Dili Iya sa Kalibutan

Ang pagbarug isip usa ka miyembro sa Simbahan ni Kristo mahimong lisud sa kalibutan karon, apan kita mahimong ania sa kalibutan apan dili maimpluwensyahan niini.

Naghunahuna ba kamo kon asa nagagikan ang pagpahayag nga “anaa sa kalibutan apan dili iya sa kalibutan”? Kini labaw pa kaysa usa lang ka motto o inantigo nga paggamit sa mga preposisyon—tinud-anay kini nga gikan kang Jesukristo.

Hunahunaa ang gabii sa wala pa ang Iyang Paglansang sa Krus. Siya nakigkita sa Iyang mga Apostoles, mihugas sa ilang mga tiil, mitudlo kanila, ug nangalagad sa sakrament. Usa ka higayon panahon sa kagabhion, Siya nag-ampo og kusog ngadto sa Iyang Amahan alang sa mga Apostoles:

“Dili ako mangamuyo nga kuhaon mo sila gikan sa kalibutan, kondili hinoon nga imo unta silang ilikay gikan niadtong dautan.

“Sila dili iya sa kalibutan, maingon nga ako dili iya sa kalibutan. …

“Maingon nga gipadala mo ako sa kalibutan, maingon man usab gipadala ko sila sa kalibutan” (Juan 17:15–16, 18).

Ang Manluluwas Mismo migahin sa Iyang tibuok kinabuhi nga anaa sa kalibutan apan dili iya sa kalibutan. Gitintal siya, apan wala Siya magpadala sa tintasyon. Milikay siya dautan. Nakig-uban Siya sa mga disipulo ug sa mga tumutuo ingon man usab sa mga makasasala ug tigpakaaron-ingnon. Usa siya ka ehemplo ngadto sa tanan.

Apan Siya wala lamang mobiya sa Iyang mga tinun-an og usa ka bagis nga, “Kon gibuhat ko kini, makahimo kamo niini.” Hinoon, Siya maloloy-on. Siya nag-ampo aron tabangan sila sa Amahan. Apan Siya wala mag-ampo aron ang mga hagit kuhaon gikan kanila. Atol sa Iyang kinabuhi dinhi sa yuta ug pinaagi sa Iyang mga modernong propeta ug mga apostoles, ang Manluluwas mitudlo nga importante alang kanato nga mahimong impluwensya alang sa kaayohan sa kalibutan.

Ang kabatan-onan sa tibuok kalibutan kanunayng nag-atubang og mga hagit samtang anaa sila sa eskwelahan, nakig-uban sa mga higala, ug nag-apil sa ekstrakurikular nga mga kalihokan. Apan uban sa Manluluwas sa ilang kiliran ug sa ebanghelyo sa ilang mga kasingkasing, nakakaplag sila og mga paagi nga malikay ang ilang mga kaugalingon sa pagkakalibutanon. Basaha giunsa sa pipila kanila pagpili sa pagsunod sa ehemplo sa Manluluwas.

Magmatinguhaong Moapil

A Young woman holding open scriptures. She is looking up and smiling.

Sa dihang ako nag-atubang og tintasyon, mangutana ko sa akong kaugalingon, “Unsa ang buhaton ni Jesus?” o “Kini mas makapaduol ba kanako ngadto sa celestial nga gingharian?” Motambong ko sa seminary kada buntag bisan kon gikapoy ko og maayo, tungod kay kana nagtabang kanako nga molambo sa espirituhanong paagi. Ang pagbasa sa akong mga kasulatan, uban sa katuyoan nga makakat-on og bag-ong butang o usa ka butang nga makatabang kanako nga mahimong mas maayo nga tawo, usa ka tinubdan sa giya nga makatabang kanako. Kon kita mobalaan sa adlaw nga Igpapahulay ug motambong sa atong mga kalihokan, mas makabuntog kita ni Satanas. Kon kita matinguhaon nga moapil uban sa Ginoo, Siya makatabang kanato sa tanang lisud nga sitwasyon nga atong masinati.

Brenda H., 17, Minnesota, USA

Pagkuha og Kalig-on gikan sa Uban

Social interaction

Ako motuman sa akong mga sumbanan pinaagi sa pag-apil sa mga kalihokan uban sa akong mga higala sa simbahan. Siyempre akong dapiton ang akong dili miyembro nga mga higala ngadto sa mga kalihokan aron sila makakita ug makasabut nganong gusto ko nga mosunod niini nga mga sumbanan. Ang akong mga ginikanan ug akong magulang nga lalaki maayong mga ehemplo ngari kanako. Ako adunay daghang maayo nga mga higala kinsa dili sakop sa Simbahan nga maayo usab nga mga ehemplo ngari kanako. Sila adunay daghang nindot nga mga kinaiya nga gusto nakong mapalambo sa akong kaugalingon.

Celina W., 15, Germany

Pagsulti

Sa Denmark kini gikonsiderar nga lahi kon kamo moadto sa simbahan, dili moinom, ug dunay taas nga mga sumbanan. Apan nasinati nako nga kon kamo dili maulaw nga mosulti kabahin sa mga mithi nga inyong gibarugan, dali kamong makaangkon og pagtahud gikan sa inyong mga kaedad. Akong nakita nga ang mga tawo naghunahuna nga nindot kon ang uban moatiman sa ilang mga kaugalingon niana nga paagi.

Emma K., 18, Denmark

Ipadan-ag ang Inyong Kahayag

Young men playing rugby.

Pipila ka tuig ang milabay ang akong team sa rugby miapil sa usa ka tibuok semana nga tournament. Kini nagpasabut nga pito ka adlaw nga layo sa panimalay, mga ginikanan, ug mga lider sa Simbahan. Tungod kay gusto namo nga motambong og usa ka eskwelahan sa Simbahan, ang tanan sa akong team mga miyembro sa Simbahan. Hapit kada gabii niana nga semana, ang ubang mga team sa among hotel mag-party diha sa ilang mga kwarto uban sa kusog nga mga musika, pagsayaw, pag-inom, pagpanigarilyo, ug pagsinggitay og mapintas nga mga pulong sa usag usa. Ang among team nagpundok didto sa kwarto alang sa among naandan nga pagtuon sa kasulatan ug mga debosyonal sa gabii. Nindot ang bation nga mohimo sa sakto nga butang nga wala sugoa sa among mga ginikanan. Human ang ubang mga team nakaobserbar kanamo uban sa katingala, among nakuha ang ilang pagtahud. Sila maghilum kon sila nasayud nga kami adunay debosyonal sa gabii. Sila mora og interesado sa unsay among gibuhat, ug ang uban gani miapil kanamo sa pagbasa sa mga kasulatan ug pag-ampo.

Wala kami modaug sa tournament niana nga semana, apan kami midaog sa laing paagi. Nakahimo kami sa pagpadan-ag sa among kahayag, ug pinaagi sa among mga ehemplo, nakausab sa mga kasingkasing ug hunahuna.

Elisara E., 20, Samoa

Pagmamugnaon sa Pagpili sa Matarung

Elder L. Tom Perry

Kon ang mga tawo nga naglibut kanato dili sama og mga sumbanan kanato, tingali kita kinahanglang magmamugnaon sa pagpangita og mga paagi sa pakig-uban kanila samtang nagsunod kita sa atong mga sumbanan. Si Elder L. Tom Perry (1922–2015) sa Korum sa Napulog Duha ka mga Apostoles mibuhat niana sa dihang nahimutang siya sa usa ka dili komportable nga sitwasyon isip usa ka negosyante daghang katuigan na ang milabay. Ang tanan nga mga negosyante sa sosyal nga panagtigum nga iyang gitambungan nanag-inom og alkohol. Aron masayran kon unsay iyang gibuhat, makaadto ka sa LDS.org ug basaha ang iyang artikulo “Ang Tradisyon sa usa ka Balanse, Matarung nga Kinabuhi” (Liahona, Ago. 2011, 30–37).

Mga Butang nga Pamalandungon sa Dominggo

• Sa sunod higayon nga kamo mag-atubang og tintasyon, sa unsang paagi kini makatabang kaninyo nga masayud nga si Jesukristo nag-ampo ug mihangyo sa Langitnong Amahan sa “ilikay [kamo] gikan sa dautan”?

• Paghunahuna mahitungod sa kinabuhi sa Manluluwas. Unsay Iyang gibuhat atol sa Iyang panahon dinhi sa kalibutan? Sa unsang paagi nga Iyang gilikay ang iyang Kaugalingon nga mahimong iya sa kalibutan? Unsa man ang atong makat-unan gikan sa Iyang ehemplo?

• Paghunahuna og usa ka mahagiton nga “anaa sa kalibutan” nga sitwasyon nga imong giatubang. Unsa ang pipila ka mamugnaon nga mga butang nga imong mahimo sa pagbarug sa kamatuoran? Tingali mahimo nimong pangutan-on ang imong mga higala ug pamilya alang sa dugang nga mga ideya.