“Ako Nakahibalo sa Akong Kaugalingon”
Gusto mong makahibalo sa inyong kaugalingon sa kamatuoran sa ebanghelyo? Patas-i ang inyong pagkat-on sa ebanghelyo diha sa seminary.
“Ako nakahibalo sa akong kaugalingon” mao ang lima ka yano nga mga pulong nga gisulti ni Propeta Joseph Smith ngadto sa iyang inahan human niya nasinati ang Unang Panan-awon (Joseph Smith—Kasaysayan 1:20). Kini nga mga pulong naglangkob og usa ka gamhanan nga leksyon alang kanato karon. Sama sa gitudlo ni Presidente Thomas S. Monson: “Nag-edad man kamo og 12 o 112—o bisan asa sa tunga—masayud kamo mismo nga ang ebanghelyo ni Jesukristo tinuod.”1
Aron pagtabang kaninyo nga “makahibalo sa inyong kaugalingon”, ang mga estudyante sa seminary sa tibuok kalibutan karon mokompleto og duha ka dugang nga mga kinahanglanon aron mogradwar sa seminary: (1) mobasa sa gi-assign nga mga kasulatan alang niana nga kurso ug (2) mopasar og duha ka mga assessment sa pagkat-on atol sa matag kurso. Ania kon sa unsang paagi kining nga bag-o nga mga kinahanglanon sa paggradwar makatabang sa paglig-on sa inyong pagpamatuod:
Kamo magbasa ug magtuon sa mga kasulatan sa kurso.
Samtang inyong tun-an ang mga kasulatan, mosugod kamo sa pagbati sa impluwensya sa Espiritu nga mogiya kaninyo nga mapaladman ang inyong pagkakabig. Human makompleto ang gikinahanglan nga pagbasa sa mga kasulatan sa iyang katapusang tuig sa seminary, ang usa ka estudyante mipakigbahin nga mas daghan siya og nakat-unan tungod kay siya “mibasa gyud sa mga kasulatan—wala lamang mobasa niini apan nagtuon niini.”
Si Elder D. Todd Christofferson sa Korum sa Napulog Duha ka mga Apostoles mitudlo unsa ang gipasabut sa pagtuon: “Sa pagsulti ko nga ‘tun-an,’ nagpasabut ko … magbasa mo og pipila ka mga bersikulo, mohunong aron mamalandong niini, magbasa og maayo sa mga bersikulo pagbalik, ug samtang naghunahuna mo bahin sa unsay gipasabut niini, mag-ampo para sa panabut, mangutana diha sa inyong hunahuna, maghulat sa espiri-tuhanong mga impresyon, ug mosulat sa mga impresyon ug mga panghunahuna nga moabut aron mo makahinumdum ug makat-on og dugang pa.”2
Inyong magamit ang mga assessment sa pagkat-on sa pagtimbang-timbang unsay inyong nakat-unan.
Ang usa ka assessment sa pagkat-on mao ang sama sa pangutana sa usa ka anghel sa Ginoo ngadto ni Nephi: “Unsa ang imong nakita?” (1 Nephi 11:14). Kini nga pangutana miaghat ni Nephi sa pagtimbang-timbang ug pagpahayag sa unsay iyang nakat-unan.
Ang mga assessment sa pagkat-on adunay tulo ka bahin: multiple-choice nga mga pangutana ug usa ka essay nga pangutana, diin graduhan, ug usa ka personal nga assessment sa imong mga gituohan, nga dili graduhan. Human sa usa ka assessment sa pagkat-on, ang usa ka estudyante miingon, “naghinam-hinam ako niini tungod kay gusto nakong masayran unsay akong nakat-unan gikan sa seminary.” Mikomentaryo ang laing estudyante nga ang assessment sa pagkat-on “makatabang kaninyo nga makasabut kon asa na kamo karon diha sa ebanghelyo ug asa kamo angay nga maanaa.”
Ang mga assesment mahimong mas epektibo kon kamo magtutok sa mga doktrina ug mga baruganan sa ebanghelyo nga maoy gibasihan sa mga pangutana sa assessment sa pagkat-on. Human ang usa ka klase sa seminary mihisgot sa mga doktrina luyo sa mga pangutana, usa ka estudyante mipakigbahin, “Kini nakapausab sa matang sa pasulit nga mas nahimong usa ka panaghisgut ug tigpalig-on sa pagpamatuod. Kini nakatabang nga motuhop ang unsay inyong nakat-unan.”
Kamo makakat-on nga ganahan sa pagkat-on sa inyong kaugalingon.
Ang pagkat-on sa atong mga kaugalingon nga ang gipahiuli nga ebanghelyo ni Jesukristo tinuod usa sa labing mahinungdanon ug labing makalipay nga kasinatian sa kinabuhi.3 Usa ka estudyante miingon, “Nalingaw ko nga mas naapil ug nakaamgo nga kinahanglan nakong moabaga og mas dakong responsibildad matag adlaw imbis nga motambong lang ug molingkod sa lingkuranan ug maminaw apan wala moapil.”
Si Elder David A. Bednar sa Korum sa Napulog Duha ka mga Apostoles mitudlo sa kaimportante sa pagkat-on: “Ang pagkat-on nga mahigugma sa pagkat-on mahinungdanon sa ebanghelyo ni Jesukristo, mahinungdanon kaayo sa atong nagpadayon nga espirituhanon ug personal nga kalamboan, ug usa ka klaro nga panginahanglan sa kalibutan diin kita karon ug sa gihapon mopuyo, moserbisyo, ug motrabaho.”4
Kon mas dako ang inyong paningkamot, mas dako ang kalipay ug pagkat-on nga inyong masinati.