Usa ka Kultura sa Hugot nga Pagtuo sa Guatemala

Ni Lisa López

Mga Magasin sa Simbahan

Si Merci Arens nakamatngon nga ang pagdepensa sa iyang mga sumbanan mas sayon kon siya abagan sa iyang mga higala kinsa susama niya og mga sumbanan.

Imahe

Composite of three images. 1) A lake in Guatemala 2) A Guatemalan textile 3) A young woman in Guatemala, Merci Arens.

Gilitratohan ni Merci Arens; litrato sa panapton pinaagi ni Steve Burger/iStock/Thinkstock; litrato sa Lawa sa Atitlán ni Simon Dannhauer/iStock/Thinkstock

Sulod sa 68 ka tuig sukad ang Simbahan unang gipaila sa Guatemala, ang membership milambo. Ang Guatemala usa ka nasud nga dunay baga nga kalasangan ug nagkadaiyang kultura sa Mayan. Bisan sa katahum niini, ang Guatemala sa kasagaran mahulagway sa iyang kakabus ug sa politikanhong kagubot. Wala kini magpasabut, hinoon, nga usa kini ka nasud nga kabus sa espiritu. Si Merci Arens, usa ka 25-anyos nga taga Siyudad sa Guatemala, personal nga mibati og kabulahan nga makapuyo sa usa ka nasud diin ang katawhan, sa dakong bahin, mitugot ug midawat sa nagkalain-laing relihiyon. “Usa sa mahinungdanong mga kinaiya sa kutura sa Guatemala mao nga, sa kinaiyahan, kami mga relihiyusong katawhan,” matud niya. “Ang kultura sa palibut ug ang kalikupan maabiabihon kaayo ug sadya.” Tungod niana, ang pagpangitag kauban nga sama og gituohan dili gayud sayon.

“Ang akong mga sumbanan kanunayng daw hapit dili makita ngadto sa mga katawhan sa trabaho ug sa eskwelahan kinsa wala gayud nakadungog sa Mormonismo,” matud niya. Kini wala makapawagtang sa kadasig alang kang Merci, kinsa mihatag og gibug-aton sa kaimportante sa pagka-aktibo sa mga calling sa simbahan ug sa mga kalihokan. “Kon moadto ako niining mga kalihokan, nakiglambigit ko aron makamugna og relasyon uban sa katawhan nga ang sukaranang mga tumong ug baruganan sama sa akoa.” Iyang nakaplagan nga ang pagbaton og mga higala nga kapaambitan sa espirituwal nga mga kasinatian nakatabang nga molambo sa iyang pagpamatuod. Tungod niining panaghigalaay, napalgan usab ni Merci ang wala damhang mga panalangin. “Akong nakita nga ang pakig-date mas sayon tungod kay nakig-date ako sa mga higala. Nakita nako kini sa nagkalain lain nga mga sitwasyon, diin nagtugot kanako nga maila-ila sila sa mas natural nga paagi.”

Usa ka okasyon si Merci miangkon nga napugos sa pagminyo; hinoon, siya naniguro unsay anaa sa iyang kasingkasing nga ang tanang butang maayo ra ang sangputan. “Mahinangpon akong makighimamat sa usa ka kauban kinsa, pinaagi sa among pakigrelasyon, makatabang nga mas mahiduol ako sa Dios ug kaming duha magtukod og usa ka mahangturon nga pamilya.”

Sa tanang mga panalangin nga nadawat ni Merci, adunay usa ka piho nga mipatigbabaw kaniya: “Nawad-an ako sa akong mama sa edad nga 15. Sa iyang pagkamatay miabut ang daghang pangutana. Hinoon, kining mga pangutanaha ug ang sunod-sunod nga mga tubag niini hingpit nga mihulma sa akong kinabuhi.” Pinaagi sa matinud-anon nga pag-ampo, nadawat ni Merci ang kahupayan nga usa unya ka adlaw makahatag ra siya sa samang paggakos nga gihatag sa iyang mama kaniya sa gamay pa siyang bata. “Ang kamatuoran sa ebanghelyo miiwag sa matag adlaw nakong kinabuhi ug sa mga kalihukan,” matud niya. “Nasayud ko nga ako konektado ngadto sa balaan nga gugma sa Dios, ug mao kanay nagkompleto kanako sa tanang paagi.”

Dugang pa kabahin ni Merci

Unsa ang imong paborito nga pagkaon nga Guatemalan?

Gitawag kini og “Hilachas”—usa ka sinabaw nga may pulang mga patatas ug tinag-as nga gilis sa ginunting nga karne sa baka. Ang ubang tawo mopuno og mga green nga beans o carrots, apan ang akong gusto patatas lang.

Unsa may mga paborito nimong mga dapit?

Ang Guatemala maoy usa ka dapit sa natural nga katahum. Usa sa akong paborito nga dapit nga bisitahan mao ang Lawa sa Atitlan ug ang nagpalibut nga lungsod, Panajachel, nga nagpakita sa kultura sa Mayan. Ang mga lumad mitrabaho pag-ayo aron mapreserbar ang ilang tradisyonal nga pinulongan, ug ganahan kong modayeg sa mga kolor ug sa kakuti sa ilang gilala nga mga sapot.

Unsa man ang mas taas nga edukasyon sama sa Guatemala?

Sa akong nasud ang isyu sa edukasyon maoy lisud. Ang kawalay kinaadman maoy usa ka problema nga giatubang sa kadaghanan sa populasyon. Human makagradwar sa high school, ang kadaghanan sa mga young adult magsagubang sa ekonomikanhong mga responsibilidad nga mopugos kanila sa pagpili tali sa pag-eskwela og unibersidad ug pagtrabaho og full-time. Apan ang Simbahan nahimong usa ka talagsaong himan sa pagtabang sa mga miyembro nga maka-access og mas taas nga edukasyon.