E Le Mafai ona Faatali La’u Sefuluai
David Erland Isaksen, Nouei
I le tau faaiuiu o o’u tausaga talavou, a o amata ona ou faaaluina le taimi e faatasi ai ma faifeautalai, sa ou iloaina le taua o le i ai o se molimau i mataupu faavae e le o toe mamao ona ou aoaoina atu lea o se faifeautalai. Sa ou filifili o se tasi o mataupu faavae ou te fia malamalama atili i ai o le sefuluai.
E maua e le toatele o tagata se molimau e uiga i le sefuluai i le taimi faigata o mea tau tupe. Peitai i lo’u tuputupu ae, e masani lava ona sili atu [tupe] na ou maua nai lo le tulaga manaomia. Afai lava e i ai so’u manaoga tau tupe, e taulimaina lava e o’u matua. Sa ou faafetai mo lena tulaga, peitai e ui ina ou iloa o le a la totogiina la’u misiona, ae na ou filifili ou te fia totogiina e au lava ia le afa o la’u misiona e ala i la’u galuega le tumau o se faiaoga.
Pe a ma le taimi lava lea e tasi, sa ou iloaina ai ou te le’i totogiina atoa se sefuluai 10 pasene mai la’u siaki mulimuli. Na ou filifili loa i la’u siaki o le a sosoo ai, o le a ou totogiina ai le eseesega ina ia avea ai a’u ma se tagata e totogi atoa le sefuluai.
Peitai, ina ua totogiina a’u mo se masina, na laitiiti ifo le aofai nai lo le mea na ou faamoemoeina. O le galuega sa ou faia e fesuisuia’i, o lea sa eseese ai lo’u totogi mai lea masina i lea masina. Na vave na ou iloaina o le a le mafai ona totogi au aitalafu i la’u siaki ma faatagaina a’u e totogi le paleni o le tupe o le sefuluai na ou aitalafu ai i le Alii mai la’u siaki lea ua te’a.
Sa ou mafaufau i a’u filifiliga ona manatu ai lea, “O le a taumafai pea ia e faatumu le sefuluai i le masina e sosoo ai.” Ae na ou manatua ai lea o se lesona faalelotu a le inisitituti i le sefuluai. Na faapitoa lava ona ou manatua le mea na fetalai mai ai le Alii i le Feagaiga Tuai: “Tofotofo mai ia te au i lenei mea” (Malaki 3:10). O se avanoa lenei mo au e tuu ai i le suega lenei mataupu faavae ma ina ia maua ai se molimau malosi atu o mea o le a le o toe mamao ona ou aoaoina atu lea i isi.
Ina ua totogi la’u sefuluai, sa lelei o’u lagona e uiga i le faatumuina. Peitai o le avanoa e “tofotofo” ai i le Alii na oo mai i le aso tonu lava na sosoo ai—ua sili atu ona vave oo mai ma e sili atu le maoae o le auala na i lo le mea sa ou mafaufauina—ina ua ofo mai se galuega tumau ia te a’u e avea ma se faiaoga o le vasega tau amata. O le a mafai ona ou galue seia oo atu lava i le taimi ou te alu ai i la’u misiona, ma o le tupe o le a ou mauaina o le a sili atu nai lo mea na ou manaomia e totogi ai le afa o tupe e manaomia i la’u misiona. O lenei faamanuiaga na matua iloa gofie ai lava le faateleina o la’u molimau i le sefuluai. Na toe faamalosia pea lava pea lena molimau a o ou faasoaina atu i tagata na ou auauna atu i ai i le Misiona a Siamani Munich/Oseteria i le lua tausaga na sosoo ai.
Ou te iloa e moni le mataupu faavae o le sefuluai ma e “toina [ia i tatou] pupuni o le lagi” e le Alii “ma sasaa mai le manuia ina seia silisili ona tele” (Malaki 3:10).