Atong Luna
Ang Atong Katuyoan dinhi sa Yuta
Atol sa values-education nga bulan sa akong eskwelahan, ang among magtutudlo mihangyo kanamo sa pagsulat og essay nga giulohan og “Nganong ania ako dinhi?” Kinahanglan nga 10-paragraph kini nga essay kabahin sa atong katuyoan sa kinabuhi. Samtang nagbasa ko sa hilisgutan diha sa pisara, ang akong kasingkasing napuno sa kahupayan ug kalipay. Isip usa ka miyembro sa Simbahan, nahibalo ako sa akong katuyoan isip usa ka anak nga babaye sa Dios sa daghan na nga katuigan. Apan samtang ako nagtan-aw sa mga nawong sa akong mga klasmeyt, ang akong kasingkasing napuno sa kasubo. Ngano man? Tungod kay sila misugod sa pagbagulbol kalabut sa kalisud sa hilisgutan. Wala silay sama nga kahibalo sa akoa.
Sa dihang akong gisumiter ang akong essay, akong naamguhan nga bulahan ko kaayo nga nahimong sakop sa usa ka tinuod nga Simbahan. Gikan nianang adlawa, ang akong tinguha nga moserbisyo og misyon ug mopakigbahin sa akong pagpamatuod sa ebanghelyo ni Jesukristo nalig-on.
Ako nasayud nga ang Langitnong Amahan nahigugma kanako ug gusto nga makauban ko Niya sa umaabut nga adlaw. Ako usab nasayud nga akong katuyoan ang pagserbisyo sa uban.
Jaymee A., Philippines
Sa Unsang Paagi ang Basahon ni Mormon Nakatabang Kanako
Ang Basahon ni Mormon nagdasig kanato sa matag higayon nga kita nagkinahanglan og mga tubag sa mga pangutana o kon kinahanglan kitang mobati nga mas duol sa Espiritu sa Ginoo. Kini naglangkob sa mga panagna nga nadawat niadtong kinsa gipili sa Amahan tungod kay sila matinud-anon ug matarung. Gikan niini nga basahon kita makaangkon og dugang nga kaalam kabahin sa ebanghelyo, ug atong makita nga ang Ginoo kanunay nga dili mausab.
Ang Basahon ni Mormon nagtabang kanato karon tungod kay ang mga tawo sa nangagi adunay mga kalisdanan nga susama sa mga kalisdanan nga atong giatubang karon, gikan sa mga problema sa pamilya ngadto sa mga impluwensya sa ubang mga tawo. Ang ilang mga ehemplo makahatag kanato og kalig-on ug tinguha nga magpadayon sa hugot nga pagtuo ug pagkamatarung nga dili mawad-an og kadasig. Sama kanato, kadtong karaan nga mga katawhan misinati og lain-laing mga pagsulay apan nagmalampuson tungod kay ang kaaway wala makabuntog kanila. Kini naghatag kanato og dugang tinguha nga magpabiling lig-on ug dili matarug diha sa ebanghelyo ni Jesukristo.
Caroline M., São Paulo, Brazil
Pagserbisyo kon Asa Kita Paserbisyuhon
Sa wala pa ang pagpahinungod sa San Salvador El Salvador Temple, ang akong pamilya ug ako nakahukom nga moserbisyo sa open house ug motabang niadtong dili mga miyembro nga masayud sa ebanghelyo ni Jesukristo samtang sila mibisita sa templo. Gi-assign ko isip usa ka giya ug mosulti sa mga tawo mahitungod sa kada kwarto sa templo, sa sagrado nga mga pakigsaad nga atong gihimo didto, ug sa unsang paagi ang atong mga kinabuhi mausab kon kita motuman niadto nga mga pakigsaad.
Ang akong turno miabut, ug misugod ko sa akong paglibut. Bag-o lang ko nga nakagawas sa kwarto sa dihang adunay mihangyo og dugang nga giya tungod sa usa ka dako nga grupo nga bag-o lang miabut. Gipabalik ko ngadto sa greeting room aron adunay laing grupo nga i-assign kanako.
Sa dihang miabut ko sa kwarto, gihangyo na usab ko nga usbon ang akong assignment ug ipakita ang video sa mga tawo nga mao pa ang pag-abut sa templo. Naguol ko nga dili ko makahimo sa pagpakig-istorya sa mga tawo ug mosulti kanila kabahin sa templo.
Paglabay sa mga tunga sa oras, usa ka grupo gikan sa Estados Unidos miabut kinsa dili makasulti og Spanish. Pipila ka mga boluntaryo ang nagdali-dali pagpangita og tawo nga makasulti og Iningles ug makagiya niini nga grupo. Diha nako nasabtan nga ang Ginoo mopadala kanato ko asa Siya nanginahanglan nato, dili kon asa kita gustong moadto. Ako lang ang kamao mogamit sa video ug mohatag sa mga pulong sa pag-welcome sa Iningles. Nalipay ang mga Amerikano ug sa ilang pagbiya, ila kong gipasalamatan sa mainiton nakong pag-abi-abi kanila.
Sa pagtapos sa adlaw, mapasalamaton ko sa Ginoo sa pagpakita kanako nga kon kita mobuhat sa mga butang sa paagi nga Siya nag-aghat kanato, kita mobati og katagbawan sa atong buhat.
Erick A., El Salvador