap jān e ke kōm̧ro ekar kakūrm̧ool eddo ko am̧ro.
Kōnke Amedka ekar pād ilo tariņae, ikar ro̧o̧l jān mijen eo aō im kobaļo̧k ilo United States Marine Corps. Ke tariņae eo ekar jem̧ļo̧k, ikar ro̧o̧lļo̧k n̄an kaļōj, m̧are, im jino juon baam̧le. Aō eļļāļo̧k jān elōn̄ oktak in jerbal ko ekar bōkļo̧k eō n̄an elōn̄ jikin ko ipeļaakin United States, ijo im ikar ekkatak eļap ie ke ikar jerbal ilo elōn̄ kūr ko an priesthood eo. Āliktata ikar tōparļo̧k Boston, Massashusetts, ijo ikar jerbal āinwōt juon stake būreejtōn. Ekar jān ijeņ ikar kūr im erom juon rijjipan̄ n̄an Jon̄oulruo eo innām, ālkin 17 allōn̄ ko, n̄an Doulul eo an Jon̄oulruo Rijjilōk ro.
Katak ko kar Ekkatak Kaki āinwōt juon Rijilōk
Ta eo ikar ekkatak āinwōt juon membōr in Doulul eo an Jon̄oulruo ro?
Ikar ekkatak bwe ewōr juon unin tōl, juon em̧jak, im juon kein kōjparok ilo priesthood eo.
Priesthood eo ekar aolep iien pād. Mokta jān an Adam kar itok n̄an laļ in, ekar wōr an priesthood. Ke ro ineen Adam rekar ejjeplōklōk kōn priesthood eo, ekar erom juon mennin aikuj n̄an ejaake wāween an priesthood eo jerbal. Irooj ekar kōm̧m̧ane menin ilo An kar kūr Ebream n̄an tōl baam̧le eo an āinwōt juon rikabwijer priesthood eo. Doulul in ekar wōnm̧aanļo̧k wōt ium̧win Aisek im Jekab, eo etan tokālik ekar oktak n̄an Israel.
Epepen ko tokālik, ajri in Israel ro rekar lo er make ilo kōm̧akoko. Irooj ekar jilkinļo̧k Moses bwe en kadiwōjļo̧k er, ak ke ekar kadiwōjļo̧k er, er make rekar kam̧ool bwe rekar jab pojak n̄an Melkizedek Priesthood eo. Kōn menin, rekar em̧m̧akūt kōn Aaronic Priesthood eo m̧ae tōre ko an Rilo̧mo̧o̧r eo.
Ikar loe bwe ekabwilōn̄lōn̄ ta eo Rilo̧mo̧o̧r eo ekar kōm̧m̧ane m̧okta ke Ekar jino jerbal in kwaļo̧k eo An. Ekar ejaake Melkizedek Priesthood eo. Ekar kūr jon̄oulruo Rijjilōk ro im katakin er kakien ko im kōllaajrak eo an priesthood eo. Ekar kūr Piter bwe en Rijilōk eo eutiej, ejaake juon ļain in laajrak in mālim eo ilo Kabun̄ eo An. Ilo raan ņe im rainin, ej Jisōs Kraist eo ekar kālet Rijilōk eo An eutiej n̄an tōl Kabun̄ in, im ej Rilo̧mo̧o̧r eo ej tōl e ilo eddo ko an priesthood eo an.
Bwe priesthood eo, eo ej kajju ilo ļain eo jān ad Irooj im Rilo̧mo̧o̧r eo nān Rijjilōk eo eutiej n̄an Rijjilōk ro jet im n̄an rikabwijer priesthood ro jet ilo Kabun̄ in. Kii ko an mālim in kar liļo̧k n̄an Rijjilōk ro, im toon wōt an kii kein pād ioon laļ in, jenaaj bok tōl jān Irooj Make. Tōl in ekwojarjar ej kōjparok kōj im lukkuun lale bwe Kabun̄ in en jāmin ettoļo̧k jān m̧ool ko. Enaaj pād wōt ilo an jejjet aolep iien kōnke ejjab tōl jān jabdewōt armej in laļ in. Ej tōl jān Irooj.
Ekkatak Katak ko an Priesthood eo
Kapilōk eo eļaptata ippa n̄an likao ro ej ekkatak katak ko an priesthood eo, meļeļe kajoor eo ippam̧ ilo kōjerbal priesthood eo am̧, im ekkatak ewi wāween am̧ kōjeraam̧m̧an mour eo am̧ im mour ko an ro jet.
Ij kallim̧ur bwe eļan̄n̄e kwonaaj ekkatak katak ko an priesthood eo im kakūrm̧ool eddo ko am̧ ilo priesthood eo, priesthood eo enaaj erom em̧jak em̧ool eo enaaj kōjparok jetōb eo am̧ im bōktok lan̄lōn̄ eo eļap n̄an eok. Kwon juon doulul in priesthood eo em̧ool. Pukōt ļo̧k ro m̧ōttam̧ im bōktok er n̄an doulul eo am̧. Ejaake juon jem̧doon in jem̧jāti ro ilo doulul eo am̧ eo enaaj erom juon pedped eo n̄an mour ko am̧.