Faamolemole Auina Mai Se Tasi
Wendy Walkowiak, Iuta, ISA
Sa manaomia i le taimi o se maitaga faigata i la’u tama lona lua, lo’u inuina o ni fualaau e taofia ai le faaletonu o lo’u ma’itaga. O fualaau na faateleina ai lo’u lagona lēlava ma le faafaufau [tulou].
Na atili le lelei lea tulaga, ona sa galue lo’u toalua i le 15-itula i le aso, i se taumafaiga e tausisia le tulaga manuia ua i ai lana pisinisi fou; e le’i leva ona matou siitia atu i se aai fou; ma e 400 maila (640 km) e nonofo mamao ese atu ai o’u matua. Ou te le iloa se tasi, ma na faataotolia a’u, ma tausi se tamaitiiti. Sa ou lagona le fefe ma le tuuatoatasi.
I lenei tulaga sa ou liliu atu ai i le Tasi na ou iloa e le mafai ona tuulafoaiina a’u—o lo’u Tama Faalelagi. Sa ou tootuli ifo i autafa o lo’u moega ma tatalo, “Tama Faalelagi, ou te iloa sa ou folafola atu mo le tele o tausaga o le a ou toe foi i le lotu, ma e ou te manatu ua ou saunia nei. Ae ou te le maua le to’a e faatino ai na o a’u. Faamolemole lava pe mafai ona E auina mai se tasi e valaaulia a’u i le lotu.”
O le aso na sosoo ai na tatagi ai le logo o le faitotoa. Na ou taoto i luga o le nofoa i le potu malolo e le’i tapenaina, i o’u ofu moe ma sa lagona le faafaufau, ma o lea ou te le’i tu ai i luga e tatala le faitotoa. I ni nai minute mulimuli ane na oo mai ai ia te a’u: a e a pe a faapea o le tatagi o le faitotoa o se tali i a’u tatalo ma o loo i ai se tasi na auina mai e valaaulia a’u i le lotu?
Na ou toe foi i lo’u potu, toe tootuli, ma tatalo, “Tama Faalelagi, ou te matua faamalie atu i lo’u le tatalaina o le faitotoa. Ae afai E te auina mai se tasi e talanoa mai ia te a’u, ou te folafola atu o le a ou saunia mo i latou i le aso a taeao pe afai E te toe auina mai i latou.”
O le aso na sosoo ai na ou tu i luga, taele, ma fai o’u ofu e faatali ai se malo, ma faaaoga le aso e tapena ai lo’u fale. Ona ou faatalitali lea ma le onosai mo le toe tatagi o le logo o le faitotoa. Na tatagi. Ina ua ou tatalaina, na ou vaai i ni tamaitai se toalua o tutu i lo’u faasitepu.
“O i maua o au faiaoga asiasi,” o le la tala lea. “E te iloa le mea e ta’u o le faiaoga asiasi?”
“Ioe, ou te iloaina,” na ou tali atu ma le fiafia ua la toe foi mai. “Susū mai totonu.”
O se tasi o na faiaoga asiasi, o le peresitene o le Peraimeri, na amata ona tu soo mai e faamautinoa ua ou malosi. Na oo lava i le ofo mai e na te aveina la’u tama laitiiti i le lotu ma faatulaga ni asiasiga mai faifeautalai faamisiona. Na faamalosia la’u molimau e asiasiga ma aumai ai ia te au le lototele e toe foi ai i le lotu.
Ou te le talitonu na ou ola i le tele o tausaga e aunoa ma le tatalo i le Tama Faalelagi ma mauaina Lana puipuiga ma le taitaiga. O se matua faamanuiaga le mauaina o le fesoasoani a le Faaola e tauaveina a’u avega faatasi ai ma Lona alofa ma le agalelei. Ua avea au ma se tagata sili atu ona lelei ona o Lona alofa, ma ua ou lagonaina lo’u avea atili ai lava ma le tagata lea na ou i ai a o o’u auai i le lotu i lo’u talavou.
Ua faamaonia mai e le Tama Faalelagi ia te a’u e mafai mea uma ia te Ia. Pau lava le mea ua Ia poloai mai ai, ia tatou faatuatua i Lona malosi e tali mai ai a tatou tatalo.