Ang Akong Gikinahanglan aron Makat-on

Michael Hendricks, Wyoming, USA

Human sa akong unang tuig sa pagtuon sa unibersidad, akong gisugdan ang usa ka proyekto aron mas masabtan pa ang Biblia. Nakahukom ko sa pagtuon sa mga pagtulun-an sa pipila ka mga relihiyusong mga grupo nga akong nadunggan nga dili mga Kristiyano ug dayon itandi kini ngadto sa mga pagtulun-an sa Biblia.

Sa pagsugod sa sunod nga semester, gisugdan nako ang pagtuon sa Ang Simbahan ni Jesukristo sa mga Santos sa Ulahing mga Adlaw. Usa sa akong mga klase nagkinahanglan og mga buluhaton sa laboratoryo uban sa usa ka partner, ug ako nag-ampo nga dunay tawo diin ako makakat-on sa unsay gikinahanglan nakong makat-unan.

Mipili ko og lingkuranan sa lab, ug pagkataud-taud ang usa ka estudyante miduol ug nangutana kon aduna na ba koy partner. Siya nagpaila sa iyang kaugalingon nga si Lincoln. Wala ko mahinumdom nga nakakita niya sa eskwelahan sa miaging tuig ug nangutana kon mibalhin ba siya.

“Sa pagkatinuod,” siya miingon, “Mao pay akong pag-abut gikan sa pagserbisyo isip misyonaryo sa Ang Simbahan ni Jesukristo sa mga Santos sa Ulahing mga Adlaw.”

Akong giingnan si Lincoln nga nagsugod ko sa pagtuon sa iyang simbahan ug adunay pipila ka mga pangutana. Malipayon siyang miuyon sa pagtubag niini.

Sa misunod nga tulo ka bulan, nangutana ko kabahin sa Basahon ni Mormon, mga templo, mga propeta sa ulahing mga adlaw, ug bag-ong pagpadayag. Bisan tuod og daghan na ko og nakat-unan niining higayuna, naghunahuna gihapon ko nga ang mga Mormon dili mga Kristiyano.

Usa ka katapusan sa semana ang among eskwelahan napildi sa usa ka dakong dula. Pipila ka mga magtutudlo diha sa lab kusganong naghisgut sa kapildihan, nagbalik-balik sa pagpasipala sa pangalan sa Ginoo. Si Lincoln miduol sa mga magtutudlo ug namalihug nila nga ilang hunongon palihug ang paglitok sa pangalan ni Jesukristo nianang paagiha.

“Nakahasol ba gayud na nimo?” madudahon silang nangutana.

“Oo,” tubag ni Lincoln. “Si Jesukristo akong suod nga higala.”

Nianang higayona, ang akong imbestigasyon sa Simbahan nausab gikan sa makinaadmanon nga paggamit ngadto sa pangutana sa hugot nga pagtuo. Kon kining relihiyon kapahimo og katawhan nga sama niini, Kristiyano kini sa tanang paagi.

Samtang si Lincoln ug ako mibiya nianang gabhiuna, nangutana ko kon makatambong ba ko sa simbahan niya sa ubang higayon. Human og adto sa simbahan, mihangyo ko niya nga hatagan ko og kopya sa Basahon ni Mormon ug kon mahimo ba kong makighimamat sa mga misyonaryo.

Sulod sa duha ka tuig nag-investigate ko sa Simbahan ug migahin og panahon uban sa mga miyembro niini. Nakita nako ang makanunayon nga sumbanan sa tim-os nga mga lalaki ug mga babaye nga makugihong naningkamot aron mamahimong mga disipulo sa Magtutudlo. Sa makadaghang okasyon ang Espiritu Santo mikumpirmar kanako nga si Jesukristo, kinsa kanunay nakong gipaningkamutan nga maserbisyuhan sa labing maayo, sa tinuod mipahiuli sa Iyang Simbahan sa atong panahon. Kini gidumala sa mga propeta ug mga apostoles ug Siya direkta nga nangulo niini.

Nabunyagan ako ug karon nakatagamtam og labaw pa sa dinosina nga katuigan sa mga panalangin gikan sa gipahiuli nga ebanghelyo ug sa mga pagtulun-an niini. Mapasalamaton kaayo ko nga ang Langitnong Amahan mitubag sa akong pag-ampo nga makakita og usa ka partner sa lab kinsa makatabang nako nga makakat-on sa unsay gikinahanglan nakong makat-unan.