Tijim ol YutOlsem Wanem blong Folem Wei blong Sevya
I kam long Karol F. Makonki
Fas Kaonsela long Yang Woman Jeneral Presidensi
Ol yut oli no ol fiuja lida nomo. Olgeta oli ol lida tedei. Yumi save helpem olgeta blong lid olsem Sevya
Long ol papa mo mama mo ol lida blong yut, Elda Deved A. Bedna blong Kworom blong Olgeta Twelef Aposol i bin tokbaot balens ia we yumi nid blong faenem: “Invaetem ol yang pipol blong mekem wok. Yu mas stap, be yu no mas blokem rod. Yu mas givim advaes be yu no mas tekova.”1
Ol papa mo mama mo ol lida oli save helpem ol yang man mo yang woman blong lanem ol prinsipol we bae i save helpem olgeta blong rere blong save lid long stret mo gud fasin blong bildimap kingdom blong God long wol ia.
Taem mi gat 14 yia, mi bin mitim sam yang woman we oli ol gudgudfala lida. Long taem ia, famle blong mi i bin muv krosem Yunaeted Stet mo kam ol memba long wan niufala wod. Mi no tingbaot se hu i bin stap olsem Maea Med klas presidensi, be mi tingbaot klia nomo se ol yang woman oli bin kaen tumas long mi. Olgeta i kaen tumas blong haggem wan fraet mo bunbun niufala gel olsem wan fren we i bin lus longtaem, mo oli mekem mi mi fil welkam. From se mi mi kam long Delawe, wan ples we miwan nomo mi Momon gel long hae skul blong mi mo wan nara Momon gel we mi save long hem i silip longwe tumas long haos blong mi, mi bin ting se, “!Ples ia i mas olsem heven!”
Blong fas taem long laef blong mi, mi gat wan grup blong ol fren we oli stap folem semak standet insaed long Blong Ol Yut Oli Kam Strong, oli bin invaetem mi blong tekpat long ol aktiviti, mo oli serem ol testemoni blong olgeta abaot gospel wetem mi. Ol eksampol blong olgeta blong lav mo kaen fasin i mekem plante samting blong kipim mi mi stap kolosap long Jos blong Jisas Kraes blong Ol Lata-Dei Sent bitim we eni nara toktok o lesen i save mekem. Long lav mo laet blong olgeta we i semak olsem blong Kraes, olgeta nao oli mesej blong gospel blong Kraes, mo olgeta nao oli lidim mo gaedem mi kambak long saed blong Hem.
?Wanem nao i mekem ol niufala fren blong mi ia ol gudfala lida?
Wan yang misinari i talem mining blong lidasip long wan klia fasin. Hem i talem: “Yumi mas stap long raet ples long raet taem, stap mekem wanem we Lod i wantem yumi blong mekem mo helpem man ia we i nidim help blong yumi. Hemia nao i mekem se yumi ol gudfala lida.”2 From gudfala fasin blong olgeta mo Laet blong Kraes we i saen insaed long olgeta, ol fetful yang man mo yang woman oli gat paoa blong lid folem wei blong Sevya mo “helpem ol narawan i kam ol tru man blong folem … Jisas Kraes.”3
Olsem ol lida, yumi stap lidim, gaedem mo wokbaot long saed blong ol yang man mo woman blong yumi. Be hem i ol klas mo ol presidensi blong kworom we oli responsibol blong lidim mo daerektem wok blong ol klas mo ol kworom, wetem blong jusum ol lesen blong Sandei mo planem ol aktiviti blong wik. Ol klas mo kworom lida oli kolem olgeta mo set apat olgeta folem otoriti blong olgeta we oli holem prishud ki, i minim se olgeta oli gat paoa blong lidim mo sapotem ol narafala yut. Olgeta i folem eksampol blong Sevya mo lanem blong givim seves olsem Hem mo blong tij olsem Hem.
Ol Janis blong Yut Lidasip
Lidasip i stat long hom blong yu. “Blong stap mekem wok blong yumi long God olsem ol papa mo mama mo ol lida, i stat taem yumi stap lid wetem eksampol—stap folem oltaem mo stap wok had blong laef folem ol gospel prinsipol long hom,” Elda Robet D. Hels blong Kworom blong Olgeta Twelef Aposol i tijim. “Hemia i nidim strong tingting mo hadwok evridei.”4 Ol papa mo mama i tijim doktrin blong Kraes. Olgeta i heplem ol yut blong faenemaot mo kasem ol stamba tingting. Ol Pesenol Progres mo Diuti long God i givhan long ol yut blong mekem testemoni blong olgeta i kam moa strong long Jisas Kraes, stap rere blong mekem mo kipim ol tabu kavenan, mo fulfilim ol tabu wok mo reponsabiliti insaed long famle, hom, mo Jos.
Long jos, ol lida blong Aronik Prishud mo Yang woman i save givhan long ol yut we oli stap givim seves insaed long ol kworom mo klas presidensi blong andastanem ol tabu wok blong olgeta mo givim ona long koling blong kea mo mekem ol nara kworom mo klas memba i kam moa strong.
Olsem ol adalt lida, yumi stap priperem ol yut blong save kondaktem ol kworom mo klas miting mo ol Miutuel aktiviti. Yumi mit wetem ol yut long ol presidensi miting taem oli stap traem blong faenem ol wei blong helpem olgeta we oli stap fesem hadtaem, blong ingkludum evri yut long Sandei lesen, mo blong planem ol aktiviti, ol seves projek, ol kamp, mo ol yut konfrens.
Yumi leftemap tingting blong ol presidensi blong ol yut blong givhan long evri kworom mo klas memba blong tekpat long evri pat blong wok blong sevem man, holem taet olgeta we oli konvet i kam, aktivetem ol les aktiv memba, tempol mo famle histri wok, mo tijim gospel.5 Ol presidensi blong yut i helpem evri yang man mo yang woman blong lanem abaot bigfala glad mo blesing blong stap givim seves long nem blong Sevya mo fidim ol sipsip blong Hem.
Wok blong wan lida i no abaot ol naesfala samting olsem long Pintres o blong givim ol longfala lesen. Wok blong wan lida i blong helpem ol yang man mo yang woman blong lanem mo mekem folem ol prinsipol we bae i helpem olgeta blong lid folem wei blong Sevya. Hemia hem i fo long ol prinsipol ia.6
Rere long Saed blong Spirit
Givhan long ol yut blong oli andastanem paoa blong stap rere olgetawan long saed blong spirit. Tijim olgeta blong eksesaesem fet long ol kavenan we oli mekem long odinens blong sakramen. Strong tingting blong olgeta blong tekem long olgeta nem blong Kraes, blong tingbaot Hem, mo blong kipim ol komanmen blong hem bae i kwalifaem olgeta blong gat Tabu Spirit olsem fren blong olgeta oltaem. Olgeta i no stap olgetawan nomo long seves blong olgeta taem oli save kasem, luksave, mo folem voes blong Tabu Spirit.
Oli save rere long saed blong spirit taem oli lukaotem gaedens long prea mo lukaotem ol ansa long ol skripja. Oli traehad blong save kipim ol komanmen blong Tabu Spirit i save toktok long olgeta long ol hat mo maen blong olgeta blong oli filim mo save huya nao i nidim help blong olgeta mo wanem nao oli save mekem. Oli filim klin lav blong Kraes blong wanwan menba blong klas o kworom.
Blong stap rere long saed blong spirit i givim ol yut paoa long tingting se olgeta i stap long saed blong Lod mo oli stap mekem wok blong Hem (luk long D&C 64:29).
Tekem Pat long Ol Kaonsel
Tijim ol yut stamba oda mo paoa blong revelesen blong ol kaonsel taem oli tek pat long tabu fasin ia we Jos blong Lod i stap wok folem mo wanwan man mo ol famle i stap kasem ol blesing.7 Bisoprik yut komiti mo kworom mo klas presidensi miting oli ol kaonsel we ol yut lida oli lanem ol diuti blong olgeta blong kasem ol risponsabiliti blong tijim mo helpem ol narawan.
Ol Memba blong Kaonsel
-
Oli stap wan wetem mo folem daereksen blong ol prishud lida, we oli holem ol ki blong prishud.
-
Serem ol tingting blong olgeta long wan spirit blong stret mo gud fasin, stap tabu, fet, folem ol gudfala standet, fasin blong wet long taem, fet, bigfala lav, mo kaen fasin.
-
Wok tugeta, wetem gaedens blong Tabu Spirit, blong planem wanem olgeta i nid blong mekem blong helpem olgeta we oli stap long nid.
Givhan long Ol Narafala Man
Ol yut oli lid long wei blong Sevya taem oli givhan long ol narafala man wetem lav mo kaen fasin. Josef Smit i bin tijim: “I no mo gat wan samting we i moa impoten blong lidim ol man blong sakem sin bitim we yu holem han blong olgeta, mo lukaotem olgeta wetem wan sopsop hat. Taem ol man oli soemaot kaen fasin mo lav long mi, O hem i givim paoa long maen blong mi.”8
Sevya i bin tijim gud mo bigfala praes blong evri sol (luk long D&C 18:10–15). Givhan long ol yut blong yumi blong andastanem impoten trutok ia se Jisas Kraes i putum daon laef blong Hem blong evri man oli save kam bak long Hem. Blong soemaot tangkyu long wanem we hem i bin mekem, ol tru wokman blong Lod oli go aot mo givhan wetem lav mo kaen fasin long evri yang man mo evri yang woman, we Sevya i bin mekem bigfala sakrifaes from.
Tijim Gospel blong Jisas Kraes
Givhan long ol yang man mo yang woman blong luksave ol janis blong tijim gospel mo andastanem se bigfala impoten tijing blong olgeta hem i eksampol blong olgeta. Taem ol yut oli stap laef folem ol toktok blong ol profet mo stap kipim ol standet insaed long Blong Paoa blong ol Yut, olgeta i stap lid olsem Sevya. Tru long ol ones toktok mo aksen blong olgeta, oli save soemaot wanem nao i minim blong stap olsem wan tru disaepol blong Jisas Kraes. Oli stanap olsem ol tru witnes. Afta taem oli serem testemoni, givhan blong tijim wan lesen long Sandei, o serem ol trutok blong gospel wetem ol fren blong olgeta, bae Tabu Spirit i fulumap olgeta mo ol toktok blong olgeta bae i gat paoa blong save jenisim hat blong ol man.
Lid Folem Wei blong Sevya
Blong lid folem wei blong Sevya hem i wan tabu janis we i nidim ol yut blong traehad blong givim seves long Lod long hom, insaed long Jos, mo long komiuniti. Ol yang man mo yang woman we i stap lid folem wei blong Sevya oli ol mesej blong gospel blong Kraes, ansa blong prea blong wan man, ol enjel we oli kea form olgeta we oli gat nid, mo laet blong Kraes long wol.