Te Ekaretia e Kakaea Rongorongoia Bwaeoniia ni Boong Aikai
Ngkana membwa n te Ekaretia a iangoia bwaeoniia, a tataneiai n iangoia te koraki ake a mwananga nako maeaon te United States man te booti ke n rianna inanon te 19 n tienture.
Mwaitiia a aki ataia bwa boni ngaia bwaeoniia ni boong aikai.
Te Church History Department e bon kakaaia ngkai rongorogoia bwaeoniia ni boong aikai. Ngkai te tabo ni mwakuri aio e butimwaai ni kabane rongorongo ake a kanakoaki ma irouia aomata, ai moara riki n rongorongoia ake a rairaki, aomata ake a maeka n te tabo are e kateaki iai te tembora ae boou ke e a tia ni kateaki, mitinare a mwakuri n aia mition ae boou, ao te koraki ake a maiuakinii reirein te euangkerio inanon maiuia ngkai a aki maeka ma Aomata aika bati aika Itiaki ni Boong ni Kaitira.
“Rongorongoia n tabemaniia e kona ni buokiia te koraki ake a kona n tia n rinanon te taneiai ae ti te arona ke ni maeka n ti te arona ke te tai ae ti teuana,” e taku Brad Westwood, manatia n te tabo are tabe ma karekean bwaai inanon te Church History Department.
Rongorongon te aomata e kona ni kaonaki n rongorongon rimoa teutana ao a mwakorokoro, n ai aron ururing man te mwakuri ni mitinare, oin am taneiai ngkai te karo, ke karaki aika onoti n irekereke ma te bwai ae riki, e taku te Tari Westwood.
“Ti kakoaua bwa natin te Atua ni kabane ti te arona aroia n Ana taratara. E taku Tarira ae Westwood. Iai ni kabane ara karaki ae kakaawaki are ti na karakinna—ti bane n rinanon te kataaki n te aonaaba aio, ao ti ataia bwa rongorongora e buoka katean te kakoaua.”
Tebubua te ririki ma ngkai, e taku Tarira Westwood, temanna ae akea rekootin rongorongon ana utu teuanne ke neienne e na kona ni wareka rongorongom ao n taku, “Aingaia aio aron te tia rairaki.”
Ngkai aomata a reiakin taekaia aia koraki ke bwaeoniia ake tabeman—n ikotaki ma te kaiangatoa ake a kaaitarai, te reirei are a reiakin ao te wanawana are a karekea—a kona ni kunea te reirei ao te ibuobuoki ibukin maiuia.
Ngkana e kanakoaki te rongorongoro nakon te raaiburari, e karinaki n te kataroke ao e katauraoaki nakoia taan roko n nooria ao ni warekiia. Koroboki ke booki a kawakinaki inanon ana tabo n tangoboki ibukin rongorongon rimoa te Ekaretia n te tabo are e tianaki iai mwaitorona, bwa e na kateimatoa kaawakinana.
Te Tari Westwood e anga ana taeka n reirei nakoia te koraki ake a iangoa kanakoan rongorongoia nakon te Church History Library:
Koreia bwa e na warekaki iroun te botanaomata. E ngae ngke taearii ao tienoro a kona n riki bwa taabo ake a reke iai rongorongo aika kamiimi, a bon riki n taainako bwa ibukin bwaai aika riki ni katoabong ao iango aika onoti ake aikoa tau ibukin te botanaomata. N tabetai a kona ni karekea te kangaanga nakon maiuia tabeman aika raba. Ngkana rongorongo a karinaki iai bwaai are a na kona ni kabuakakaa aran temanna ae raoiroi, a na butimwaeaki ma a na aki kaotaki nakoia aomata.
Korei karaki ni mwakorokoro ao ake ana rereitaki. N taainako, kataia ni moanna ma am ururing ake ngkoa ngke te ataei ngkoe ao ni karin bwaai ni kabane ni karokoa ngkai e kona ni kabwaraa te nano. Moanna ma teuana te karaki n te taina. Ibukin te katooto, moanna ni koreia tii ibukin am mwakuri ni mitinare. Ngkana e a tia, waaki nakon iteran maium are kaokoro.
Kamanenai rongorongo ake bon aomata ake a korei rongorongoia. Ngkana iai am reta, kaewea ke karinna inanon te boki. Ngkana iai am tamnei, karinna. Ngkana ko kamanena te rongorongo man te boki ae onoti, karaoa rongorongona. Tikuraebunibooki a kona n iai bonganaia n rongorongon rimoa. E ngae n anne, te koraki ake a karaoi tikuraebuniboki a aki anga koroboki ke ni korei taekan bwaai ake a riki inanon te tamnei, e taku Tari Westwood. E anga ana kario iaon anaakin tabeua te miniti ni korea te bwai are e riki n te tamnei ake a karinaki inanon te tikuraebuniboki.
Marooro ao intawiu ma tabeman. “Ti iangoia n taainako bwa oin rongorongora bon oin ara taratara, ma taraakina riki are ko rinnako inanona, rawawatana e na rikirake,” e taku te Tari Westwood. Intawinakiia tabeman aomata e na karekea te taratara ae e boou ao e na kona ni buokiko ni katamaroa rongorongom.
Koroboki ibukin te taneiai n te tamnei, taii aika a rangi ni kakaawaki, ao koaua aika kakaawaki, aomata, ao bwaai aika riki. “Aomata a tangira te karaki ae e kakaongoraa,” e taku Tari Westwood. Korea te bwai are ko a tia n rinanona mai moana, nuukana, ao tokina. “Tai kabanea 60 te iteraniba iaon maium ae uoua am ririki. Ko na bon bae n aki koreia, ao aomata a na aki warekia.”
Koroboki ibukin te bwai are ko tatangiria. Tari Westwood e kaota ana iango bwa n onea mwiin are ko na karinanna n teina are e riki iai, ko kona ni koreia n te boto ni iango ke n oin iango ake ko nano iai.
A rangi ni kakaawaki, membwa a riai n aki anga oin rongorongoia ke rongorongon te utu nakon te Ekaretia n aki tibwatibwaia moa imarenan te utu, ngkai e riai ni kakorakora te utu are e roko ma iai.
Tari Westwood e kakoaua bwa te koraki ake a kabanea aia tai n rawei rongorongoia, ni korei rongorongo aika kokoaua ibukin taai ni kangaanga ao aika tamaroa, a na kona n noora bain te Uea inanon maiuia ao ni katuka te rongorongo ao te ururing ake a na kakorakoraia utu ao tabeman membwa n te Ekaretia.
Ngkana ngkoe te bwaeoniia ni boong aikai ao ko tangiria ni kan tibwaua te bwai are ko atia n rinanona, kanakoa am rongorongo nakon te Church History Department.
Ko kona ni kanakoa ke ni meerina am rongorongo nakon: Church History Library, 15 East North Temple Street, Salt Lake City, UT 84150-1600, USA, Attention: Acquisitions.
Nikirakiia n te bai a kona ni karaoaki imarenan 9:00 a.m. nakon 5:00 p.m., Moanibong nakon Kanimabong.
Ko kona naba n imeeri am rongorongo nakon ChurchHistoryAcquisitions@ldschurch.org ke tareboonia te Church History Acquisition tareboon tienta n 1-801-240-5696.
Te birim ae uarereke iaon maiun Joseph Millett, ae e kona n reke n te taetae n Imatang i news.lds.org, e karakina te rongorongo ae na karikirakea te onimaki are e tauraoi ni boong aikai ibukina bwa e kaawakinaki rinanon rongorongoia aomata.
E raweaki man te tikuriin man ana witeo Joseph Millett
Rongorongoia aomata e kona ni buokiia tabeman ni kakorakora aia onimaki.
© 2006 David Stoker