Para sa Gagmayng mga Bata
Usa ka Bag-ong Pagbati
Ang tagsulat nagpuyo sa São Paulo, Brazil.
“Ang Espiritu naghong-hong kanako niini tinuod gyud kini” (Mga Himno ug mga Awit sa mga Bata, 59).
Si Gabriel ganahan makat-on mahitungod ni Jesus. Ganahan siya nga maminaw og mga istorya gikan sa mga kasulatan. Iyang pamilya nagbasa sa mga kasulatan og dungan matag gabii.
Usa ka ulanon nga gabii sila nagpunsisok sa ilang mainit nga balay. Nag-ampo si Papa. Dayon si Mama mibasa og mga istorya gikan sa Basahon ni Mormon. Si Gabriel naningkamot sa pagpaminaw og maayo. Si mama mibasa ang mahitungod ni Jesus nga nakigsulti sa mga bata.
“Mama, ang mga bata kauban ba ni Jesus?” Si Gabriel nangutana.
“Sakto kana,” miingon si Mama. “Ug Siya mipanalangin sa matag usa kanila ug nag-ampo alang kanila.”
Gibati ni Gabriel ang bag-ong pagbati. Wala siya masayud unsa kini. Mibati siya og init bisan tuod tugnaw sa gawas. Mipahiyum siya og dako.
Gusto ni Gabriel nga mopakigbahin niining espesyal nga pagbati. “Gibati nako ang tumang kalipay ug kainit!” miingon siya. Malipayon kaayo siya nga hapit gani siya makahilak!
“Kana nga espesyal nga pagbati mao ang Espiritu Santo,” misulti si Papa kaniya. “Mihatag siya nimo og init nga pagbati aron sa pagtabang nimo nga makahibalo nga ang ang mga kasulatan tinuod.”
Mipahiyom si Mama ug migakos ni Gabriel. “Kana nga pagbati nagsulti nimo nga si Jesus nahigugma nimo.”
“Si Jesus mipanalangin nako,” miingon si Gabriel. “Sama sa mga bata sa Basahon ni Mormon! Iyang gipadala ang Espiritu Santo kanako!”
Dili siya makahunong sa pagpahiyom. “Nasayud ko nga ang mga kasulatan tinuod,” naghunahuna siya. “Ang Espiritu Santo misulti kanako!”