E Na Te Le’i Tuulafoaiina Lava Au
Ina ua ou liliu mai i le Ekalesia i le 1990, sa faaaumeaina au e ni aiga lelei, na maua so’u valaauga, ma sa lagona le taliaina o a’u. Ae, i se tausaga mulimuli ane, ina ua ou siitia atu i se uarota fou, sa amata ona ou faapeapea atu. Na ou le toe lotu ma amata ona ou tafao faamasani i se alii e le auai i le Ekalesia.
Sa ou talitonu pea e moni le Ekalesia. Sa na o lo’u mafaufau lava ou te le o toe agavaa. Ona tofia lea o Kathy e avea ma ou’ faiaoga asiasi.
Sa valaau mai Kathy i masina uma mo ni nai masina muamua e faatulaga se taimi o se feiloaiga. Ona e tele lava ina ou ‘alo mai ana asiasiga, o lea na ia amata ai ona lafo mai ia te au le Savali a Faiaoga Asiasi. O masina uma e taunuu mai ai le savali e pei o se tulaga e masani lelei ai. Na tumau pea lea tulaga mo le fa tausaga, e oo lava ina ua uma ona ma faaipoipo ma la’u uo ma maua se ma fanau e toalua.
O nisi o masina ou te tia’ia ai le savali e aunoa ma le faitauina; o isi masina ou te faitau i ai ona tia’i lea. Ona oo lea i se tasi aso, ua tia’i a’u e lo’u toalua. Ina ua ou iloa ua na o a’u ma se tamaitiiti laitiiti ma se pepe e tausia toatasi, na vave ai lava ona ou manaomia ni tali. Ina ua toe taunuu mai le Savali a Faiaoga Asiasi faalemasina, sa tonu loa ou te toe alu i le lotu mo se taimi muamua talu mai le tele o tausaga.
Sa ou lagonaina le maasiasi, sa pei o tusia a’u agasala uma i le lima o lo’u ofu. Sa faafeiloai a’u e se uso na ou masani i ai mai le polokalama a le autalavou matutua nofofua, ma na matou nonofo faatasi. Na faafuasei lava ona sau Kathy. Sa ou tilotilo ese, ma le mā ona ou te le’i taliina se tasi o ana tusi agalelei. Na ataata mai o ia ia te au, talatalanoa ma lo’u tuaoi mo sina taimi, ona nonofo lea ma lona toalua.
Ina ua ou taunuu i le fale mai le galuega i le aso na sosoo ai, sa i ai se savali i le masini tali telefoni mai ia Kathy. Na le mafai ona ou toe valaau ia te ia. Na ou iloa lava o loo ia fia ta’u maia ia te a’u le le tatau ona ou toe alu i le lotu, ua matua maoae tele a’u agasala. Sa le’i lelei la’u faalogoga i le tau ta’u mai e Kathy o lenei savali ia te a’u, ae na ou iloa e sa’o. Sa leai so’u nofoaga faatasi ma le au amiotonu. Na le mafai ona ou toe valaau ia te ia, ae o le afiafi na sosoo ai na ia toe valaau mai ai ia te a’u.
“Ou te fia faatoese atu,” o lana tala lea.
Aisea na tau faatoese mai ai Kathy ia te a’u?
“Ou te le’i iloaina oe ina ua ou vaai ia te oe i le lotu i le Aso Sa,” o lana tala mai lea. “Ina ua uma le sauniga faamanatuga, sa ou fesili i le uso na lua nonofo faatasi po o ai oe. O le taimi lena ua leva ona e alu. Oka se manaia i le toe vaai atu ia te oe.”
Sa ou le magagana.
“Talosia e mafai ona tatou nonofo faatasi i le isi taimi e te sau ai i le lotu,” o le faaopoopo mai lea a Kathy.
“Ou te fia mana’o ai,” o la’u tala lea, ma faafuasei lava ona ufitia i se lagona faagaeetia.
Na matou nonofo faatasi i le Aso Sa na sosoo ai—ma, mo le tele o Aso Sa mulimuli ane. Sa avea o ia ma uunaiga ia te a’u ina ia avea o se tina sili atu, o se tagata o le Ekalesia sili atu, ma se faiaoga asiasi sili atu. E na te faalogo pea lava pea ma le onosai, e aunoa ma le faamasino atu, e pei lava ona ou lagonaina e faapena le Faaola.
Na saofai Kathy i o’u autafa i le aso na maua ai o’u faaeega paia ma le aso na ou faaipoipo atu ai i lo’u toalua fou i le malumalu. Sa faaauau pea ona avea o ia ma o’u faiaoga asiasi seia oo i le taimi na matou siitia ese ai mai le eria. O ana auaunaga na faamanuiaina ai lo’u aiga i auala ou te mautinoa e na te le’i mafaufauina—ona e na te le’i tuulafoaiina lava a’u.