ʻEletā Jairo Mazzagardi
ʻO e Kau Fitungofulú
ʻOku ʻiloʻi ʻe ʻEletā Sailo Masakaati ʻa e ʻuhinga ʻo e fai ha ngaahi feilaulau ʻi he ngāue maʻá e ʻEikí. ʻI he 1990, ne maʻu ai ʻe ʻEletā Masakaati ha telefoni meia Palesiteni Tōmasi S. Monisoni, ʻa ia ne hoko he taimi ko iá ko ha tokoni ʻi he Kau Palesitenisī ʻUluakí, ʻo uiuiʻi ia ke ne tokangaʻi ʻa e Misiona Salavatoa Palāsilá.
ʻOku pehē ʻe ʻEletā Masakaati, “Ne ʻikai te u teitei fakakaukau te u hoko ko ha palesiteni fakamisiona. Ko e meimei taʻu nima pē ia ʻeku hoko ko ha palesiteni fakasiteikí. Ne lahi e meʻa ke faí—pea lelei—ʻemau pisinisí. Ne pau ke tukuange ʻa e meʻa kotoa ʻo kapau te ma tali ʻa e uiuiʻi ko ʻení.”
ʻI he fakaʻosinga ʻo e telefoní, ne tuku atu ʻe Palesiteni Monisoni ha kiʻi taimi kia ʻEletā Masakaati ke fakakaukau ki he uiuiʻí. Ka naʻe ʻosi fakapapauʻi ʻe ʻEletā Masakaati mo hono uaifí ʻi ha ngaahi taʻu lahi kimuʻa e fakatapui ʻa ʻena moʻuí maʻá e ʻEikí ko ia naʻá ne tali ai ʻa e uiuiʻí he taimi pē ko iá. ʻOkú ne pehē, “Ko e hā pē e meʻa ʻoku fie maʻu ʻe he ʻEikí meiate kimauá, kuó ma mateuteu ke fai ia.”
Kimuʻa pea uiuiʻi ia ki he Kōlomu Hono Ua ʻo e Kau Fitungofulú, ne hoko ʻa ʻEletā Masakaati ko ha tokoni pīsope, aleaʻanga māʻolunga, tokoni ʻi he kau palesitenisī fakasiteikí, palesiteni fakasiteiki, fakafofonga fakavahelahi, Fitungofulu Fakaʻēlia, tokoni ʻi he kau palesitenisī ʻo e Temipale Kāmipinasi Palāsilá mo ha palesiteni ʻo e Temipale Sao Paulo Palāsilá.
Kuo fakamoleki ʻe ʻEletā Masakaati, ʻa ia ko ha tangata pisinisi ha konga ʻo ʻene ngāue maʻuʻanga moʻuí ʻi he pisinisi ʻo e kakanoʻi manú peá ne fakalele kimui ange haʻane kautaha fakatau kelekele. Naʻá ne ngāue fakakautau foki ko ha sātini ʻi he tafaʻaki meʻatau ʻa Palāsilá mei he 1965 ki he 1966. Naʻe fāʻeleʻi ia kia ʻAtonia mo Makalita Masakaati ʻi ʻEpeleli ʻo e 1947 ʻi ʻAitu, Palāsila. Naʻe tupu hake pē ai pea mo Sunitiai Palāsila. Naʻá ne fetaulaki mo hono uaifí, ʻIlisapeti ʻAieni ʻi heʻena kei īkí pea naʻá na mali ʻi Hopōkeni, Niu Seesi ʻi Siulai ʻo e 1970.
Neongo e taʻu lahi ʻa e ʻikai ke na tokanga ki he Siasí, ka ʻi heʻena foki ki Palāsilá, ne fakaafeʻi kinaua ʻe hona kaungāmeʻa ki he ʻoupeni hausi ʻo e Temipale Sao Paulo Palāsilá. Naʻá na fakatou foua ha meʻa fakalaumālie mālohi. Naʻá na papitasio ʻi he ʻaho 31 ʻo ʻOkatopa, 1978 pea silaʻi ko ha fāmili ʻi Nōvema ʻo e 1979. ʻOku ʻi ai ha fānau ʻe toko tolu ʻi he fāmili Masakātí.