Givim Seves Insaed long Jos
?Mi stap Mekem INAF?
Man ia we i raet, i stap long Yuta, YSA.
Wan lesem abaot wan sipsip we i lus, i helpem mi blong andastanem olsem wanem mi save fulfilim koling blong mi.
Foto pikja i kam long Mike Boyland/iStock/Thinkstock mo Oleksiy Fedorov/Hemera/Thinkstock
Taem mi kasem 23 yia, mi bin kasem koling blong kam olsem Rilif Sosaeti presiden blong wod mifala, blong ol studen we oli mared. Mi tingbaot se mi bin filim se mi no naf blong mekem wok ia, wetem ol strong tingting blong traem bes blong mi. Mi bin glad tumas blong givim seves, be mi gat tu tingting sapos mi save kam wan gudfala lida.
Afta sam manis i pas olsem Rilif Sosaeti Presiden, mi bin filim se mi no stap mekem i naf. Mi bin wantem blong konek wetem ol sista mo save ol nid blong wanwan long olgeta, be mi filim se mi no stap mekem i naf.
Mi bin toktok wetem bisop blong mi mo talemaot wari blong mi. Mi bin eksplenem se mi no save helpem evri sista olsem we mi wantem blong mekem. Mi diskraebem se mi hop se i gat faef man olsem mi blong mi save mekem wok ia olsem we mi ting se mi sud mekem. Mi traem blong mekem ol wari ia i fani lelbet, be ae blong mi i fulap wetem wota blong tingting we i foldaon. Hem i smael mo i bin givim sam long ol gudgudfala lidasip advaes we mi neva bin kasem bifo.
“?Yu save stori blong man blong lukaot sipsip, we taem hem i lusum wan sipsip blong hem, hem i livim ol narafala naenti mo naen ia blong faenem wan ia nomo?” hem i askem (luk long Luk 15:4–7). Mi slingim hed.
“I gat fulap waes toktok long parabol ia,” hem i gohed. “Man blong lukaotem sipsip i save se bae naenti mo naen ia oli stap oraet nomo sapos hem i livim olgeta mo go lukaotem wan sipsip ia we i lus.”
Afta bisop blong mi i givim advaes ia:
“Yu luk, ol naenti mo naen ia oli gat wan gudfala wei blong stap lukaot long wanwan long olgeta taem yu no stap. Bambae oli sapotem mo leftemap wanwan long olgeta. Mi ting se bae yu lukluk moa long olgeta we oli lusum rod. Ol narawan bae oli oraet.
Mi bin filim wan strong witnes se wanem hem i talem hem i tru mo mi no nid blong wari from evriwan wantaem. Stamba tingting hem i blong faenem olgeta we oli lus mo invaetem olgeta blong kambak. Long wei ia, ol stamba tingting blong Papa long Heven i save hapen, mo mi save stap olsem wan tul long han blong Hem.
Taem mi folem kaonsel blong bisop, mi andastanem moa olsem wanem Lod I wantem mi blong mi givim seves insaed long kingdom blong Hem. Mi bin kasem paoa long spirit long koling blong mi from mi stap givim seves olsem we Sevya i talem. Tru long paoa blong Tabu Spirit, bisop blong mi i bin givim long mi wan gudfala presen blong andastanem mo luksave samting.
Mi testifae se taem yumi prea mo lukaotem insperesen long ol prishud lida blong yumi, bae olgeta tu i kasem insperesen blong soem long yumi hao blong stap wan lida folem ol stret mo gud fasin.