Ang mga Kasulatan Nakahimo og Kalainan Kanako
Ang tagsulat nagpuyo sa Metro Manila, Philippines.
Sa Pilipinas, adunay mga science high school alang sa lantip og salabutan nga mga estudyante. Ang mga estudyante niini nga mga eskwelahan adunay daghang mga subject, mogahin og mas daghang oras sa klase, ug mogahin og dugang nga mga paningkamot sa buluhaton sa eskwelahan.
Kini nga matang sa palibut dili maayo alang kanako. Gibiyaan nako ang daghang mga butang sa pagsulod niini nga eskwelahan. Mihunong ko sa pagkat-on unsaon pagtukar og mga instrumento. Halos wala koy matambungan nga mga kalihokan sa Simbahan, ug usahay dili makatambong sa mga tulumanon sa Dominggo tungod sa mga kompetisyon sa eskwelahan. Naglisud ko sa pagtambong sa seminary, bisan og ang mga klase gihimo kada tapos sa semana.
Usa ka Sabado, ang akong seminary teacher misulti kanamo unsa siya ka busy kaniadto sa high school, apan nakahimo gihapon siya sa mga buluhaton sa seminary ug nakatuon sa mga kasulatan sa scripture mastery. Siya mihagit kanamo sa pagbuhat sa ingon.
Ang mga hagit makapaabtik nako, mao nga ako kining gidawat. Magdala ko sa akong mga kard sa scripture mastery bisan asa. Nag-ampo ko alang sa panabang aron makahimo niini uban sa akong mga buluhaton sa eskwelahan. Akong gigamit ang tanan nakong bakanteng oras. Magmemorya ko og mga kasulatan samtang magsakay ko paingon sa eskwelahan. Dili na kaayo ko makig-istorya ug akong kuhaon ang mga kard gikan sa akong bulsa. Ang akong mga higala nakabantay; ang pagkaykay sa mga kard sa kasulatan nahimo namong bag-ong kalihokan panahon sa mga bakanteng oras ug sa tingpaniudto. Malingaw sila nga mopatag-an kanako. Ang pipila misugod sa pagdala sa ilang mga kasulatan—bisan kadtong nahisakop sa laing mga relihiyon. Sila mipakigbahin mahitungod sa mga kalihokan sa ilang kaugalingon nga mga simbahan. Akong gibati nga nausab ang akong palibut, ug mas migaan ug mas nindot ang eskwelahan.
Ang akong tulo ka manghud nga mga babaye misunod sa akong ehemplo, ug karon ang akong pamilya nagdawat sa mga panalangin sa mga kasulatan diha sa among mga relasyon sa panimalay. Labaw pa kini kaysa pagmemorya lang og mga pulong; ang akong seminary teacher mitudlo kanako sa kalainan nga mahimo sa mga kasulatan ngari kanako ug sa mga tawo nga naglibut kanako. Ako nasayud nga bisan unsang hagit o pagsulay nga moabut sa akong pamilya ug mga higala, kami kanunay makakita og kalig-on, giya, ug kalinaw diha sa mga pulong sa atong mahigugmaong Manluluwas.