Manatu mo Afiafi Faaleaiga

O lenei lomiga e aofia ai tusiga ma gaoioiga e mafai ona faaaoga mo afiafi faaleaiga. O ni nai faataitaiga nei.

“Aoao e Faalogo ma Malamalama i le Agaga,” i. 24; ma le “O Le Apogaleveleve ma le Leo Lemu ma le Itiiti,” i. 68: O nei tusiga ua aoao mai ai ia i tatou le taua o le usitai i musumusuga a le Agaga. A o le’i faitauina leotele se tasi o tusiga, ia fai atu i tagata o le aiga e faalogo mo auala e mafai ona latou iloa ai le Agaga. A uma ona faitau le tusiga, atonu e te fia faamatalaina se taimi sa e lagonaina ai le Agaga Paia ma valaaulia foi tagata o le aiga e faapena foi ona fai.

“Faataoto i Mea na Leiloa ma Toe Maua,” i. 32: Ina ia aoao atu i tagata o le aiga le taua o le saili mo i latou ua leiloloa faaleagaga, e mafai ona e faia se taaloga o le iga-ve’a. A uma le taaloga, ona faitau lea o se tala se tasi pe lua mai le tusiga ma faasoa atu mea ua e aoaoina e uiga i le sailia o i latou ua leiloloa. Atonu e te manao e faailoa atu tuaoi po o uo e mafai ona e faaaumeaina. Ona talanoa lea i ni auala e mafai ona e valaaulia ai i latou e toe foi mai i le Ekalesia.

“O Le Talalelei E mo Tagata Uma,” i. 54: O loo aoao mai i lenei tusiga “e leai se mamanu talafeagai mo se tagata ua faamoemoe e avea ma se tasi o le Ekalesia.” Ina ia aoao atu lenei aoaoga, ia mafaufau e fesuia’i pepa o igoa o apa meaai pe tuu le suka i totonu o le fagu masima. Valaaulia tagata o le aiga e filifili se apa meaai e taumafa ai pe tofo le “masima.” A uma le gaoioiga lenei, ona faitau lea o le tusiga a Elder Godoy. Ia mafaufau, o se aiga, ia i latou e mafai ona e faasoa atu i ai le talalelei—e oo lava ia i latou e le fetaui i ai le “mamanu talafeagai” o se tagata e mafai ona avea i le lumanai ma se tasi o le Ekalesia.

“O Le A Matou Fafaina Oe!” i. 62: E mafai ona outou faitauina o se aiga le tusiga lenei ma talanoa e uiga i se taimi na fesoasoani atu ai tagata o le aiga i isi pe maua mai foi se auaunaga. Ona mafaufau lea i auala e auauna atu ai. E mafai ona outou faatinoina la outou fuafuaga o se gaoioiga i se afiafi faaleaiga i le lumanai.