Fesili & Tali

“E lagona lava le tuua na o a’u i le lotu. E faapefea ona ou aoao ia lagona lo’u aofia ai?”

A o e taumafai e saili ma le agaga tatalo se tali i lau fesili, ia manatua lenei aoaoga mai tusitusiga paia: pe a tatou auai i le Ekalesia, “e le toe tagata ese outou, po o e ua aumau, a ua nuu faatasi ma le au paia” (Efeso 2:19). O lona uiga e tatau ona tatou fefaauoai ma tagata uma i le lotu. O i tatou uma o fanau a le Atua o loo taumafai e tapuai atu ia te Ia i le alofa ma le lotogatasi.

O nisi nei o auala ina ia lagona le faaaofia ai:

Ia faamasani atu i tagata i vaitausaga uma. Mo se faataitaiga, i le sauniga faamanatuga, e mafai ona e nofo i talaane o se tina nofofua ma se fanau laiti. Atonu e na te fiafia i le fesoasoani. Pe mafai foi ona e faafeiloaia ma faamasani atu i tagata fou i lau uarota po o paranesi. Pe a o mai le au ta’i 12 tausaga i Alii Talavou po o Tamaitai Talavou, e mafai ona outou nonofo faatasi. E ese le manaia o le i ai o ni uo o lau lava tupulaga, ae pe a e aapa atu i isi e ese o latou tausaga ma mea e fiafia ai, o le a sili atu ou avanoa e atiina ae ai le tulaga o le faauo.

Auai i gaoioiga a lau uarota po o paranesi. E faigata le alu na o oe, ae o le a e faia ai ni uo i le auai atu. Nonofo faatasi ma se tasi o loo nofo na o ia. Faatalofa i ai ma fesili atu i ai e uiga i mea e fiafia i ai. Masalo o se amataga lena o se faauoga lelei.

Auai

I le tele o masina ua mavae atu na ou tuua ai lo’u atunuu ae alu atu i se atunuu na o lo’u uso ma lana uo tama na ou iloa. I le lotu sa ou lagona le pei o se tagata ese. Ua mavae atu le lua pe tolu masina, ae o loo o’u lagonaina pea le lagona lava lea e tasi pe ana ou le filifili e ataata atu i isi ma fesili atu i ai, “O a mai oe?” O Aso Sa taitasi e mavae atu, ua sili atu upu latou te tautala mai ai ia te au nai lo faaupuga faigofie “Lea ou te manuia.” Na fesoasoani foi le auai atu i le seminare ma le Mutuale ma le galue ai i le polokalama o Le Alualu i Luma o le Tagata Lava Ia faatasi ai ma isi tamaitai talavou. O lea la ua ou lagona le fiafia i le lotu, e pei lava o loo i lo’u aiga.

Vanessa B., 17 tausaga, La Vega, Dominican Republic

Faamasani Atu i Isi

Sa ia te au se faafitauli faapea i le tele o tausaga. O lea sa ou filifili ai o le a ou taumafai ina ia avea ma se tasi o i latou ma faaali atu i tagata lo’u tagata moni. I le taimi lava na ou talanoa atu ai ia i latou, na latou talanoa mai ai foi ia te au, ma na avea lea tulaga ma se faatagaga e fausia ai se faauoga malosi i tagata uma o la’u korama.

MacCoy S., 17 tausaga, Iuta, ISA

Fesoasoani i Isi

Ia manatua o tagata uma o fanau a le Tama Faalelagi. Taumafai e ataata ma faauo i tagata uma. Fesoasoani i isi. Aapa atu ia i latou o e lagonaina foi le tuuatoatasi. Pe a ou auauna atu i isi, ou te lagonaina le olioli ma e ou te le lagonaina le tuuatoatasi. E matua tatau lava le auai atu i le seminare po o le inisitituti. Tatou te lagona le mafanafana ma le lelei iina. Aua le fefe e faasoa atu ou faafitauli po o popolega. O i tatou uma o uso ma tuafafine, ma e tutusa uma lava o tatou faafitauli ma tofotofoga.

Igor P., 19 tausaga, Kyiv, Ukraine

Fai ni Uo i Isi Vaitausaga

Ua sili atu le lelei o a matou faauoga ma tagata ma taitai i le tupulaga laiti, nai lo i latou i la’u tupulaga. Ou te iloa o le a i ai se aso o le a e faauo atu ai ia i latou e i le Ekalesia, ma afai e leai, e le afaina aua o le a e aoao pea lava i punaoa a le Ekalesia.

Susanna Z., 18 tausaga, Kalefonia, ISA

Amata le Talanoaga

I le tele o tausaga ua mavae atu na siitia ese ai lo matou aiga. O nai vaiaso muamua lava na ou auai atu ai i le lotu ma le Mutuale, na ou lagonaina le tuuatoatasi. Peitai sa ou tatalo i aso uma ina ia faia ni a’u uo fou ma lagona le avea ma se tasi o la’u uarota fou. Na auaua’i mai lo’u alofa ma lo’u fiafia i lenei uarota. E tatau ona avea au ma se tasi e uunaia le faauoga. E tatau ona ou amataina le talanoaga. E tatau ona ou auai atoa i vasega ma faalogo i mea e fai mai ai isi. Faatasi ai ma le fesoasoani a le Tama Faalelagi, ua mafana nei la matou faauoga ma tagata ou te le’i mafaufauina e faauo i ai.

Leah V., 16 tausaga, Colorado, ISA

Faauo ma Ou Taitai

Na ou lagonaina le tuuatoatasi i le lotu mo le tele o masina. Na ou fiafia i sauniga ma gaoioiga, ae ou te le’i lagona matou te tutusa ma isi teneiti. Ona amata loa lea ona ou talatalanoa atili i o’u taitai nai lo le mea sa ou masani ai. O le malie ia o o’u taitai. Ina ua amata ona talatalanoa ia i latou, na amata ona ou lagonaina le avea ma se vaega o le polokalama ma ua maua ni a’u uo i le Mutuale.

Kimberly G., 14 tausaga, Arisona, ISA

Tatalo ina ia Maua ni Uo Lelei

Ou te fesili ia te au lava ia i taimi o gaoioiga a le Ekalesia, “Aisea e leai ai ni a’u uo?” Sa ou lagona le faanoanoa ma le tuuatoatasi ma ou alu atu ai i le Atua i le tatalo. Na ou aioi atu i le Tama Faalelagi e auina mai ni a’u uo lelei. E le’i faigofie, ae i le aluga o taimi ua ou faia ai le tele o ni uo maoae. Ou te le o toe fefe e talanoa ma fegalegaleai ma ni vaega o teineiti. Ua ou iloa ua taliina e le Tama Faalelagi a’u tatalo ma e le o tuua lava na o a’u.

Daiana I., 16 tausaga, Corrientes, Atenitina

Saili le Faauoga

Ina ua ou faatoa ulufale atu lava i Tamaitai Talavou, sa ou lagona le tuuatoatasi aua ua tuua a’u uo i le vasega a le Valiana. Ae peitai, sa ou taumafai e lagolago i tamaitai talavou, ma sa latou lagolagoina foi a’u, ma mafai ai ona maua ni a’u uo fou ma fesootai ma i latou. Ou te le toe lagona le tuuatoatasi, ma ua ou fiafia ai lava. Ua avea nei a’u ma peresitene o le Ofagapi, ma e a ou vaai i se uso fou o lē e le o maua se lagona lelei e faatasi ai ma i matou, ou te talanoa ia te ia, faamalamalama i ai mea matou te faia i le vasega, ma faaaofia o ia ina ia lagona le avea o ia ma se vaega o i matou.

Gredy G., 14 tausaga, Lima, Peru

O tali ua faamoemoe e mo se fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

Foai Atu i Isi i le Alofa ma le Auauna Atu

Elder Robert D. Hales

“O le lagona tuuatoatasi i le malo o le Atua e masani o se tulaga faaāunuua e faia e le tagata lava ia.

“Matou te faamoemoe ia tofu lagona e outou taitoatasi le tulaga manaomia e soofatasi ai ma le aiga faale-uarota po o le faale-paranesi ma faaaoga a outou meaalofa ma taleni tulaga ese e pa’i atu ai i olaga o o tatou uso ma tuafafine uma. O avanoa tatou te maua e tausia ai ma faaaumea i le uarota po o le paranesi e leai se tuaoi pe afai tatou te naunau e tuuina atu i tatou lava i le alofa ma le auaunaga.

Elder Robert D. Hales o le Korama a Aposetolo e Toasefululua, “O Le Avea ma se Vaega o le Aiga Faale-Uarota,” Liahona, Mat. 1999, 12.

O Le Isi Fesili

“Ua tetea o’u matua. O nisi o taimi ou te maua ai se fautuaga ma le tasi o i laua ma e feteenai ma le fautuaga mai le isi. O le a le mea ou te faia?”

Auina mai lau tali a o lei oo i le aso 15 o Mati, 2011, i le:

Liahona, Questions & Answers 3/11

50 E. North Temple St., Rm.2420

Salt Lake City, UT 84150-0024, USA

Po o le i-meli: [e-mail]

E ono faapupuuina tali mo le uumi po o le manino.

O le faamatalaga ma le faatagaga o loo i lalo e tatau ona aofia mai i lau i-meli po o le tusi: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e itiiti ifo i le 18 ou tausaga, o le faatagaga tusitusia a ou matua (e talia foi le i-meli) e lolomiina ai lau tali ma lou ata.