Man Karaoan Bwaai aika Uarereke
N au iango I taku bwa e raoiroi au waaki. I a tia ni karaoa nakoau ni mitinare, e reke au beeba man te reirei ae rietata, e reke au mwakuri ae bwanin au tai iai, ao ni kabaneana e reke au auti are I a maeka iai n tiingai. I kaakaea te taromauri ni katoa Taabati ao n tabetai I nako ni kaea te bootaki ni kakukurei. E rawata raraou, aika a tuai iein ao aika a tia, ao n te tai ae karina e a reke riki au tai ni wareware, maamaten nanou ngke te ataei ngai. E ngae n anne ma waaki aikai ni kabane, I bon namakina naba te bua.
N Aramwa mwakoro 37, ti wareka ana reirei Aramwa nakon natina te mwaane ae Ereman. Inanon kiibu aika 41–42, Aramwa e taekina rongorongon Riaai ma ana utu ao te Riaona. E kabwarabwaraa bwa te Riaona e na aki mwakuri ngke arona “bwa a taningaroti, ao ni mwaninga ni kammwakura aia onimaki ao aia mwakuri korakora” ao n aki rikirake inanon mwanangaia; ai ngaia, are a tiku inanon te rereua, ke a aki mwananga n te kawai ae eti.” Warekan taian kibu aikai e buokai ni kinaa bwa I aki rikirake. I aki kammwakura au onimaki ke n riki mwakuri korakora ni bwaai nako inanon maiu. I a tia n toki ni mwakuri nakon au kouru. I a bon tii tataninga te bwai ae na riki.
Akea te tai teuana ae e reke irou ae onoti ngke N na karaoia ibukin bwaai ni kabane ake I tangirii ni bitii. Ma, bitaki akanne a roko teutana imwiin teutana. Te moan, I a moanna n uti mwaaka ao n nako ni biri ke ni karaoi aekaki tebeua ni kamaruurung. Imwiina, I a moanna n tarai burokuraem n te reirei ake a na kona ni buokai ni karikirakeai n au mwakuri ke ni kariaiai bwa ni karekea teuana ae e okoro. I kunea te burokuraem ao ni kabanea au tai ni katauraoai ni karaoi ukeuke aika riai ibukin karekean te mwakuri. Kamatebwaian booki aika tabu ao te tataro a rikirake ni kakaawaki nakoiu, ao I kataia ni kabanea au tai ni katoabong ni kakukureiai n ana taeka Kristo ao n ukoukora onamakinan te Tamnei. I karaoa te kekeiaki ae onoti bwa N na reitaki riki ma au uoote—e ngae ngkana N na anga bon oin au tai.
Ma n te tai are I karaoi bitaki aika uarereke aikai, I a tia n namakina te kukurei riki. I namakinna bwa I a tabe n rikirake ao Tamau are i Karawa e bon anganganai kakaawenako aika boou. I kona ni kaaitarai kakaewenako akanne ma te kantaninga nakon are te maaku ke te bwarannano. I a tia n reirei bwa ngkana ti katoka ara mwakuri ke kammwakuran ara onimaki ao ni mwaing n te kawai, Tamara are i Karawa e aki kona ni buokiira n rikirake ao ti na a aki roko n ara tabo are tina nako iai. I rangi ni kakaaitau ibukin bitaki aika uarereke inanon maiu ake a buokai n noora kawaiu imwaaiu.