KAMAOT LONG TRIK BLONGPonografi

I Kam long Elda Dalin H. Oks

Blong Kworom blong Olgeta Twelef Aposol

Pikja

Elder Dallin H. Oaks

Evriwan long yumi i mas lanem ol stret wei blong ansa long ol topik long vidio, niuspepa mo radio abaot ol rabis fasin blong seks.

Lukluk long Lod wetem fasin blong gat tingting i stap daon bae lidim wan man blong akseptem sam tru tok, we, taem bae hem i andastanem fulwan, bae i givim hem paoa mo bae i karem aot sem long hem.

Ten yia i pas, mi bin toktok long jenerol konfrens long topik blong ponografi. Mi ademap voes blong mi wetem blong ol narafala lida we oli bin givim woning agensem ol damaj blong ponografi long saed blong spirit. Woning blong mi se, plante long ol man mo ol boe ol bin stap spolem olgeta long wanem we mi singaotem “bigfala promosen blong ol fasin blong ol seksual rilesensip we i no stret”.¹ Eni kaen fasin blong ponografi hem sin—i mekem spirit i nomo strong, i mekem paoa blong saveyusum pishud paoa i nomo strong, mo i spolem ol gudfala rilesensip.

Naoia, 10 yia i pas, mi mi glad bigwan se plante oli harem mo folem gud ol woning blong profet, ol bin stopem mo stap klin mo nomo kam toti long ol toti blong ponografi. Mi glad bigwan tu se plante oli bin folem gud ol invitesen blong ol profet blong tanem bak long ponografi, fiksimap ol hat mo ol rilesensip we oli bin brok, mo muv i go fored folem fod blong stap olsem wan disaepol. Be mi wari plante naoia bitim bifo long olgeta narawan we oli stap wetem yumi, oli stap go hed blong foldaon long trik blong ponografi, speseli nao ol yangfala man blong yumi mo tu namba blong ol yang woman we i stap go antap.

Wan impoten risen from wanem, problem blong ponografi i stap gro long wol blong tedei i from, ol toktok mo ol pikja blong fasin blong seks oli stap long evri ples: oli stap long ol muvi, ol televisen program, ol program blong intanet, ol teks mesej, ol program blong internet long fon, ol advataesmen, ol buk, ol miusik, mo ol storian blong evri dei. From hemia, yumi evriwan i no save stopem yumiwan long ol mesej blong seks we i stap raon long yumi evri dei.

I. Ol level blong Ponografi we yumi stap long Hem

Blong helpem yumi wok wetem sin ia we i stap gro, mi wantem talemaot sam long ol defren level we yumi stap long hem wetem ponografi, mo givim samfala wei we yumi sud yusum blong ansa long wanwan long olgeta.

Long ol taem mo situesen blong bifo, ol kaonsel blong mifala long ponografi i lukluk plante nao long prinsipol blong helpem wanwan man blong stopem fas ekperens o blong kam gud bageken long fasin we i had blong lego. Nomata ol had wok ia i impoten, pas eksperiens mo ol situesen naoia i bin soem nid blong kaonsel we bae tokbaot ol level blong ponografi bitwin bigfala namba blong olgeta we oli no go kolosap nating mo olgeta we oli had blong lego fasin ia. Hem i help bigwan blong lukluk long ol fo defren level blong ponografi we yumi stap wetem: (1) mestek blong gat kontak wetem, (2) yusum wanwan taem nomo (3) yusum plante taem, mo (4) mas yusum evritaem (adiksen)

Mistek blong gat kontak wetem. Mi biliv se evriwan i bin mistek blong gat kontak wetem ponogafi. I nogat sin long hemia taem yumi tanem bak mo no gohed blong lukaotem. Hem i wan mistek, we i nidim blong stretem bitim blong sakem sin.²
Yusum wanwan taem. Yusum ponografi wanwan taem o plante taem, be i no mistek mo yu minim blong yusum, hemia nao hem i sin.

Ponografi i krietem mo i mekem ol filing blong seks i kam bigwan. Krieta i bin givim yumi ol filing ia blong ol waes stamba tingting blong Hem, be Hem i givim ol komanmen tu we i talemaot se ol filing ia oli blong ol man mo ol woman we oli mared nomo. Ponografi i damejem stret fasin blong seks mo leftemap fasin blong seks aotsaed long eria blong mared. Olgeta we i yusum ponografi oli gat wetem olgeta ol smol fos i gat paoa blong krietem o spolem laef. !No go long ples ia!

Ol denja blong yusum ponografi from eni risen, nomata hemi wanwan taem or i no plante taem, bae oltaem taem oli yusum bae i invaetem olgeta blong yusum moa, we bae kam had blong stopem from oltaem bae tingting blong olgeta bae i stap longol filing blong seks mo ol fasin blong seks. Ol saentis oli bin finem aot se ol pikja blong seks oli fomem ol kemikol insaed long bren we i kivim paoa long ol filing blong seks, mo hemia nao i pulum tingting i go moa long ol fasin blong seks.³ Ol rong fasin blong seks, i krietem filing blong sem, we, long taem we bae kam, bae i save draon i stap long wan man.
. Yusum plante taem. Blong gohed wantem blong yusum ponongrafi i save kam wan fasin blong wantem mekem oltaem, “bae i kam fasin we man i wantem mekem oltaem kasem taem we bae i kam wan samting blong mas mekem.”⁴ Taem man i yusum oltaem, bae hem i nosave harem gud sapos hem i no yusum.
Mas Yusum Oltaem (Adiksen). Fasin blong man we i soem se hem i gat adiksen long ponografi, i taem man ia i stap statem wan fasin blong stap ‘dipen’ long hem (wan medikol toktok we oli yusum long ol meresin, alkol, mo fasin blong ple from mani, mo plante moa. we taem i kasem wan level, hem bae nomo wantem stopem” mo i kam wan impoten samting kolosap bae bitim evri nara samting long laef blong hem.”⁵

II. Stamba Tingting blong Save Gud olgeta Level ia

Long taem we yumi luksave ol level ia, bae yumi luksave se, i no evriwan we i wantem blong yusum ponografi i dipen long hem. I tru se, plante long ol yang man mo ol yang woman oli gat probelm wetem ponografi be olgeta oli no stap dipen long hem. Hem i impoten blong luksave wanem we i defren ia—i no blong ol papa mo mama nomo, ol hasban mo waef, mo ol lida we oli gat strong tingting ia blong help, be tu long olgeta we i traehad wetem problem ia. Hemia from wanem i olsem.

Faswan, taem level blong wan man we i yusum ponografi i go dip tumas—stat long taem we hem i no minim blong luk, kasem taem we hemi minim blong yusum wanwan taem o ripitim oltaem, kasem we hem i yusum oltaem kasem taem we hem i stap dipen long hem mo nosave lego—bae i moa had blong hem i kam aot long hem Sapos yu lukluk rong se man ia i stap dipen mo i no mo save lego fasin ia, man ia bae ting se hem i lusum fridom blong jus mo lusum paoa blong winim problem ia. Hemia i save mekem tingting blong kam gud bakegen, mo sakem sin i nomo strong. Long narasaed, blong gat wan gudfala save long level blong wan problem ia—se hem i no nogud tumas olsem we yumi stap fraet long hem—be i givim hop mo wan strong tingitng blong yusum fridom blong jus blong stopem fasin ia, mo sakem sin.

Namba tu, olsem eni nara fasin blong sin, tingting blong yusum ponografi i ronem aot Tabu Spirit. Samfala we i bin go tru long hemia bae i gat strong filing blong sakem sin. Ol narawan, bae oli filim se oli sem mo wantem blong haedem ol nogud blong olgeta tru long fasin blong kiaman. Olgeta bae save stat blong filim sem, we i save lidim olgeta blong no laekem olgetawan. Sapos samting ia i hapen, bae olgeta i stat blong biliv long ol bigfala kiaman blong Setan: se wanem we oli bin mekem o stap go hed long hem, bae i mekem olgeta i kam ol man nogud, ol man we oli no klin inaf from bigala lav blong Sevya mo no save sakem sin. Samting ia i no tru. Yumi neva stap longwe tumas blong kasem Sevya mo Atonmen blong Hem.

Las wan, hem i impoten blong no mas talem se fasin blong stap yuum ponografi oltaem hem i wan adiksen from se hemia i no diskraebem stret level we hem i stap long hem o evri samting we hem i nid blong mekem blong save sakem sin ia mo kam bak gud bakegen. Blong gat wan gudfala save long wea ples wan man i stap long hem long ol level blong ponografi bae i helpem yumi save wanem aksen nao i stret blong tekem blong kam gud bakegen.

III. Kamaot long Ponografi

Naoia yumi lukluk long hao nao wanwan man i save kamaot mo kam gud bageken long trik blong ponografi. Hemia bae i help bigwan, bae i no helpem nomo olgeta we i gat problem ia blong stop blong yusum ponografi, be tu ol papa mo mam, mo ol lida we oli stap helpem olgeta. Wanwan man bae i gat moa sakses tugeta long saed blong no yusum mo kam gud bakegen long ponografi, taem oli diskasem olgeta topik ia wetem papa mo mama, mo ol lida.⁶

Nomata long wanem level blong stap wantem blong yusum ponografi, rod blong kam gud bageken, kam klin, mo sakem sin i go wetem, mo nidim ol semfala stamba tingting: gat wan tingting we i stap daon, stap olsem wan disaepol, mekem komitmen blong yuwan blong jenis, fasin blong stap akaontebol mo sapot, mo stap strong kasem en wetem fet.

Pikja

Pikja i kam long Majivec Ka/Istock/Thinkstock

A. Fasin blong gat Tingting i Stap Daon

Blong wantem tumas blong winim ponografi mo ol fasin we i kam wetem, wanwan man i mas gat fasin blong gat tingting i stap daon.(Luk long Ita 12:27). Lukluk long Lod wetem fasin blong gat tingting i stap daon bae lidim wan man blong akseptem sam tru tok, we, taem bae hem i andastanem fulwan, bae i givim hem paoa mo bae i karem aot sem long hem. Sam long ol tru tok ia hem i:

Wanwan long yumi i wan pikinini blong Papa blong yumi we I stap long heven.
Sevya blong yumi, Jisas Kraes, Hem i lavem yumi mo save gud wanwan long yumi.
Atonmen blong Sevya blong yumi hem i blong evri pikinini blong God.
Tru long bigfala lav blong Jisas Kraes, God hem i save forgivim sin blong yumi evriwan mo yumi kasem paoa blong jenis.
Wanwan long yumi i gat wan presen we i gud tumas we i presen blong ejensi, we i mekem yumi save yusum paoa mo ful paoa blong Atonmen.
Wanwan long yumi we i gat problem wetem ponografi i save yusum hop blong olgeta narawan we oli bin winim problem ia.
Ponografi hem i wan sin, be blong tekpat long hem i no minim se man i nogud.
Wan man i save kamaot long trik blong ponografi mo kam gud bageken fulwan, be hemia bae i hapen nomo taem man i yusum paoa blong Atonmen.
Wan tru fasin blong sakem sin i nidim moa wok bitim blong stop blong yusum nomo. Wan kaen fasin blong sakem sin olsem i nidim wan hat we i jenis tru long Atonmen blong Kraes.

Taem man i stap akseptem ol tru tok ia bae i mekem hem i rere long saed blong spirit blong wok folem, we bae i openem ol doa blong kasem help long Lod blong mekem ol jenis we hem i nidim blong sakem sin mo kam gud.

B. Fasin blong stap Olsem wan Disaepol

Blong folem ol tru tok ia, wanwan man i nid blong komitim hem bageken blong stapolsem wan disaepol blong Lod Jisas Kraes mo blong mekem ol samting we i klinim mo i mekem olgeta i kam strong blong save stanap strong taem ol temtesen blong fiuja i kam. Hemia i minim se oli mas gat komitmen long ol aktiviti long saed blong spirit: mekem prea we i gat mining mo ridim skripja evridei, go long ol jos miting, mekem seves, mekem fasin blong livim kakae, mo (taem bisop i agri long hem) tekem sakramen mo go wosip long tempol.

C. Mekem Komitmen blong wok Folem wan Plan blong Yuwan

Ol disaepol blong Jisas Kraes we oli gat tingting i stap daon, bae oli save kasem wan klia tingiting we bae i mekem olgeta i luk save ol dip filing, ol situesen raon long komuniti, mo ol samting blong wol ia we i save statem temtesen blong yusum ponografi. Sapos oli save luksave ol samting ia, bambae olgeta i save planem hao blong kamaot long ol fasin nogud ia:

Luksave ol samting we i stap statem, mo mekem se oli wantem mekem fasin ia taem oli tekem ples.
Putum ol klia aksen blong helpem olgeta i kamaot long temtesen.
Tekem bak ol tingting mo eneji blong oli lukluk long Lod.
Setemap ol klia aksen blong evridei blong olgeta i mekem komitmen blong olgeta i kam strong blong oli stap long wan laef we i stret mo gud.

Taem yu mekem wan pesenol plan, wanwan man i sud yusum ol gudgudfala risos we Jos i stap givim. Eksampol, Jos websaet overcomingpornography.orgi gat topik blong wanwan man mo tu topik blong ol famle memba mo ol prishud lida we oli stap givim sapotem olgeta. Moa long hemia, Jos Adiksen Kam Gud Bageken Program i stap blong evri memba we oli gat problem wetem eni fasin blong adiksen, mo bae helpem ol memba blong famle blong olgeta tu.

D. Fasin blong stap Akaontebol mo Sapot

Ol man blong folem Jisas Kraes we oli putum tingting blong olgeta i stap daon mo oli talemaot se olgeta i nidim Sevya bae oli lukaotem help long ol bisop blong olgeta, we Lod i bin singaotem olsem ol prishid lida blong olgeta we oli holem ol kei blong save helpem olgeta blong sakem sin. Wetem raet blong wanwan man we i stap long problem, mo sapos bisop i kasem insperesen blong mekem, bisop i save askem wan naraman blong wok wetem mo helpem olgeta. Nomata long situesen, kaonsel ia blong Presiden Godon B. Hinkli (1910–2008) i save givhan:

“Askem Lod dip daon long sol blong yu se bae Hem i tekem aot yu long adiksen we i stap kontrolem yu. Mo bae yu gat karej blong lukaotem daereksen long bisop blong yu mo, sapos i nid, kaonsel blong ol profesenol man we oli save givhan.⁷

I dipen long level blong problem, wanwan man i nidim sapot blong wan man we hem i gat tras long hem o man we i gat ekperiens o wan profesonol kaonsela, we olgeta i save go luk long eni aoa blong kasem paoa long ol taem we oli no strong mo man ia i save mekem olgeta i filim se oli akaontebol long ol plan blong olgeta.

E. Stanap Strong Kasem En wetem Fet

Ol man we ol sakem sin mo oli bin kasem blesing blong save winim strong filing blong yusum ponografi, oli mas stap rere oltaem, from enemi bae stil lukaotem wan ples we i no strong blong winim man ia long hem. Samtaem bae hem i kam olsem wan aksiden nomo, nomata long ol had wok blong no traem blong luk. Long laef blong olgeta, olgeta wanwan i mas lanem blong kontrolem ol filing blong seks we God i bin givim mo holem taet ol had wok blong olgeta blong stap klin.

IV. Lav mo Sore Bong Evriwan

Naoia wan toktok long saed blong olsem wanem yumi tritim olgeta we oli bin foldaon long trik blong ponografi. Evriwan long yumi i Nidim Atonmen blong Jisas Kraes. Olgeta we i gat problem wetem ponografi oli nidim lav mo sore blong yumi taem oli stap folem ol prinsipol we i nid blong oli folem, mo ol step blong oli kam gud bageken. Plis yufala i no tok agensem olgeta. Olgeta oli no ol devel mo oli stil gat hop. Olgeta i ol pikinini boe mo pikinini gel blong Papa blong yumi long Heven. Tru long stret fasin blong sakm sin, olgeta i save kam klin, klin everiwan, mo gat raet long evri kavenan mo tempol blesing we God i bin promesem.

Taem yu kasem taem blong mared, mi enkarejem ol yang woman mo ol yang man blong jusum gud we bae i stap olsem kompanion blong yu kasem taem we i nosave finis mo oli klin long fes blong Lod mo oli klin blong go insaed long tempol. Man we i sakem sin fulwan long ponografi i klin inaf blong kasem ol blesing ia.

V. En

Truaot long laef blong yumi, evriwan long yumi bae fesem ol buk mo vidio wetem ol topik blong seks. Wetem daereksen blong Sevya blong yumi we i lavem yumi, mo strong tingting ia we yumi kasem long ol kavenan blong sakremen blong yumi oltaem gat Spirit blong Hem wetem yumi (Luk long D&C 20:77), yumi save ansa long stret fasin. Mi testifae se hemia nao wanem we yumi shud mekem blong stap glad long ol blessing blong Hem, Hem we yumi stap givim wosip long Hem. Taem yumi mekem, bae yumi kasem fulwan pis blong Sevya mo yumi go hed blong stap long rod we i go long ples blong yumi blong oltaem mo save kam olsem wan god.