Sa gabii sa wala pa ilansang si Jesus sa krus, Siya mihangyo sa Iyang duha ka mga disipulo sa pag-andam og panihapon. Dayon Iyang gidapit ang Iyang mga Apostoles nga moduol. Niana nga pagpangaon, nga gitawag og ang Katapusang Panihapon, gihatag ni Jesus ang espesyal nga paagi sa paghinumdom Kaniya kanunay. Mabasa nato kini diha sa Bag-ong Tugon:
“Ug si [Jesus] mikuha sa tinapay, ug sa nakapasalamat na siya, kini iyang gipikaspikas, ug gihatag niya, nga nag-ingon, Kini mao ang akong lawas nga gihatag kaninyo: buhata ninyo kini sa paghandom kanako.
“Maingon man usab, human sa panihapon, ang kopa gikuha niya nga nag-ingon, Kining kopa nga giula alang kaninyo mao ang bag-ong pakigsaad diha sa akong dugo” (Lucas 22:19–20).
Kon kita mokaon ug moinom sa sakrament, kita nagbuhat sa samang butang nga gibuhat sa mga Apostoles sa Katapusang Panihapon. Ang pan magpahinumdom kanato sa lawas ni Kristo ug sa unsang paagi Siya nag-antus alang kanato sa pisikal nga paagi. Ang tubig magpahinumdom kanato sa Iyang dugo nga gipaagas alang kanato.
Ang mga pag-ampo sa sakrament usab nagpahinumdom kanato sa mga saad nga atong gihimo sa dihang kita gibunyagan—sa kanunay mohinumdom ni Jesukristo. Kon maminaw kamo sa pag-ampo sa sakrament, maghunahuna mahitungod sa unsay imong gibuhat niana nga semana aron mahinumdom ni Jesus. Unsaon ninyo sa paghinumdom Kaniya sa umaabut nga semana?