O Le Mea Tatou Te Talitonu I Ai

O Le Togiola ua Mafai Ai Ona Salamo

Ua tatou o mai i le lalolagi mo le faamoemoe ia tatou tuputupu ae ma alualu i luma. E telegese lo tatou alualu i luma pe a tatou agasala. Vagana ai lava Iesu Keriso, le na soifua i se soifuaga atoatoa, a o tagata uma lava na ola i le lalolagi ua agasala (tagai i le Failauga 7:20; Roma 3:23; 1 Ioane 1:8).

O le agasala o le solia lea o poloaiga a le Atua. O nisi taimi tatou te agasala i le faia lea o se mea ua tatou iloa e sese, ae o nisi taimi tatou te agasala i le le faia lea o le mea ua tatou iloa e sa’o (tagai i le Iakopo 4:17).

O poloaiga uma mai le Atua e faamanuiaina ai i tatou pe afai tatou te usitai i ai (tagai i le MFF 130:20–21). Ae peitai, afai tatou te solia, e i ai se faasalaga e oo mai ai (tagai i le Alema 42:22). O lenei faasafuaina atu o faamanuiaga po o faasalaga ua faaigoaina o le faamasinoga tonu.

Ona e alofa le Tama Faalelagi ia i tatou, o lea ua Ia faia ai ina ia mafai ona tatou salamo: ia ta’uta’u atu ma lafoai a tatou agasala ona mafai ai lea ona manumalo i o latou aafiaga faapitoa. Na Ia auina mai Lona Alo e Toatasi na Fanaua, o Iesu Keriso, e puapuagatia mo a tatou agasala. O lona uiga, na totogi e Iesu le sala na manaomia e le tulafono o le faamasinoga tonu mo le solia o poloaiga a le Atua. Ona sa puapuagatia le Faaola mo a tatou agasala, o le a tatou le puapuagatia ai i le faasalaga atoa mo na soligatulafono pe afai tatou te salamo (tagai MFF 19:16). O Lana Togiola “ua faamalie ai poloaiga a le faamasinoga” (Mosaea 15:9), ma faatagaina ai le alofa tunoa o le Tama Faalelagi ina ia faamagaloina i tatou ma taofia ai le faasalaga.

O le salamo o le meaalofa lea a le Atua mo i tatou. E manaomia mo lo tatou fiafia i lenei olaga. O le salamo o le a mafai ai ona tatou toe mama, ma mafai ai ona tatou toe foi atu i lo tatou Tama Faalelagi (tagai i le Mose 6:57).

O le faagasologa o le salamo e aofia ai mea nei:

• Ia i ai le faatuatua i lo tatou Tama Faalelagi ma Iesu Keriso (tagai i le Alema 34:17).

• Ia iloa a tatou agasala ma lagona le faanoanoa (tagai i leLuka 16:15; Alema 42:29–30).

• Ta’uta’u atu a tatou agasala i le Tama Faalelagi ma, afai e manaomia, ta’uta’u i lo tatou epikopo po o le peresitene o le paranesi (tagai i le MFF 61:2).

• Lafoai a tatou agasala (tagai i le MFF 58:43).

• Ia toe totogi pe a mafai (tagai i le Esekielu 33:15–16).

• Faamagalo atu i isi ua agasala ia i tatou (tagai i le MFF 64:9; 3 Nifae13:14–15).

• Ola amiotonu (tagai i leMFF 1:32).

Mo nisi faamatalaga, tagai i le Mataupu Faavae o le Talalelei (2009), “Salamo,” 115–22; ma le Faamaoni i le Faatuatua (2004), “Togiola a Iesu Keriso,” 180–84; “Faamasinoga Tonu,” 50–52; “Alofa Mutimutivale,” 16–18; “Salamo,” 146–50; ma le “Agasala,” 9–10.

“O lē ua salamo i ana agasala, e faamagaloina o ia, ma o a’u, le Alii, ou te le toe manatua lava.

“Tou te iloa faapea se ua salamo i ana agasala—faauta, na te ta’uta’u atu ma lafoaia” (MFF 58:42–43).

Na totogi e Iesu Keriso le tau mo a tatou agasala i le Faatoaga i Ketesemane ma luga o le satauro. Na Ia fetalai mai e uiga i Ona puapuaga, “[O le tiga] lea na faagateteina ai au lava, o le Atua, le silisiliese i mea uma, ona o le tiga, ma na maligi ai le toto mai pu laiti uma lava o le tino, ma na tiga le tino atoa ma le agaga” (MFF 19:18).

Ata tusi na saunia e Steve Bunderson