Rongorongo Man Te Moan Beretitentii
Tariu, I Kabaeaki
Uoman taari aika uoman a tei iaon te tabuki ae uarereke are e kaitaraa ranin te nei ae buruu n itiaki. Aio te tabo ae rangin ni kinaaki ibukin te tebo, ao taari aikai aki toki n taetae ibukin karaoan kibaia—te bwai ae a tia ni karaoia aomata.
E ngae ngke ngaia uoman a tangiria ni karaoa te kiba, akea maibuakoia e tangiria ni karaoia moa. Rietan te tabuki e aki rangin n rietaata, ma irouia ataeinimwaane aikai, e taraa n ae e rikirake raroana n te tai are a nang kiba iai—ao nanoia e waekoa ni kerikaaki.
N tokina, temanna te tari e katuka waena i mataniwiin te tabuki ao ni mwaing ni karaurau ni waerake. N te tai anne tarina e kanimomoi, “Tao ti na tataningaa te tiamwa are imwiina.”
Te korakora are e na anga te moan tari, bon, katikana ni waerake. “Tariu,” e kaeka, “I kabaeaki!”
E bwaka inanon te ran ao e waekoa n otirake ao n takarua ma te kukurei. Te kauoman n tari e irianako. Imwiina, a uaia ni ngareakina ana kabanea n taeka te moan ataeinimwaane imwaain ae bwaka inanon te ran: “Tariu, I Kabaeaki.”
Te kabaeaki kanga ti tebo ma te tebo inanon te ran. E ngae ngke ko kabaeaki ke ko aki. E ngae ngke ko waaki rake ke ko tei n aki kakamwakuri. Akea te itera ni kawai. Ti bane ni kaitara ma kangangan te iango are e bita maiura ake imwiina. Ngkai ngaira kaain te Ekaretia, ti riai n titirakiniira, “I kona n tebo inanona ke n na ti tei imataniwiin te tabuki? N na toua te mwaneka ni waerake ke n na ti tuoa kabuebuen te ran n au kau?”
Tabeua buure a riki bukina bwa ti karaoa te bwai ae bure; buure ake tabeua a riki bukina bwa akea te bwai ae ti karaoia. Kabanean riki ara tai nakon te euangkerio e kona ni karika te nanobuaka, te aki kukurei, ao te kairua. E aki riai n reke aei nakoira bukina bwa ngaira aomata ni berita. Ti karaoi berita ma te Uea ngke ti bwabetitoaki ao ngke ti rin n ana auti te Uea. Mwaane a karaoi berita ma te Uea ngke a katabuaki nakon te nakoanibonga. Akea te bwai ae kona ni kakawaki riki nakon kawakinan te kabaeaki are ti a tia ni karaoia ma te Uea. Ti na uringa ana kaeka Rakera ao Reea nakon Iakobwa n te O Tetemanti. E boni bebete ao man mataata ao e kaota kabaeakiia: “Bwa ane E tuangko te Atua ao ko na karaoia” (Karikani Bwaai 31:16).
Naake a uarereke katabeaia a kona ni kantaninga ti reken kakabwaia n te kakoaua, kimwareirei, ao te rau. Mataroan karawa e na taraa n ae e na ti kaukaki teutana nakoia. Ko aki burababa ngkana ko iangoia ni kangai, “N na kabanea au tai 50 te betienti ngkai, ma ngkana e kaoti Kristo n te Kauaoki, n na katabeai 100 te betienti”?
Kabaeakira nakon ara berita ma te Uea bon mwiin ara maroro. Kabaeakira nakon te Tia Kamaiu ao Ana Ekaretia e karikirakea kateira ao ni kakorakorai tamneira bwa ngkana ti kaitibo ma Kristo, E na kamoamoaira ao ni kangai, “E raoiroi, te toro ae ko raoiroi man kakaonimaki” (Mataio 25:21).
Iai te kaokoro imarenan te nano ao te bwai ae ko karaoia. Naake a ti iangoia bwa ana kabaeaki a na karekei aia anga n tainako. Naake a bon kabaeaki ma te koaua a na akea aia kanganga ma aia kakaewenako ao ni kangai nakoia, “Eng, anne bukina ae tamaroa ibukin rimwiina, ma I a tia ni karaoi taian kabaebae, ngaia are n na karaoa are I a tia ni kabaeaki nako iai bwa n na karaoia.” A kamatebwai booki aika tabu ao n ukokora ana kairiiri Tamaia are i Karawa. A kariaia ao a kakorakorai aia wewete n te Ekaretia. A kaei aia boowi. A karaoi aia reirei n te mweenga ao te kakawari n reirei.
E taku te tia rabakau mai Tiaman, “Berita kanga aiaron namwakaina ae bwanin. Ngkana aki waekoa ni kawakinaki, a mauna n te bong teuana ma teuana.” Ngkai ngaira kaain Ana Ekaretia Iesu Kristo ibukiia Aika Itiaki ni Boong Aika Kaitira, ti kabaeaki bwa ti na nakonako ni kawaia taan reirei. Ti a tia ni kabaeaki bwa ti na irii ana katotoo ara Tia Kamaiu. Iangoia bwa e na kanga te aonaaba ni kakabwaiakaki ao ni bitaki ibukin te raoiroi ngkana membwa ni kabane n Ana Ekaretia te Uea a maiuakina aia konabwai ni koaua—n rairaki ma nanoia ae korakora ao ni kabaeaki ibukin katean abanuean te Atua.
Ni kawai tabeua, ngaira n tatabemaniira nako ti mena n te iango are ti taraa te ran. Bon au tataro bwa ti na karekea te onimaki, waaki rake, kaitarai maakura ao raraomara ma te korakora, ao ni kangai nakoira, “I’kabaeaki!”
Kabwarabwaraakin te tamnei Bjorn Thorkleson
Kabwarabwaraakin te tamnei iroun Steve Kropp.