ʻEletā Kevin R. Duncan
ʻO e Kau Fitungofulú
Talu mei heʻene kei siʻí mo e loto vēkeveke ʻa ʻEletā Kēvini Liti Tangikini ke hoko ko ha faifekau maʻá e ʻEikí. ʻOkú ne pehē, “Ne ʻikai ha toe veiveiua. Ne u ʻiloʻi maʻu pē naʻá ku fie ngāue fakafaifekau.”
Kimuʻa pea hoko hono taʻu 19, ne feʻiloaki ʻa ʻEletā Tangikini mo ha Taki Māʻolunga ne ngāue ʻi he Potungāue ki he Ngāue Fakafaifekaú pea naʻá ne fakatukupaaʻi ia ke ako maʻuloto e ngaahi lēsoni ngāue fakafaifekaú. Naʻá ne fakahoko e tukupā ko iá pea naʻe ui ia kumui ange ke ngāue ʻi he Misiona Silei Sanitiako Sauté. Ne fakapapauʻi ange ki ai ʻe he taimi ko ʻeni ne ngāue fakafaifekau aí ʻa ʻene ʻofa he ngāue ʻa e ʻEikí. ʻOkú ne pehē, “Naʻá ku ʻiloʻi ne u fie hoko ko ha faifekau ʻi he ʻaho kotoa pē ʻo ʻeku moʻuí.”
Ne fāʻeleʻi ʻa ʻEletā Tangikini ʻi ʻOkatopa 1960 pea ko e foha ia ʻo Tēvita Henelī mo Laline ʻIlisa Tangikini. Naʻá ne tupu hake ʻi ha faama ʻi Uesi Poini ʻi ʻIutā. ʻI heʻene tupu hake he fāmá, ne ʻikai ngata pē ʻi heʻene ako ke ngāué ka naʻá ne ako foki ke saiʻia he ngāué.
Ne tokoni e faʻahinga tui ki he mahuʻinga ʻo e ngāué ke ne maʻu ai ʻa hono mataʻitohi B.A. ʻi he tauhitohí pea mo hono M.A. ʻi he tauhitohi fakatukuhaú (accounting taxation) pea mo hono mataʻitohi toketā ʻi he laó mei he ʻUnivēsiti Pilikihami ʻIongí. Ne kamata ʻene ngāue maʻuʻanga moʻuí ʻaki ʻene hoko ko ha loea tukuhau peá ne fokotuʻu kimui ai ʻa e kautaha fekauʻaki mo hono hopoʻi ʻo e ngaahi meʻa fakatekinolosiá.
Ne mali ʻa ʻEletā Tangikini mo hono uaifí, Nanasi ʻIlisapeti Simaati ʻi he ʻaho 27 ʻo Sune 1986 ʻi he Temipale Sōlekí. ʻOkú na hoko ko ha mātuʻa ki ha fānau ʻe toko nima pea ko e toko taha ai ko e fānau mo hono ʻuluaki mali kuo mālōloó, ko Uenitī Valenitaine.
Hili ʻeni ha meimei taʻu ʻe 20 mei heʻene ngāue fakafaifekau ki Sileí, ne toe foki ʻa ʻEletā Tangikini ʻi ha ngāue tokoni faka-Siasi, ko ha faifaleʻi fakalao fakavahaʻapuleʻanga maʻá e Siasí ʻi Saute ʻAmelika. Lolotonga ʻene ʻi aí, ne ui ia ke ne tokangaʻi e Misiona Silei Sanitiako Noaté ʻo ne nofo ʻi he misiona tatau ne ngāue ai ʻi heʻene kei talavoú.
Kimuʻa pea uiuiʻi ia ki he Kōlomu ʻUluaki ʻo e Kau Fitungofulú ne hoko ʻa ʻEletā Tangikini ko ha tokoni pīsope, taki ngāue fakafaifekau fakauooti, aleaʻanga māʻolunga pea mo ha Fitungofulu Fakaʻēlia ʻi he ʻĒlia ʻIutā Sauté.