Fas Presidensi Mesej
Finisim Resis Wetem Toj blong Yu I Stap Laet Yet
I Kam long Presiden Dita F. Ukdof
Seken Kaonsela long Fas Presidensi
Foto i kam long Comstock/Stockbyte/Thinkstock
Long taem bifo long Gris, ol man blong resis oli stap ron long wan rilei we oli singaotem lampadedromia.1 Long rilei ia, ol man oli holem wan toj long han blong olgeta mo pasem long narawan kasem taem we las man i krosem laen blong finis.
Oli no givimaot praes long tim we i ron spid bitim ol narawan—be, oli givim long fas tim we i krosem laen wetem toj we i stap laet yet.
I gat wan impoten lesen long ples ia, wan we ol profet blong bifo mo naoia oli stap tijim: hem i impoten blong statem resis ia, be hem i moa impoten blong yumi resis wetem toj we i stap laet yet.
Solomon i bin Strong long Stat
King Solomon i wan eksampol blong wan man we i bin stat strong. Taem hem i yangfala, hemi “lavem Lod, … (1 Kings 3:3). God i glad tumas long hem mo talem, “Yu askem wanem yu wantem blong Mi givim long yu” (1 Kings 3:5).
Hem i no bin askem ol rij samting o wan longfala laef, be Solomon i askem “wan hat we i save andastanem hao blong jajem ol man, blong mi save luksave gud mo nogud” (1 Kings 3:9).
Hemia i mekem se Lod i glad tumas mo Hemi blesem Solomon, i no wetem waes nomo, be tu wetem plante rij samting we yu no save kaontem mo wan longfala laef.
I tru se Solomon i waes tumas mo hemi bin mekem plante gud samting, be hem i no strong kasem en. Sori tumas we taem ol yia i pas, “Solomon i bin mekem ol nogud samting long fes blong Lod, mo i no folem fulwan ol komanmen blong Lod” (1 Kings 11:6)
Finisim ol Resis blong Yumiwan
?Hamas taem yu bin statem wan samting be yu no bin finisim? ?Ol plan blong katem kaekae? ?Ol prokram blong eksesaes? ?Ol tingting blong mas ridim skripja evridei? ?Ol joes blong kam ol gudfala disaepol blong Jisas Kraes?
?Hamas taem yumi bin putum ol gol long Jenware mo folem wetem strong tingting blong sam dei, sam wik, o sam manis be taem Oktoba i kam yumi faenemaot se smok blong komitmen ia i no mo gat, be kolkol asis nomo i stap?
Wan dei, mi bin luk wan fani pikja blong wan dog i stap lei daon kolosap long wan pis pepa we hem i bin brekbrekem. Pepa ia i rid olsem, “Setifiket blong Dog- Fasin blong stap Obei Trening”
Yumi tu yumi olsem samtaem.
Yumi gat ol gudfala tingting; yumi stat strong; yumi wantem stap wan gud man. Be long en, yumi lego ol gol ia i borkbrok, sakemaot, mo fogetem.
Hemi fasin blong ol man blong foldaon, feil, mo samtaem yumi wantem blong kamaot long resis ia. Be olsem ol disaepol blong Jisas Kraes, yumi komitim yumi i no blong statem resis ia nomo be tu blong finisim—mo finisim wetem ol toj we oli stap saen braet. Sevya i promesem ol disaepol blong Hem, “Hem we i stanap kasem en, bambae hem i stap sev” (Matiu 24:13).
Bambae mi tanem promes blong Sevya i kam long dei blong yumi: Sapos yumi kipim ol komanmen blong Hem mo stap kasem en wetem ol toj we oli stap laet yet, bambae yumi kasem laef we i no save finis, we hem i bigwan bitim evri nara presen blong God (luk long D&K 14:7; luk tu long 2 Nifae 31:20).
Laet we i neva save Ded
Samtaem, afta we yumi faoldaon, lus, o givap, tingting blong yumi i foldaon mo yumi biliv se laet blong yumi i ded mo yumi lusum resis blong yumi. Be mi testifae se Laet blong Kraes i no save ded. Hem i saen long ol naet we i tudak tumas mo bae i save mekem ol hat blong yumi i laet bageken sapos yumi givim ol hat blong yumi long Hem (luk long 1 Kings 8:58).
I nomata hamas taem o yumi foldaon bigwan olsem wanem, Laet blong Kraes bae i gohed blong saen braet. Mo iven long ol bigfala tudak, sapos yumi tekem wan step i go long Hem, bae laet blong Hem i karemaot ol tudak ia mo bae i laetem ol sol blong yumi bageken.
Resis blong stap olsem wan disaepol i no wan sot resis, hem i wan longfala resis. Mo i nomata se yumi go spid olsem wanem. Wan wei nomo we yumi save lusum resis ia hem i sapos yumi givap.
Sapos yumi stap gohed blong girap mo muv i go from Sevya, yumi save winim resis ia wetem ol toj we oli stap saen strong.
From se toj ia i no blong yumi o wanem yumi save mekem.
Hem i blong Sevya blong wol.
Mo hemia i wan laet we bae i neva save ded. Hem i wan laet we i stap solem daon tudak, i hilim ol so, i save laet strong iven long medel blong ol bigfaka harem nogud mo ol bigfala tudak.
Hem i wan laet we i saen bitim save blong man.
Bambae wanwan long yumi i save finisim rod we yumi statem. Mo wetem help blong Sevya mo Ridima, Jisas Kraes, bambae yumi kasem en wetem bigfala glad mo wetem ol toj we oli stap laet yet.