Rosemary M. Wixom
Palesiteni Lahi ʻo e Palaimelí
ʻOku pehē ʻe Losemalia Miki Uikisomi ko e palesiteni lahi foʻou ne ʻo e Palaimelí ne toki uiuiʻí, ʻoku fie maʻu ke ʻilo ʻe he fānaú ʻa e founga ke nau lava ʻo fanongo ai ki he ngaahi fanafana ʻa e Laumālié ʻi ha māmani longoaʻa mo taʻepau.
ʻOkú ne pehē, “ ʻE lava ke maʻu ʻe he fānaú ha malu ʻi he lotú. ʻE lava ke nau ʻilo ʻoku ʻikai ke nau tuēnoa, ʻoku ʻi honau tafaʻakí ʻa e Fakamoʻuí pea ʻokú Ne ʻofa ʻiate kinautolu—neongo e ngaahi fehālaaki ʻoku nau faí.”
Ne fāʻeleʻi ia ʻi Tīsema ʻo e 1948 kia Lōpeti Ueini mo Mele Miki pea naʻá ne tupu hake ʻi Sōleki Siti, ʻIutā, ʻAmelika. ʻI heʻene tupu haké, naʻe hoko pē hono māhangá, ʻa ia ko ha taʻahine ko hono kaungāmeʻa lelei tahá pea naʻe akoʻi ia ʻe heʻene ongomātuʻá ke foaki ʻaki e loto fiefia. ʻOku pehē ʻe Sisitā Uikisomi, “Naʻá ku ongoʻi malu ʻi he taimi naʻá ma hū atu ai he matapā homau ʻapí.”
Ne tō kakano kiate ia ʻa e ongoʻi malu ko ʻení ʻi hono taʻu 12. Lolotonga haʻane tangutu ʻi ha houalotu fakamoʻoni, naʻe fakaʻohovale ʻa ʻene maʻu ha ongo ke fakamatalaʻi ʻa ʻene ongoʻi fekauʻaki mo e Fakamoʻuí. ʻOku manatu ʻa Sisitā Uikisomi ʻo pehē, “Naʻá ku tuʻu hake pea hangē ne fakafokifā pē ʻa e fonu mai ʻa ʻeku ʻofa ki he Fakamoʻuí.” Ne tokoni ki ai ʻa ʻene fineʻeikí ke mahino ki ai ko e ueʻi ia ʻa e Laumālie Māʻoniʻoní naʻá ne ongoʻí.
ʻOku pehē ʻe Sisitā Uikisomi, “Ne teʻeki ke u ongoʻi mālohi mo moʻoni pehē ʻa e Laumālie Māʻoniʻoní.” Hili ha ngaahi taʻu lahi mei ai ne ʻoange ʻe he Laumālie Māʻoniʻoní ha ongoʻi nonga lolotonga haʻane lotua ha taha ʻo ʻene fānaú. ʻOkú ne fakatauange ʻe lava ke tokoniʻi ʻa e fānaú ʻe he ngaahi mātuʻá, kau taki ʻo e Palaimelí mo e kau faiakó, ke nau lava ʻo fanongo ki he ngaahi fanafana ʻa e Laumālie Māʻoniʻoní.
Naʻe maʻu e mataʻitohi B.A. ʻo Sisitā Uikisomí ʻi he akó mei he ʻUnivēsiti ʻo ʻIutaá. Naʻá ne mali mo hono husepānití, Peleine Siakisoni Uikisomi ʻi he ʻaho 18 ʻo ʻAokosi, 1970 ʻi he Temipale Sōlekí. ʻOkú na maʻu ha fānau ʻe toko ono.
Naʻe hoko ʻa Sisitā Uikisomi ko ha mēmipa ʻo e poate lahi ʻa e Palaimelí kimuʻa pea ui ia mo hono husepānití ke na tokangaʻi ʻa e Misiona Uasingatoni D.C. Sauté. Ne ngāue ʻa Sisitā Uikisomi kimui ange ʻi he poate lahi ʻa e Kau Finemuí, pea naʻá ne kei ngāue pē ai ʻi hono uiuiʻi ia ke hoko ko e palesiteni lahi ʻo e Palaimelí.