Akong Gibati ang Gahum sa Pag-ula ni Jesukristo sa Dihang …
Ang mga young adult mipakigbahin sa ilang mga kasinatian sa paggamit sa Pag-ula sa Manluluwas.
Ibabaw: paghulagway sa litrato pinaagi ni Janae Bingham; ubos sa tuo: paghulagway sa litrato pinaagi ni Alexandre Borges
Ang Manluluwas Mitabang Kanako sa Maayo ug sa Ngil-ad nga mga Panahon
Ang adlaw sa akong bunyag susama sa usa ka damgo—hilabihan ang akong kalipay ug kamahinangpon nga magsugod sa kina-buhi isip usa ka hingpit nga tawo. Apan, usa ka oras pagkahuman gyud sa akong bunyag nakiglalis ko sa akong mga igsoon. Nahinumdom ko nga gibati og kahiubos nga wala abti og dugay nasipyat dayon ko human ako nabunyagan ug nakumpirmahan, apan nahi-numdom usab ko nga sa dihang naghinulsol ko, nabati nako nga naayo na usab ako. Busa nakakat-on ko gikan sa linghod nga edad nga ang Pag-ula ni Jesukristo nagdala sa gikinahanglan nga kahupayan gikan sa sala.
Samtang ako nagpadayon sa pagpalambo sa akong panabut sa ebanghelyo, akong nakat-unan nga ang Pag-ula dili lamang usa ka butang nga magamit sa matag higayon nga ako nakasala. Ang Pag-ula mahimong kabahin sa akong kinabuhi sa mga panahon sa pagsulay, kalipay, kahiubos, ug kalampusan. Kon ako nanlimbasug aron madawat sa akong mga kaedad, ako nag-ampo ngadto sa Langitnong Amahan ug Ako nahupay sa pagkahibalo nga ang Manluluwas nakigbisog usab sa samang pagbati. Sa higayon nga maayo ang akong nabuhat sa bisan unsang butang, ang akong kalipay modako kon maghunahuna ko nga nagmaya ang Manluluwas, tungod kay Siya nakasinati nianang sama nga mga pagbati.
Abby McKeon, Utah, USA
Nakakat-on ko sa Pagsalig sa Ginoo
Sulod sa daghang katuigan ako mibati nga nag-inusara ug biniyaan. Nanglimbasug ako uban sa dili matarung nga mga tinguha nga nakapahimo nako sa pagpakasala, nga sa katapusan mibutang kanako sa usa ka pagbalik-balik nga kahasol sa konsensya ug kaulaw. Mapasalamaton ko nga, usa ka mahigugmaong bishop mitudlo nako kabahin sa tulumanon sa Pag-ula sa Manluluwas sa pagtabon sa mga kahuyang, kasakit, ug kasubo ingon man usab sa sala. Ang akong bishop nagmaya sa akong pag-uswag ug mihupay kanako sa dihang nasayop ko.
Akong nakat-unan nga ang pagbaton lamang og ideya bahin sa Manluluwas dili igo—kinahanglan ko nga mag-ampo ngadto sa Langitnong Amahan ug aktibong maghinulsol pinaagi sa Pag-ula ni Jesukristo. Samtang ako kining gibuhat, ako milambo nga mas masulundon sa mga sugo sa Dios ug mas maduol sa Manluluwas.
Samtang ako nanlimbasug sa tintasyon, akong nakat-unan nga ako hingpit nga makasalig sa akong Manluluwas ug sa Iyang Pag-ula. Samtang ako nagbarug diha sa sukaranan sa akong Manunubos, ang akong mga kahuyang mamahimong lig-on. Uban ni Pablo ako makasulti, “Labi pang igakalipay ko diay hinoon ang pagpasigarbo tungod sa akong mga kahuyang aron ang gahum ni Kristo magapandong kanako. … kay sa diha nga magamahuyang ako, magamalig-on man hinoon ako”(2 Mga Taga-Corinto 12:9–10).
Jacob H. Taylor, Idaho, USA
Ako Nakasinati og Kausaban sa Kasingkasing
Atol sa high school ang akong kasingkasing wala gayud diha sa ebanghelyo. Sa mission field hinay-hinay nakong nakat-unan unsa gayud nang mahitungod sa misyon ug ganahan sa gahum ug pag-uswag nga mahatag niini sa akong kinabuhi kon ako matuod nga takus. Sa katapusan, ang kahasol sa konsensya ug mga kasubo gikan sa nangaging mga kalapasan mihimo nako sa pagpaubos, ug ako gusto og kagawasan—nga mahimong limpyo ug mahimong mas maayo nga himan sa kamot sa Ginoo. Human sa pipila ka diskusyon uban sa akong presidente sa misyon, mipauli ko aron sa paggahin og panahon sa paghinulsol.
Ang pag-uli sapanimalay maoy usa sa labing lisud nga panahon sa akong kinabuhi. Gisugdan nako sa pagbasa ang mga kasulatan sa lahi nga paagi, sa pagkatinuod sa pagsabut ug paggamit niini. Samtang ako nagbuhat sa tanang butang nga “husto”, gibati pa gihapon nako ang dakong palas-anon sa kahasol sa konsensya. Dayon misugod ako sa pagtutok sa akong pagtuon diha ni Kristo ug sa Iyang Pag-ula, sa unsang paagi nga Siya nahimo nga akong Manluluwas ug sa unsang paagi nga ang Iyang walay kinutuban nga Pag-ula makatubos sa akong kalag. Usa ka gabii samtang namalandong ko sa tanan nakong nakat-unan gikan niadtong mainampuong pagtuon, nabati nako ang Espiritu nga mitandog sa akong kasingkasing, ug mihupay kanako. Akong gibati ang kasigurado ug gugma, ug ang kahasol sa sala mibiya kanako.
Sa una nakong pag-uli sa balay, naghunahuna ko nga ang pagbag-o sa kasingkasing mao ray akong gikinahanglan alang sa proseso sa paghinulsol. Karon nasayud ko nga ako nagkinahanglan og panahon sa paghinulsol—ang kausaban moabut lagda ngadto sa laing laing lagda, ginagmay sa matag higayon. Nagkinahanglan kini og linugwayan ang paningkamot sa pag-usab sa atong mga kasingkasing, tinguha, ug gawi aron mahimong mas mahisama ni Kristo. Kita dili makahimo og 180 ka degree nga kausaban diha-diha dayon, apan tungod sa Pag-ula, kini mahimong hingpit nga mahitabo.
Ang ngalan gipugngan, Utah, USA
Nakat-on Ko sa Pagpasaylo
Dihay usa ka punto sa akong kinabuhi nga nasakitan og maayo ang akong pagbati nga nakaapekto kini sa matag aspeto sa akong kinabuhi. Dili ko makatutok sa akong mga klase o homework, ang akong relasyon uban sa akong mga kauban sa kwarto nadaot, ug ako kanunayng kahilakon. Labaw sa tanan, naglisud ko sa pagpasaylo sa tawo nga maoy nakaingon nga nasakitan ako—ug gani mas nasuko pa ko nganong naglisud ko sa pagpasaylo.
Sa katapusan, nakahukom ko nga tapuson na ang akong kasuko ug kasubo. Dili na ko gustong magpas-an pa niana nga palas-anon. Nangamuyo ko sa Langitnong Amahan nga tabangan ako nga makapasaylo. Sa wala pa ako masayud niini, ang kasakit madala-dala na. Wala kini mawagtang, apan madala ra kini. Pinaagi niining kasinatian ako nakat-on nga ang Pag-ula sa Manluluwas dili lang magtugot nato sa paghinulsol; kini nagtabang usab kanato nga mamaayo. Dihang miduol ko sa Langitnong Amahan uban sa akong palas-anon, diha sa kamapainubsanon ug uban sa tim-os nga kasingkasing, Siya mitabang nako nga madala ra ang kasakit, kangutngot, ug kasakit sa pagbati nga akong gihambin.
Dani Lauricella, California, USA
Ako Mibati og Paglaum alang sa Umaabut
Dihang ang akong mga ginikanan nag-diborsyo, Akong gibati nga tanan nakong paglaum sa pagbaton og usa ka mahangturon nga pamilya natapos na. Lisud kaayo kadto nga panahon sa akong kinabuhi. Hinoon, bisan og dili sayon alang nako ang pagdawat niini, kadto nga pagsulay nagpadangat og dili makita nga mga panalangin sa akong pamilya. Usa ana, nabunyagan ang akong mama!
Ako usab mas nakaila sa akong Manluluwas. Aron mabuntog ang akong kaguol, akong gipili nga moduaw sa akong iyaan didto sa Peru, diin akong nahimamat ang usa ka bag-ong higala kinsa nakapalig-on kanako pag-ayo. Kana nga higala ug ako kanunayng magdungan sa pagtuon sa mga kasulatan ug atol sa espesyal nga okasyon samtang naghisgut sa mga hilisgutan sa ebanghelyo, akong nabati ang kusog kaayong pagbati sa gugma sa Manluluwas alang kanako. Ang pagbati susama sa tingog sa akong Manluluwas nga nagsulti kanako nga, “Ako kanunayng nag-uban kanimo; wala lang gayud ikaw makamatngon.”
Karon Ako nasayud nga ang atong Manluluwas buot nga motabang kanato ug nga Siya kanunayng nag-uban kanato. Usahay atong gitugtan ang atong mga kasubo nga mahimong mas labaw pa kay sa atong hugot nga pagtuo ug nagtuo kita nga Siya nahikalimot na kanato, apan sa tinuoray, ang Iyang Pag-ula kanunayng makatabang nato.
Liliane Soares Moreira, Bahia, Brazil
Iyang Hingpit nga Pag-ula
Mituo ako sa una
Nga adunay usa ka lungag
Sa Pag-ula ni Kristo—
Nga Siya makaluwas sa tanan—
Gawas nako.
Apan sayop ako.
Dili lang usa ka lungag,
Apan pito.
Duha ka lungag sa
Iyang mga Kamot
Diin sila milansang Kaniya
Ngadto sa krus
Sa kagustuhan sa kadaghanan
Siya mamatay
Aron pagluwas,
Duha ka lungag sa
Iyang pulso
Diin ilang gipaniguro
Ang gibug-aton sa Iyang lawas
Dili makapahimo
Iyang mga kamot
Paggisi pinaagi sa
Sa wala pa ang Iyang penitensya
Nakompleto,
Duha ka lungag sa
Iyang mga tiil
Diin Siya mibarug
Isip usa ka saksi ngadto sa tanan
Sa dili matarug nga gugma sa Dios
Alang sa matag usa
Sa Iyang mga anak,
Ug usa ka lungag diha sa
Iyang kilid
Diin sila miduslak Kaniya
Aron pagmatuod nga ang Iyang buhat
Nahuman na.
Pito.
Kahingpitan
Pito ka hingpit nga lungag
Diha sa yuta lamang
Hingpit nga tawo.
Ang Dili Hitupngan nga Pag-ula
Sa pagtapak sa mga lungag sa atong mga kinabuhi.
Ang Iyang mga lungag nakapahimo kanato nga
Mamaayo.
Nasayop ko.
Adunay
Mamaayo
Sa Pag-ula ni Jesukristo
Alang kanako
Human sa tanan.
Kasey Hammer, Utah, USA
Akong Nakaplagan ang Kahupayan diha sa Iyang Pagkabanhaw
Sa dihang 23 anyos ko, ang akong lola namatay. Bisan og nagpuyo siya sa maanindot nga kinabuhi, daw batan-on pa gihapon siya, ug ang iyang kamatayon nauna kay sa gidahuman. Ako nasayud nga daghan ang nawad-an og mas daghan pa kay kanako ug ang akong apohan anaa sa kalinaw, apan nabati pa gihapon ang kasakit sa kahibalo nga dili na gayud nako siya makita pag-usab niining kinabuhia.
Pinaagi niining mga kasub-anan, hinoon, ako mibati nga ang Langitnong Amahan ug ang Manluluwas nagtabang kanako. Mga mabination nga mga visiting teacher ug mga higala nagdala og mga matam-is nga mga sulat ug lamiang pagkaon, ug ang minahal nga silingan mohapit sa balay sa akong pamilya dala ang usa ka basahon nga siya nadasig sa pagpalit alang kanamo. Ang libro naglangkob og mga kinutlo gikan sa mga apostoles ug mga propeta diha sa plano sa kaluwasan ug sa katinuod sa kinabuhi human sa kamatayon.
Samtang akong gibasa og kusog ang mga pulong sa mga propeta uban sa akong igsoong babaye nianang gabhiuna, nabati nako ang maanindot nga kalinaw nga misulod sa akong kasingkasing. Ako nasayud niana tungod sa Pag-ula ni Jesukristo, tanan kanato mahimong limpyo ug makapuyo uban Kaniya sa sunod nga kinabuhi. Ako nasayud nga “siya nagpahinabo sa pagkabanhaw sa mga patay” ug sa tanan nga mga butang—ug sa mga tawo—ipahiuli ngadto sa ilang tukma nga dapit (Alma 40:3; tan-awa usab Alma 41:2). Ako nasayud nga tungod sa Pag-ula, ang tanang miyembro sa akong pamilya, lakip niadtong nangamatay, magkauban sa kahangturan, ug tungod niana ako hangtud sa hangtud nga mapasalamaton.
Amanda Seeley, Utah, USA