Kasem TaemYumi Mit Bakegen
Rod I Go long Sefti
I Kam long Presiden Henri B. Aering
Fas Kaonsela long Fas Presidensi
Long “Finding Safety in Counsel,” Liahona, July 1997, 23–25.
Wan long ol wei we yumi save se wan woning i kam long Lod hem i we lo blong ol witnes, i givim raet long ol witnes, i stap tedei.
I luk olsem bae i nogat en long wanem Sevya i wantem blong lidim yumi go bak sef. Mo i nogat jenis long wei we Hem i soem rod long yumi. Hem i singaot long plante defren wei blong i save kasem olgeta we oli wiling blong akseptem. Mo ol wei ia, wan long olgeta hem i oltaem blong sendem mesej tru long ol maot blong ol profet blong Hem, nomata ol pipol oli kwalifae blong gat ol profet blong God long medel blong olgeta. Ol wokman we oli kasem raet, oltaem oli kasem wok ia blong wonem ol pipol, talem long olgeta rod i go long sefti.
Taem i bin gat smol rao long Not Misuri, YSA, long fol blong 1838, Profet Josef Smit i bin singaotem evri Sent blong kam tugeta long Fa Wes blong kasem proteksen. Plante oli bin stap long ol fam olgeta nomo o long sam ples we i stap longwe. Hem i givim wan spesel kaonsel long Jekob Haun, man ia we i statem wan ples blong graonem sid blong ol man oli kam stap long hem we oli singaotem Mil blong Haun. Wan rekod long taem ia i gat hemia: “Brata Josef i bin sendem toktok tru Haun, we i onem haos blong graonem ol sid, blong talemaot long ol brata we oli bin stap longwe blong kamaot mo kam long long Fa Wes, be Mista Haun i no bin pasem mesej” (Philo Dibble, in “Early Scenes in Church History,” in Four Faith Promoting Classics [1968], 90). Samtaem afta, Profet Josef i bin rekodem long stori blong hem: “Kam kasem dei ia, God i bin givim mi waes tingting blong sevem ol pipol we oli folem kaonsel. I neva bin gat wan i ded we [i bin folem] kaonsel blong mi” (History of the Church, 5:137). Afta Profet i rekodem sam tru stori we i soem se plante laef we oli no mekem i nogud mo bin stap laef long ples blong graonem sid blong Haun, taem oli bin kasem kaonsel oli sud folem.
Long taem blong yumi, yumi bin kasem woning wetem kaonsel long ples blong go sef long hem aot long sin mo harem nogud. Wan long ol ki blong luksave ol woning ia hem i from oli ripitim. Eksampol, moa bitim wan taem long ol jeneral konfrens, you bin harem profet blong yumi i talem se bae hem i kwotem wan profet we hem i tekem ples blong hem, mo afta bae i kam olsem seken witnes mo samtaem nambatri. … Aposol Pol i bin raetem se “Taem we man i gat tok agens long narafala man, hem i mas gat tu witnes no tri witnes blong mekem tok ya i stanap.” (Seken Korin 13:1). Wan long ol wei we yumi save save se woning i kam long Lod hem i we lo blong ol witnes, i givim raet long ol witnes, i stap tedei. Taem yumi harem ol profet i ripitim ol toktok blong olgeta bakegen, hemia i kam wan samting we yumi mas tingting strong long hem mo fulumap ol hat blong yumi wetem tangkyu se yumi laef long wan taem blong blesing. …
Papa long Heven i lavem yumi. Hem i bin givim Wan Pikinini Ia nomo blong Hem blong i kam Sevya blong yumi. Hem i bin save se laef long wol ia, bae yumi stap long bigfala denja, hemia we i moa bitim, hem i ol temtesen we i kam long Setan. Hemia wan long ol risen from wanem Sevya i provaedem ol prishud ki blong mekem se olgeta we oli gat sora, oli harem mo fet blong obei blong oli save go long ol ples blong stap sef.