Ara Tabo
Maamaten Nanou N Te Koroboki ae Tabu
Te kibu aio e a tia n riki n taainako bwa te tia kaawakinai ao ni kairai n taainako n te tai are I nanououa, n rawaawata, ke ni mena n te aro ae kaangaanga. E a tia n riki bwa au kibu ae I taatangiria man te tai are I a tia n titiraki bwa bukin tera ngkai e na riai te kaaitara. Bukin tera e na iai te kauntaba? Bukin tera te maiu e aki tii na raraoi, kakukurei, beebete, ao n tamaroa? Bukin tera te buakaka iai?
Te kibu aio e buokai n ataa te maiu ao kaangaangana. E buokai ni kakaaitau riki nanon te maiu. E karaoai bwa N na kinaa nanon te kaaitara ao bwa N na riai ni kakaaitau ibukina. Bwa n akeana, ti na aki ataa raoi kakaawakin ao tamaroan te maiu. N akean te kaaitara, ti na a aki ataia bwa ti na kanga n tangira, ti na kanga ni kukurei, ke ti na kanga n tokanikai. I a tia n reireinai n tangira te maiu ao ni butimwaia ni bon arona ao n onimakina te Uea ibukin wanawanana aika ti aki kona ni kaekai.
Sheena P., Philippines
Ti na Kanga ni Karekei Iango Aika Itiaki
E ngae ngke iango aika buakaka a roko nakoira, ti aki kariaia riniia inanon ara iango n aki totokoi. Te tai ae te kabanea n tamaroa ni kamanoira ni kaaitara te kariiri bon ngkana te iango e a moanna ni karekea rabwatana; urua te koraa, ao te aroka e na a aki bwebwerake. Ngkana I reke n te aro aio, I anenea kunan te taromauri are mamaten nanou ao ni kataia ni karekea taraan Iesu inanou ni karokoa ae I kona n totokoia. Ngkana ti teimatoa n totokoi iango aika buakaka, a na nako.
Jorge G., Venezuela
I rawea te tamnei aei i Thessaloníki, Greece. E kauringai n te bubu n nang ae roo inanon miin Riaai (taraa 1 Nibwaai 8:22–24).
Kevin K., Germany
Kamaataata n te booki iroun Gene Christiansen; kamaataata n te autin taura ni kaota iroun Scott Greer