Bukin tera bwa ti riai ni bane raoi rabwatara iaan te ran ngkana ti a bwabetitoaki?

Ko kona n tia n iira te bwabetito are te aomata are e bwabetitoaki e a tia ni karekea te otenanti nakoina uoua te tai ibukina bwa teuanne ke neienne e a tia n aki tebo rabwatana ni kabane inanon te ran n te moan tai. Ibukina bwa te bwabetito bon te otenanti ni kamaiu, e bon riai bwa e na karaoaki raoi ao n eti raoi.

Te bwabetito bon te mwakuri ni kanikinaa. E “kanikinaea te mate, te taunaki ao te manga uti, ao e tii kona ni karaoaki n te kateboaki” (Bible Dictionary, “Baptism”). Te nako aan te ran e tei ibukin maten ao taunakin Iesu Kristo, ma e tei naba ibukin maten rabwatara aei (taraa I Rom 6:3–6). Ngke ti kawaerakeaki riki man te ran bon kanikinaean Mangautin Iesu Kristo ao e tei ibukin manga bungiakira bwa Ana reirei aika beritanaki. Uoman taan kakoaua ake a tei irarikin te tabo ni bwabetito n taraia ni kakoaua bwa te aomata are e bwabetitoaki e tebo rabwatana ni kabane, kanikinaean te manga bungiaki ae bwanin.

Ngkana ti bwabetitoaki, ti iira te baeten are e karaoia te Tia Kamaiu, are e bwabetitoaki ni kateboaki inanon te karaanga are Ioretan (taraa Mataio 3:13–17). Tamara are i Karawa e tangiria ibukiia natina n tatabemaniia nako bwa a na kaitiakaki man aia bure bwa a na kona ni maeka ma Ngaia riki. Ni bwabetitoaki n te kateboaki, n ai aron are e karaoia Kristo, bon te mwakoro ae riai ibukin Ana babaaire n atua.