Ti Taekina Kristo
Mooi ma Nanom ni Koaua n te Ran ae Maiu
“Ma ane mooi n te ran ae N na anganna ao e na bon aki manga taka” (Ioane 4:14).
Au mwakuri e kairai nakon bootaki ni kabuta te aonaaba ake aki kona iai aomata ni karekea te ran ae itiaki. Ara kurubu a mwakuri ma te tautaeka inanoa ma kaaina ni katauraoa reken te ran ae itiaki, ae reke iai te maiu kanga taian mwanibwa ke te kawai are e reke mai iai te ran mai aantano ke man bwakan te karau.
Karikirake n te ran aikai a karekea raoiroin tamaroan te maiu. Te marurung e rikirake ibukina bwa te ran ae boou e kauarerekea reken te bekanako, korera, ao aoraki riki tabeua ake a riki man te ran. E rikirake naba kaubwain te aba bukina bwa kaaro ao ataei ake a kabanea aia tai ni uouota te ran a kona ngkai ni karekei aia mwakuri ao aia reirei. Riki ni kaawa aika a korakora mani kakaokoro iai kanganga, aomata aki toki n taekinna bwa te ran ae itiaki bon te bwai ae a tangiria riki.
Te Tia Kamaiu e kabanea angiin ana mwakuri n te aonaaba n taai ao n taabo ake aomata a onimakina te mwanibwa ibukin te ran. Ngke E reireina te aine n te mwanibwa n taekina ae kangai “ao ane e mooi n te ran ae N na anganna ao e na bon aki manga taka” (Ioane 4:14), E reireiniira naba ae Ana euangkerio e katoka naba takara—n akea tokina—kainnanora ae rangin ni kakawaki? I kakoaua anne.
N na teimatoa ni kakaitau nakon te aine i Kenya, Africa, are e reireinai taekan te nano ni kani mwakuri ni karekea te ran. I kaitibo ma neienne n te bootaki teuana ibukin katekeraoan te mwanibwa n ana kaawa. E tuangai ma te kukurei bwa te mwanibwa ae boou aei e na kaakea mwamwanangana ni katoabong n te raroa ae ruaiwa te maire (14 km) ni karekea te ran nakon teuana te maire (1.6 km). E korakora kukureina n te bwai ae nang riki bwa ana bwai.
I aki kona ni buokia ma n iangoia bwa e na kanga aron au namakin ngkana N na nakonako 1.6 kiromita ni karekea te ran. I rangin ni kakaitau bwa e katikui bwaai ni kabane—man te mwakuri n te auti nakon te mwakuri n te onaroka—ngke e karaoa mwanangana n nako ni karekea te ran. E ataia bwa e aki kona ni katiai mwakuri ake tabeua n akean te ran arei. Iangoia bwa aekakira aron rawawatana. Uotakin te ran e tangira te korakora ao te aki bwarannano. E ngae n anne, ibukin ana utu, e kukurei n nakonako ruaiwa te maire ni katoabong ni karekea.
I mimi ngkana ngaira ake ti karekea te ran ae itiaki man mweengara n tabetai ti kantaningaia bwa ti na nakon Kristo ma te mwakuri ae bebete n ti minota te taebu ni karekea te ran n te kiraati. Ke ti tauraoi ni katikui mwakuri riki ake tabeua, riki aika kakawaki, ni ukoukoria ni kinaa Iesu Kristo ao Tamana?
I ataia bwa te mwanibwa n ran ae maiu are e a tia n anganiira te Tia Kamaiu e aki kona n ora ao e itiaki man kateimatoa te maiu. Ngkana ti Nakoina ma te mwangko ae akea kanoana, E na kanoaia, are e a bon riaon ara kona ni karekea. Ngaia raoi bon te ran ae maiu, kanikinaean ana tangira te Atua.
Tera te Ran ae Maiu?
-
Te ran ae maiu bon ana euangkerio Iesu Kristo.
-
“Te raanga n ran ae maiu … bon kanikinaean ana tangira te Atua” (1 Nibwaai 11:25).
-
Te ran ae maiu e kona n anganiira te “maiu are akea tokina” (Ioane 4:14; D&C 63:23).
E reirei te Tia Kamaiu, “Bwa ane e mooi n te ran ae N na anganna ao e na bon aki manga taka; ma te ran ae N na anganna ao bon te mwanibwa n ran inanona ae koburake nako nanon te maiu are aki toki” (Iaone 4:14).
The Well of Life, iroun Robert T. Barrett, e na aki kona ni kaobinaki