Kakato e ʻUluaki Taʻu Hongofulu ʻo e Faifatongia ʻa e Senitā Konifelenisí
Naʻe kamata ʻi he konifelenisi ʻo ʻEpelelí ʻa e kakato e fuofua taʻu ʻe hongofulu ʻo e faifatongia ʻa e Senitā Konifelenisí. ʻI he fuofua taʻu ko ʻeni ʻe hongofulú, kuo aʻusia ai ʻe ha laui miliona ha ngaahi ongo makehe ʻo e fale fisifisimuʻá ni lolotonga e ngaahi fakataha ʻe 100 tupu ʻo e konifelenisi lahí mo e ngaahi ʻekitivitī mo ha fakamafola ʻe 4,500.
Naʻe fakahoko e ʻuluaki fakataha ʻi he Senitā Konifelenisí ʻi he konifelenisi lahi ʻo e ʻaho 1 ʻEpeleli, 2000. Ne pehē ai ʻe Palesiteni Kōtoni B. Hingikelī (1910– 2008): “ ʻE hoko [ʻa e Senitā Konifelenisí] ko ha fakalahi lelei ki he koló. ʻE ʻikai ke ngata ʻi hono fai ai ʻetau ngaahi konifelenisi lahí mo ha ngaahi fakataha lotu kehe, ka ʻe toe hoko foki ia ko ha senitā fakaʻaliʻali ʻo e ngaahi meʻa fakafonua ʻa ia ʻe fakaʻaliʻali ai ʻa e tuʻukimuʻa tahá. ʻOku tau fakatauange ʻe haʻu ki heni mo e kakai ʻoku ʻikai ke nau kau ki he Siasí, pea nau maʻu ʻa e faʻahinga ongo makehe ʻo e feituʻu fakaʻofoʻofa ko ʻení, pea nau fakahoungaʻi ʻa ʻene ʻi hení.” (“Fakamoʻoniʻi ki he Māmaní Kotoa,” Liahona, Siulai 2000, 6; Ensign, May 2000, 4).
Ne fakatapui ʻe Palesiteni Hingikelī ʻa e falé ʻi ha māhina ʻe ono mei ai, ʻi he ʻaho 8 ʻo ʻOkatopá.
Talu mei ai, kuo ʻahia ʻe ha kau ʻaʻahi ʻe meimei toko fitu miliona ʻa e Senitā Konifelenisí ke nau kau atu ki he ngaahi polokalama ʻe 4,577. Kuo taki mamataʻi ha kau ʻaʻahi ʻe toko 4.8 miliona he falé, pea kuo talitali ʻe he senitaá ha kau taki ʻe toko 5,500 tupu. Kuo kau ʻi he ngaahi meʻa kuo fakahoko ʻi he holó mo e Falefaiva ʻo e Senitā Konifelenisí, ʻa e konifelenisi lahí, ngaahi fakataha lahi ʻe 10 ʻa e Kau Finemuí, ngaahi fakataha lahi ʻe 10 ʻa e Fineʻofá, ngaahi polokalama fakamanatua ʻe tolu (kau atu ki ai e meʻafakaʻeiki ʻo Palesiteni Hingikelií) mo e ngaahi fakaʻaliʻali hiva ʻe 125, ʻikai ke kau ai Hivá mo e Folofolá ʻa e Kuaea Tāpanekalé, ʻa ia kuo fakahoko tuʻo 186 ia ʻi he Senitā Konifelenisí.
Kuo kamata ke hā mei he ngaahi fika ko iá ʻa hono fakahoko ʻo e ngaahi lea ʻa Palesiteni Hingikelií.
Kuo feʻiloaki ʻa Peleni Lōpeti, ko e talēkita ʻo e ngaahi nāunau ʻi he hetikuotá, mo ha kakai tokolahi ʻi he falé kuo nau fakahaaʻi ange ʻenau houngaʻia he meʻa ne nau ongoʻi aí. Naʻá ne pehē, “Kuo nau hū mai kuo nau loʻimataʻia pea fonu honau lotó ʻi he Laumālié. ʻOku ʻikai ko e falé pē, ka—ko e ʻEikí, ko ʻEne ngāué, mo Hono Laumālié.”
Naʻe fanongonongo ʻe Palesiteni Hingikelī ʻa e senitaá ʻi he pongipongi Toetuʻú lolotonga e konifelenisi lahi ʻo ʻEpeleli 1996.
ʻOku tokoni e vakai fakalūkufua ki hono ikunaʻi e ngaahi poletaki ʻo hono langa ʻo e Senitā Konifelenisí, ke fakamoʻoniʻi ai ʻa hono makehe ʻo e tuʻunga ʻoku ʻi ai e falé. Naʻe fokotuʻu e ngaahi sea ki ha kakai ʻe 21,000 ʻi he tahifo he vahaʻa ʻo e Main Street mo e West Temple Street ʻi Sōlekí. Ne ngāue fakataha ha ngaahi kautaha langa lalahi ʻe tolu ʻi he ngāué ni. Ne nau fakapapauʻi he ʻikai ke toe ʻi ai ha ngaahi fuʻu pou ʻi he holó, ke nau fakafeʻatungiaʻi e mamata ʻa e tokotaha kotoa pē, ko ia ne ngāue ʻaki ʻe he kau langá ha ngaahi haʻinga uaea fute ʻe 290 lōloa (88 m) ʻa ia te nau lava ke pukepuke ha meʻa mamafa ʻi he vahaʻa ʻo e pāuni ʻe 250 mo e 525 ki he sikuea ʻinisi (kilokalami ʻe 17–37 ki he sikuea senitimita ). Ne kau foki heni ʻa e ngaahi palani ki he ngoue matalaʻiʻakau ʻi he ʻató. Ne ʻi ai maʻu pē ha kau ngāue ʻe meimei toko 1,000 ke nau fakahoko ha ngāue ʻi ha ʻaho pē lolotonga e ngāué.
Lolotonga e langá, ne tō ha ʻahiohio lahi taʻeʻamanekina ʻi he 1999 ʻi Sōleki Siti, ne hao pē e falé, pea neongo ne motu ha mīsini hiki meʻa mamafa ʻe taha ʻi he matangí, ka naʻe hoko atu pē e ngāué.
Ne ʻosi taimi totonu pē e langá, pea ʻoku fiefia e kau ʻaʻahi ki he senitaá ʻi he tuʻunga fakaonopooni ʻoku ʻi ai e ngaahi nāunaú. ʻOku ʻi ai foki ʻi he Senitā Konifelenisí ha nāunau fakaʻilekitulōnika ʻokú ne ʻoatu ha ʻata ʻoku toe lelei angé ki he televīsoné [digital, high-definition signal]. Ko e fuofua fakamafola fakahangatonu peheni ʻi ʻIutaá ne fakahoko atu ia mei he Senitā Konifelenisí ʻi hono kātoangaʻi e taʻu 90 ʻo Palesiteni Hingikelií ʻi Sune ʻo e 2000.
Naʻe faʻu foki ʻe he kau ʻenisiniá ha nāunau fakaongolea [sound system] ʻi he holó ke ne ʻomi ha ngaahi ongo fakaʻofoʻofa—ʻo tatau ai pē pe ʻoku fanongo e kau ʻaʻahí ki ha tokotaha lea pe mamata ki ha polokalama hiva—pea nau tokanga ʻaupito ki hono fikaʻi mo fakakaukauʻi e ngaahi nāunau ki he ngaahi holisí mo e ʻaofí, tokolahi ʻo e kakai ʻe lava ʻo hao ki lotó, mo e fakakāpetí mo hono meʻa fakamoluú.
Naʻe pehē ʻe Palesiteni Hingikelī ʻoku ʻomi ʻe he falé ha ongo fakaʻeiʻeiki. ʻOku lava ke tau mamata ki he fakaʻeiʻeiki ko iá ʻi he taimi ʻoku ʻeveʻeva ai e kau ʻaʻahí ʻi he hūʻangá, ʻa ia ʻoku ʻi ai e tā tongitongi ʻo e Fakamoʻuí mo e tā tongitongi ʻo e fofonga ʻo e kau Palesiteni ʻo e Siasí; ʻeveʻeva atu ʻi he ngaahi ngoue matalaʻiʻakau he funga falé, ʻuluʻakaú, matalaʻiʻakaú, ʻuluʻakau īkí, mo e ngaahi vaitoó; mamata hake ki ʻolunga ki he sioʻata ʻe hiva he funga falé ʻokú ne tuku mai e huelo e laʻaá, ʻa ia ʻe lava pē ke ʻufiʻufiʻi he taimi ʻoku fai ai e ngaahi fakaʻaliʻalí; pea fiefia ʻi he ngaahi tā valivali ʻi he falé, pea ʻoku maheni e tokolahi ʻo e kāingalotú mo e ngaahi meʻá ni pea meimei ko e lahi tahá ko ha tatau moʻoní.
ʻOku hā ʻi he fale lahí ni ha ngaahi sitetisitika fakamānako lahi moʻoni. ʻOkú ne tuʻu ʻi ha ʻeka ʻe 10 (4 ha), pe ko ha poloka ʻe taha ʻo ha kolo. ʻOku feʻunga hono fakauaea ʻuhila ʻo e senitaá ke ne takaiʻi tuʻo ua ʻa e māmaní. ʻOku ʻi he kālani vai ʻe 5,900 tupu (lita ʻe 22,330) ʻoku takatakai he ngaahi fauniteni mo e ngaahi halanga vaí ʻi he miniti kotoa pē.
Neongo iá, ʻoku ʻikai ko e feituʻu fakaofo taha ʻo e senitaá ʻa e lōloa ʻo hono fakauaeá pe ko e lahi ʻo e mamafa ʻoku lava ke fataki ʻe he ʻató, pe ko ha toe sitetisitika pē.
Naʻe pehē ʻe Palesiteni Hingikelī, “ ʻOku ʻikai ko ha fale ia ki ha fakaʻaliʻali ʻataʻatā pē, neongo ʻa e fisifisimuʻa hono palaní. Ko e feituʻu ia ʻe fakaʻaongaʻi ke tuku ai ʻa e lāngilangi ki he ʻOtua Mafimafí pea mo hono fakahoko ʻo ʻEne ngaahi taumuʻa taʻengatá” (“Ko e Afeʻi Taʻu Mahuʻingá Ni,” Liahona, Sānuali 2001, 82; Ensign, Nov. 2000, 67).