Unsaon sa Paghinulsol nga Tinuoray
Ni Elder D. Todd Christofferson
Sa Korum sa Napulog Duha ka mga Apostoles
Gikan sa pakigpulong nga gihatag atol sa Oktubre 2011 nga kinatibuk-ang komperensya.
Paghulagway sa litrato pinaagi ni David Winters
Ang paghinulsol halapad nga hilisgutan, apan gusto kong mohisgut og lima lamang ka aspeto niining mahinungdanong baruganan sa ebanghelyo nga akong gilauman nga makatabang.
Una, ang pagdapit nga maghinulsol usa ka pagpahayag sa gugma. Sa dihang ang Manluluwas “misugod sa pagwali, nga nag-ingon, Paghinulsol kamo: kay ang gingharian sa langit haduol na” (Mateo 4:17), kadto usa ka mensahe sa gugma, nagdapit sa tanan nga mokwalipay nga moapil Kaniya “ug motagamtam sa mga pulong sa kinabuhi nga dayon niini nga kalibutan, ug kinabuhi nga dayon [mismo] sa kalibutan nga moabut” (Moises 6:59). Kon dili kita modapit sa uban sa pag-usab o kon kita wala momando og paghinulsol sa atong kaugalingon, pakyas kita sa mahinungdanong katungdanan nga kita obligado ngadto sa usag usa ug sa atong kaugalingon.
Ikaduha, ang paghinulsol nagpasabut nga pagpaningkamot nga mausab. Mobugal-bugal kini sa pag-antus sa Manluluwas didto sa Tanaman sa Getsemani ug didto sa krus kon kita magdahum nga Iya kitang usabon ngadto sa matarung nga mga nilalang bisan walay tinud-anay nga pagpaningkamot sa atong bahin. Hinoon, kita magtinguha sa Iyang grasya nga mohingpit ug moganti sa atong labing makugihon nga mga paningkamot (tan-awa sa 2 Nephi 25: 23). Ang tinuod nga paghinulsol, tinuod nga kausaban mahimong magkinahanglan og balik-balik nga pagsulay, apan adunay butang nga makapalunsay ug makapabalaan niana nga paningkamot.
Ikatulo, ang paghinulsol nagpasabut nga dili lamang pagbiya sa sala apan usab pagpasalig nga magmasulundon. Ang Bible Dictionary namahayag, “Ang paghinulsol nagpasabut nga pagkausab sa kasingkasing ug kabubut-on padulong sa Dios, [ingon man usab] pagsalikway sa sala diin sa kasagaran kita mahiligon” (“Paghinulsol”). Sa atong pagdangup sa Ginoo aron makompleto ang paghinulsol, kinahanglang naglakip kini og wala nay lain pa kondili ang pakigsaad sa pagkamasulundon ngadto Kaniya.
Ikaupat, ang paghinulsol nagkinahanglan og tinuoray nga katuyoan ug kaandam sa pagpadayon, bisan sa mga kasakit. Ang mga pagsulay sa paghimog listahan sa piho nga mga lakang sa paghinulsol mahimong makatabang sa uban, apan mahimo usab kining mosangpot ngadto sa paagi nga wala sa hunahuna, listahan lang sa mga lakang sa paghimo nga walay tinuod nga pagbati o kausaban. Ang tinuod nga paghinulsol dili taphaw lang. Ang Ginoo mihatag og duha ka mahinungdanong kinahanglanon, “Pinaagi niini kamo masayud kon ang usa ka tawo naghinulsol sa iyang mga sala—tan-awa, siya mokumpisal kanila ug mobiya kanila” (D&P 58:43).
Ikalima, bisan unsa pa ka sakit ang paghinulsol, kini matabunan sa hingpit nga kalipay sa pagpasaylo.
Ako mapasalamatong moila ug mopamatuod nga ang dili matukib nga pag-antus, kamatayon ug Pagkabanhaw sa atong Ginoo “mopahinabo sa mga kasabutan sa paghinulsol” (Helaman 14:18). Ang balaang gasa sa paghinulsol mao ang yawe sa kalipay niining kinabuhia ug human niini. Sa mga pulong sa Manluluwas ug sa dakong pagpaubos ug gugma, ako modapit sa tanan sa “paghinulsol: kay ang gingharian sa langit haduol na” (Mateo 4:17). Nasayud ko nga sa pagdawat niini nga pagdapit, makakaplag kamo og hingpit nga kalipay karon ug sa kahangturan.