O Le Apogaleveleve ma le Leo Lemu, ma le Itiiti
“O le leo itiiti ma le malie lava ia, e peiseai o se musumusu” (Helamana 5:30).
Faafetai mo le valaauliaina o a’u, Jake,” o le tala lea a Britton a o ia alu ese mai le fale o lana uo. “E tatau ona ou alu i le fale i le taimi lenei mo le ’aiga o le aoauli.”
Na talotalo faatofa nei uo a o agai atu Britton i le auala pefu lea e masani lava ona ia uia e alu atu ai ma toe foi mai ai mai le fale o Jake. Ona faasolo lea o lana vaai i le malae lea na te faaigoaina “o le Togavao.” E le’i i ai ni laau po o ni manu feai, na o se tamai auala e ui atu i se vaega o mutia maualuluga ma vao mamago. O se auala sili ona vave e alu ai i le fale.
Na mafaufau Britton mo sina taimi ma faatopetope ona faaofiofi atu i le va o pou o le pa o loo siomia ai le malae.
Patia! Patā! Na gapāpā laau mamago ma mutia ao taalili atu Britton i luga o le ala. Na ia lagona le pipii o lona ofutino i lona papatua i le vevela o le la. Ona oso ae lea o si tamai savili, ma fuafua ai loa Britton e taututuu ma le matagi malu i le fale.
Na faaitiitia le auala. Na iloa e Britton o loo i ai se alia i luma atu, ma sa ia tamoe tele vave ai. I le pioga mai i le tulimanu, ma o le a ia oso i le isi itu o le alia ae faafuasei loa ona faalogoina se upu Tu!
Na tu faafuasei Britton ma faalogo. Pau lava le mea na ia lagona o le uu o le mutia i le savili. Na faanunumi le muaulu o Britton. Na matua manino lava le leo ae lemu, e pei o loo musumusu mai se tasi i lona taliga. Ae e leai se tasi na vaaia.
Na faamimigi tauau o Britton ma faliu e puna i luga o le alia. Ona ia tu lea ua le minoi. I ona luma tonu lava sa iila mai ai se faamoega lapoa o se apogaleveleve e pei o se upega o loo alu i luga o le alia. I le ogatotonu o le faamoega o loo faatalitali mai ai se apogaleveleve lapoa.
Na sioa ia Britton i le apogaleveleve mo sina taimi. Ona ia toe tamoe lea i tua i le auala e alu ese mai ai i le togavao. Ma ia filifili ai e ui i le auala pefu i le fale.
“Tina! Tina! E te iloaina?” Na tamoe atu Britton i le faitotoa ma pisi e sue ia Tina. Na tau le manava o ia i le faamatalaina o lona alu atu i le Togavao, o le leo, ma le la feiloaiga faafesagai ma le apogaleveleve.
“Sa faapea lo’u latalata i ai, Tina!” Na tuu i luga ona tamai lima ma faaali atu ia te ia.
“Oka! Se taufaafefe o lena mea,” o le tala lea a Tina. “O fea na e manatu na sau ai le leo lea na e faalogoina?”
“Ou te le iloa,” o le tala lea a Britton. “E le’i i ai se isi iina. Pe e te manatu sa na o se savili?”
“E te manatua le mea na tatou aoaoina i le afiafi faaleaiga e uiga le leo lemu, ma le itiiti?” O le fesili lea a tina.
“Ioe. O le auala lena o loo talanoa mai ai le Tama Faalelagi ia i tatou, e sa’o?”
Na toso ese mai e Tina ia tusitusiga paia mai le fatatusi e sosoo ma le laulau ‘ai ma susu’e i le tusi a Helamana.
“O le auala lea na faalogoina ai e sa Nifae le siufofoga o le Alii,” o lana tala lea. “‘Ua iloa e le o le leo o le faititili, po o le leo o le pisapisao tele, a e faauta, o le leo itiiti ma le malie lava ia, e peiseai o le musumusuga’” (Helamana 5:30).
“Ei! O le mea lena na foliga i ai—o se musumusu! Sa ou faalogo i le leo lemu, ma le itiiti!”
Na ataata Tina. “Ioe, na e faalogo i ai. Ma na e faalogo e pei lava ona tatau ai. Ua ou matua mitamita lava ia te oe.”
Na fusi atu Britton ia Tina. O le mitamita o lona tina ia te ia, na lelei ai ona lagona. A o le iloaina na ia faalogo i le leo lemu, ma le itiiti na atili ai ona ia fiafia.
Ata na tusia e Craig Stapley; ata na pueina e le Busath Photography