Ang Seminary Bililhon!
Nagkinahanglan tingali kini og sakripisyo, apan kini nga mga kabatan-onan nasayud unsa kadako nga panalangin ang seminary.
Unsa ang usa ka butang nga komon sa mga kabatan-onan nga Santos sa Ulahing mga Adlaw sa tibuok kalibutan? Sila mga estudyante sa seminary! Ang kabatan-onan motambong sa seminary sa daghang lain-laing mga paagi. Ang uban momata og alas 5:00 sa buntag aron motambong sa dili pa moeskwela, samtang ang uban motambong sa lat-ang sa ilang regular nga mga klase sa eskwelahan. Sa panagsang okasyon, ang pipila ka mga estudyante motambong sa tapos sa semana o mogamit og Skype sa pag-apil.
Dili igsapayan kon ila ba nga gisakripisyo ang pagkatulog o ang mga dula sa futbol sa tapos sa semana, sobra sa 390,000 nga mga kabatan-onan sa tibuok kalibutan ang malipayong mi-apil sa seminary. Kini mao ang ilang ikasulti mahitungod sa mga panalangin sa seminary:
“Wala ko maghunahuna niini nga nakulangan og usa ka oras ang pagkatulog; ako kining gihunahuna isip usa ka oras sa pag-andam sa akong kaugalingon sa espirituhanong paagi.”
Megan C., 17, California, USA
“Tungod sa seminary, ang akong pagpamatuod nalig-on pag-ayo, ug ako adunay mas sigurado nga kahibalo sa mga kasulatan. Ang akong pagpamatuod sa sakripisyo sa Manluluwas sa Getsemani mas lig-on tungod sa seminary.”
Vina C., 17, Hong Kong, China
“Ang seminary mao ang usa ka makanunayong dapit diin akong mabati ang Espiritu. Sa akong panimalay ako lang ang bugtong aktibo nga miyembro, apan gisuportahan ko pag-ayo sa akong mga ginikanan. Tungod sa seminary, sobra ang akong paglambo.”
Amanda L., 17, Utah, USA
“Ang seminary makapabalanse sa emosyon ug hunahuna alang sa mga panghitabo nianang adlawa. Kon magsugod ko og paghunahuna og mga dili maayo, mahimo kong maghunahuna sa mga leksyon sa seminary. Kini molambo lapas sa seminary.”
Eric G., 15, Ipswich, England
“Importante kaayo nga motambong sa seminary tungod kay makakat-on kita og dugang mahitungod sa atong Simbahan ug mapalig-on ang atong relasyon uban sa Langitnong Amahan. Ang rason nga ganahan ko sa seminary tungod kay mas daghan ko og masayran kabahin sa kasaysayan sa Simbahan ug masayud gayud nga ang ebanghelyo tinuod ug nga ang Langitnong Amahan ug si Jesukristo nahigugma kanako!”
Breck M., 17, Kentucky, USA
“Ganahan ko sa seminary tungod kay kini makatabang nako sa paghimo og mga desisyon. Diha sa mga klase mabati nako ang Espiritu sa Ginoo ug makabaton og kumpirmasyon nga kini mao ang ebanghelyo ni Jesukristo. Walay rason nga dili maganahan niini. Nasayud ko nga ang akong pagtuon niining upat ka tuig makatabang kanako sa pagserbisyo og misyon.”
Karolina O., 16, João Pessoa, Brazil