Beeku n te Ekaretia
Wewete iroun te Atua
I reiakina te bwai ae e kananonaaki ni “weteaki iroun te Atua, man taetae ni burabeti, ao man te katokabai irouia ake iai te kariaiakaki” (Taekan te Onimaki 1:5).
Ngai ma kainnabau ti a tibwa mwaing nakon te kaawa ae e boou ao ti kukurei n ira ara uoote ae boou. Tia tibwa kunea bwa tian ara uoote e a tia ni bitaki, ao ea tibwauaki te uoote.
Imwiin te taromauri n ara kauoua n Tabati, te kiraaka n ara uoote e anganiira ana tai bwa e na kaitibo ma ngaira ma te bitiobi ae e boou n tairikin te Kauabong. Imwiin kaitiboora ae kimototo, te bitiobi e tuanga kainabau ana kariaia bwa e na weteai bwa te beretitenti n te Buraimwarii n te uoote ae boou. Imwina ao e kanakoa te wewete nakoiu. I bon tounako, ma I a tia n tuangaki bwa n naaki katibanakoa te wewete ngaia are I a kukurei ni karaoa au kabane n tamaroa.
Te bitiobi e anganai rinanin aara ao e tuangai bwa nna kaitibo ma ngaia inanon uoua te bong ma araia au kauntira ao te tia koroboki. I namakina te rawawata. Ngke tia roko ni mwengara, I rokanai inanon te roki man tang. Imwina ao I kaoti bwaai mai inanou nakon Tamau are i Karawa, ni kaotii au raraoma ibukin weteakiu ae boou. I aki kina temanna n ara uoote ae boou, ao I kainnanoa Ana Ibuobuoki. Ngke e moti au tataro, I namakina te raunnano.
Te ingabong are imwiina I tataro ao imwiina I waaki ni karaoi au mwakuri ake I tataneiai iai ni mwengau. Te rinan n ara are e anganai bitiobi e toka n taiboran te umwanikuuka, ao I tii taraia n te tai are I rirarikina. Imwiin tarakina tabeua te tai, uoua aara aika a tebenako imatau. I tabeka te rinan n ara ao ni warekii. Ngke I atongii ara, te namakin ae kakukurei e rootai. I tuai man namakina te Tamnei ae Raoiroi ae korakora.
I waekoa n reitaki ma Tamau are i Karawa n te tataro, rannimata a waanako iaon tabau ngke I atongi riki aara. Bon akea au atatai irouia aine aikai, ma I ataia I nanou bwa a na riki bwa au kauntira.
Imwiina riki n te tairiki anne, I atongii riki aara n au iango. Te ara teuana e roko n au iango n te tai are I noori aara. E na riki bwa au tia koroboki.
I kaitibo ma au bitiobi n te bong are imwiina ao I anganna aara ibukin au kauntira ao au tia koroboki. I mimii bwa bon aine aikai are e taku te bitiobi n ana iango bwa a na nakoraoi n te Buraimwarii. Ngke I nako n taromauri n te Tabati, ana kauntira te bitiobiriki e tei itinanikun te umwantabu ma ngai, ni kotea au kauntira ao au tia koroboki ngke a roko. Ngke I taraia aine aikai, I namakinna bwa I a tia ni kinaia mai imwaina. Te Tamnei e manga kamatoa riki nakoiu bwa aine aikai a weteaki iroun te Atua.
I ataia bwa ti kona ni uaia ni mwakuri inanon te namoraoi ni beku ibukin te Uea—ao ti bon karaoia. E ngae ngke I aki kinaia aine aikai, a bon tau ibukin weteakiia. Te Uea e ata ae e na weteia. Te namakin tera irou n ataia mai moana nanon te weteaki iroun te Atua man taetaet ni burabeti.
Kabwarabwaraan tamnei iroun Ruth Sipus