Mi No Save From Wanem Mi Stap Long Taem Ia
Amba Jeni, Alabama, YSA
Pikja i kam long Katlin Pitason
Mama blong mi mo mi i jes finisim prea blong mitufala long naet. Mitufala i haggem mitufala mo talem long mitufala se, “Mi lavem yu.” Afta mi wokbaot i go long rum blong mi. Taem mi pusum han blong tajem handel blong doa, wan strong filing i kam long maen blong mi se long nekis dei bae mama blong mi i ded.
Bren mo hat blong mi i traem blong faet agensem tingting ia. I nogat wan wei nating blong wan samting bae i hapen long mama blong mi. Evri samting bae oraet wetem hem.
Taem mi go insaed long rum blong mi, mi go daon long ni blong mi mo prea mo talem long Papa long Heven se filing abaot mama blong mi i no save kam tru. Mi askem hem blong plis tekem aot tingting ia, be tingting ia i no go. Mi go bak long rum blong papa mo mama blong mi mo talem long mama blong mi se mi wantem hem i haggem mo kisim mi wan moa taem bageken bifo mi go silip. Mitufala i talem bageken se, “Mi lavem yu,” mo mi gobak long rum blong mi. I bin tekem mi samtaem bifo mi slip long naet ia.
Taem mi wekap long nekis moning, mi gat filing blong wari. Mi glad tumas taem mi lukmama blong mi i hapi mo stap gud. Be bihaen long maen blong mi, filing i stap kam yet se wan samting i no stret. Long fas mo testemoni miting long dei ia, Mama blong mi i go antap mo talem wan naesfala testemoni.
Afta long sakremen miting, hem i bin go blong tijim Praemeri klas blong hem, mo mi bin go long Sandei Skul. Mi gat wan narafala filing, naoia blong stanap mo lego Sandei Skul. Mi no wantem blong mekem ol man i luk mi, be wan samting i pulum mi aot long ples we mi sidaon long hem mo kamaot long doa. Blong sam minit nomo, mi go insaed long Praemeri Klas blong mama blong mi, mo stap sidaon mo lisen long hem i tij. Mi no save from wanem mi bin stap ia, be mi save se ples ia nao i gat nid blong mi stap long hem.
Let long aftanun long haos blong brata blong mi, mama blong mi i lukluk stret long ol ae blong mi blong lasfala taem afta hem i foldaon mo ded from blad i bin blokem rod blong pulum win. From ol risen blong Hem mo from sore blong Hem, Papa long Heven i bin sendem Tabu Spirit blong rere long mi. Ol filing long ol taem ia oli givim mi wan ekstra taem we mi save stap glad wetem mama blong mi, be sapos mi no bin wantem lisen long kwaet, smol vois ia, bae mi no save mekm olsem..
Lav blong Papa long Heven long mi i neva bin klia long mi kasem taem we mama blong mi i lus. Yumi bles tumas blong gat wan Papa long Heven we i lavem yumi tumas we i givim long yumi spesel presen ia blong Tabu Spirit.