Ainikien ko an Armej ro Rekwojarjar ilo Raan-ko Āliktata
Jab Bu!
Name withheld
Kōm̧ro Bob kar jijet ilo waan policeman eo, kōttar wōt juon kakōļļe jān iaļ eo. Kōm̧ro kar jino wate jikin in ruo awa ko m̧oktaļo̧k ālkin an kar retio eo an im̧ōn kalbuuj eo kakeememej kōm̧ro kōn juon wa.
“Elōn̄ ainikien bu ilo jikin ko̧o̧t en kiiō,” naan in kakeememej eo ekar ba. “Ruo em̧m̧aan, elōn̄ bu ippāero jim̧or. Rekar loe erro ilowaan juon kaar wōran. Rikam̧ool ro rej ba bwe em̧m̧aan rein relaj im remaron̄ bu.”
Juon m̧akūtkūt ej kwaļo̧k an riko̧o̧t ro kaamjak armej ro kōn bu ilo jikin ņe, mekarta kijejeto ko am rem̧m̧an, riko̧o̧t ro rekar rōļo̧k. Ļōmņak kein rekar itok n̄an kōļmenļo̧kjeņ eo aō tōre eo wōt ke ikar loe ruo armej rekar diwōjtok jān juon em̧ ilo juon jikin emarok ilo iaļ eo im kelōn̄ļo̧k ilowaan kaar wōran eo. Rekar kiiō jibadektok kōm̧.
“Ikar kajjitōk bwe bar juon policeman en itok im jipan̄ eō,” ikar ba. “Riko̧o̧t ro rej ettōr turōkļo̧k jān jikin eo ippām̧.”
Bar ruo policeman kar jilkintok n̄an jipan̄ kōm̧, ruo police detective rejjab iuniboom̧ im rekar jab kattōr e juon waan policeman, rekar jeertok im̧aan kaar eo ke Bob im n̄a kōm̧ro kar likwarkwar er. Ālikin an wa ko jilu kijoone bridge eo, wa eo waan policeman ro jet ekar bōjrak im jitbeļeeļ ioon bridge eo im̧aan kaar wōran eo im kar bōjrak iturin, doululi riko̧o̧t ro. Ejjab etto, kaar eo ekar bōjrak im jim̧or armej ro rekar badikdik jān kōm̧.
“Diwōjtok jān kaar ņe im likūt peium̧ ioon bōram̧!” Ikar bar kajjitōk ālkin aō kar diwōj jān kaar eo waaō. Ejjeļo̧k juon ekar uwaak.”
Ilo am m̧aanjabpopo n̄an am bu, ij bar kean̄ kom̧iro, “Diwōjtok jān kaar ņe im likūt peium̧ ioon bōram̧. Kōm̧m̧ane kiiō!”
Ejjab etto rikattōr eo ekar jutak lōn̄tak im oktaktok n̄an n̄a. Imaron̄ loe juon m̧ōttan aen erabōlbōl ilo pein.
Jān aō kar kamminene im jān bōklōkōt eo aō ejim̧we ke ekar kwaļo̧k bwe ij aikuj jibed bu eo n̄an lo̧mo̧o̧ren mour eo aō. Ak ilo tōre eo ij keen kab in bu eo n̄an aō jibete, ikar ron̄ juon ainikien. Ekar juon ainikien eo emera ak ekajoor im kajoor: “Jab bu!”
Ikar ļōmņak wōt in bu jabdewōt iien, ak kar kōttar wōt an juon armej ilowaan kaar eo kōppeļļo̧k kōjem̧ eo im jino butok. Ijjelo̧kin, rikattōr eo ekar kotak pein, lelōn̄ļo̧k ioon bōran men eo me ikar ļōmņak bu, innām likūt pein ioon būkien neen.
“Bōjrak!” Ikar ba ke ikar kaium̧ļo̧k n̄an kaar eo. “Jab m̧akūtkūt!”
Iien eo ekar āinwōt pija ko ilo TV—m̧ae iien ikar kile bwe armej ro ilo kaar eo me ikar ļōmņak rej jet rinana ro rōmōrō rekar ruo leddik jiddik ro rekor. Ta eo ikar ļōmņak ekar juon bu eo ekar wōt juon kan̄ōr.
Leddik ro, ejjab etto kōm̧ kar jeļā, ke rekar m̧urikiļo̧k kaar eo n̄an laddik ro jerāer. Rekar jab jeļā kain laddik rot ro.
“Ikar ļōmņak kwomej, Cal!” Bob ekar jiron̄ tok eō tokālik. “Mōttan wōt jidik in kar bu. Ikar jab jeļā etke ikar jab.”
Ruo policeman kaar eo waer ejjeļo̧k kōkkaļļe in police ie rekar ba ejja naan eo wōt, ejjeļo̧k juon ak n̄a ikar ron̄ juon ainikien. Ijeļā bwe kajoor eo wōt an lan̄ emaron̄ kar lo̧mo̧o̧ren leddik rein ruo jān aer mej im police opiija ro emān jān aer kōm̧m̧ane juon bōd eļap. En̄jake in ekar letok n̄an eō juon jeļāļo̧kjeņ epen bwe Jemedwōj Ilan̄ emaron̄ im enaaj pād ikōtaad n̄an jeraam̧m̧an eo ad.