Kasem Help
Man we i raet i stap long Yuta, YSA.
I bin afta medel naet, be Teit i bin save se i taem blong toktok.
“Papa long Heven, naoia mi prea, lidim mo protektem mi evri dei” (Children’s Songbook, 19).
Teit i leidaon wetem ae i open nomo long tudak ia, mo stap krae. Hem i bin prea blong kasem help, be i luk olsem wan hevi dak klaod i hang ova long hem, mo blokem Spirit.
“?Wanem i hapen sapos mi neva fogetem rabis Tivi so ia?” hem i wari.
Sam dei i pas, hem i bin finisim homwok blong hem eli mo stap go tru Tivi. Be hem i no ekspektem blong luk wan samting olsem ia long skrin. Teit i sek wantaem mekem se hem i fogetem blong ofem televisen kwik olsem we hem i sapos blong mekem.
I bin wan aksiden. Hem i no bin minim blong luk wan samting olsem long skrin, be naoia hem i no save fogetem. Samtaem i kam long maen blong hem long medel blong skul, long taem blong kakae-iven long taem blong jos. Long ol taem olsem, hem i glad se Mama mo Papa i no save ridim tingting blong hem. Papa mo mama blong Teit i bin tijim hem i no blong lukluk ol pikja blong ol pipol we oli nogat klos. Hem i bin save tu se tufala i ekspektem hem blong no lukluk ol Tivi so blong faet, ol muvi, mo ol vidio gem.
“Naoia mi save from wanem,” Teit i talem slo long hemwan.
Teit i girap long bed mo i nildaon bakegen. ?Wanem nao hem i save mekem?
“Papa long Heven,” Teit i talem slo. “Pilis helpem mi blong stop blong tingbaot wanem we mi bin luk.” Hem i wapem wota blong ae blong hem mo lisin. Hat blong hem i pam moa kwik. Hem i ting se hem i bin filim Tabu Spirit i toktok long hem, be i no bin ansa we hem i wantem.
Hem i nidim blong talem long papa mo mama blong hem.
“?From wanem?” Teit i tingting. Bae hem i filim olsem wan bebi we i stap ron i go long rum blong papa mo mama blong hem long medel blong naet ia. Mo blong talemaot long olgeta? Hem i filim sem mo sik bakegen.
Afta wan klia tingting i kam long maen blong hem: Papa long Heven i wantem hem blong stap hapi. Papa long Heven i wantem hem blong filim Spirit bakegen, blong tingbaot ol gud samting, mo blong stap ones wetem famle blong hem. Speseli nao hem i wantem Teit blong kam wan man we i klin inaf blong save gat Aronik Prishud taem hem i kasem 12 yia long sam manis we i stap kam. Teit i bin luksave se sapos hem i gohed blong tingbaot wanem we hem i bin luk mo kipim olsem wan sikret, bae oltaem hem i no save hapi from.
Teit i bin save se hem i nidim help-mo Tabu Spirit i jes talem long hem wea ples nao blong faenem.
Teit i bin luk long klok wetem ol namba long hem hemia long saed blong bed blong hem. Hem i kolosap 1 klok long moning. Hem i stanap mo i ron tru tudak long holwe i go long rum blong papa mo mama. Hem i solemdaot spet from hem ifraet, afta hem i nok long doa.
“?Mama?” ?Papa?
“Teit, yu ia?” Mama i ansa wetem vois blong slip.
“?Wan samting i rong?” Papa i askem.
“Yes,” Teit i talem. “Yumi save storian? ?Mo mi save kasem wan blesing?”
Papa i onem laet long saed blong bed blong hem mo i invaetem Teit i go insaed. Fastaem bakegen long ol dei, Teit i bin filim wom, hop mo laet.