Na Veivakalougatataki ni Valetabu
Mai na dua na vosa ena soqoni ni lotu ena Brigham Young University ena 15 ni Noveba, 2005. Me baleta na taucoko ni vosa ena kena Vakavalagi, raica na http://speeches.byu.edu.
Na valetabu sa ikoya e dua na vale vakatabui, vanua savasava, na vanua e vakayacori kina na veisoqoni ni veivueti kei na cakacakatabu vakalotu e gadrevi meda vakarautaki keda ki na bula vakalou.
Sa ka bibi sara na edaumeni ni valetabu kivei keda yadudua me vaka ga na noda papitaiso. Sa ikoya oqo na vuna e dodonu meda vakarautaki keda kina meda savasava tiko me rawa ni da curu kina ki na valetabu ni Kalou.
Na madigi ni noda curuma na valetabu sa vakatikora vei keda na kena veiyalayalati vakalou e tiko kina ka sa dua na veivakalougatataki cecere e soli vei keda ena bula oqo. “Ni oti na noda vakatikora vei keda na veiyalayalati oqori, eda na talairawarawa ni da sa bulataka ena veisiga me ivakaraitaki ni noda vakabauta, loloma, yalodina, kei na gugumatua vakayalo meda rokova kina na Tamada Vakalomalagi kei na Luvena, o Jisu Karisito. Na noda talairawarawa ena vakarautaki keda talega meda bula vata kei Rau ena veigauna tawamudu. Sa ka bibi sara na cakacakatabu vakalotu ni veivakabulai—kei na ulu ni inaki—na yavu ni bula marau tawamudu.
Na Vunau ni Valetabu
Na valetabu sa vanua dina ga ni nomu “tiko e vuravura ka sega ni vakavuravura.” Ni ko sotava na veivakaleqai ka yaco mo vakatulewa bibi sa vakasinaita tu na nomu vakasama kei na yalomu, sa rawa mo kauta na leqaleqa kece ki na valetabu mo dusimaki mai kina vakayalo.
E dodonu me tiko na noda ivakadinadina kei na yalo veivakacegui ni valetabu sa vale ni Turaga. Ena kena gadrevi me rokovi tiko na valetabu ka sureti na Yalotabu me vakalougatataki ira era curuma yani na valetabu savasava me baleta na nodra cakacakatabu vakalotu kei na veiyalayalati, eda sa vakavulici ni sega ni dodonu me curu ki na valetabu e dua na ka sa dukadukali. Na rokovi ni loma ni valetabu sa ka bibi sara ena kena sureti na Yalotabu me mai tiko ena veiauwa yadua ena veisiga.
Niu se cauravou lailai, a kauti au mai o tamaqu mai Long Island, e New York, meu mai butuka na lomanibai ni Valetabu e Salt Lake, meu mai tara na valetabu, ka veivosakitaka na bibi ni valetabu ki na noqu bula. E kea sara ga au a vakadeitaka ena noqu vakasama ni dua na siga meu na lesu kina ka ciqoma na cakacakatabu vakalotu ni valetabu.
Ena ivola itukutuku kei vuravura, ena itabagauna yadua, a vakaroti ira na parofita na Turaga me ra na tara na valetabu me rawa kina vei ira na Nona tamata me ra ciqoma na nodra cakacakatabu vakalotu ni valetabu. E a vakalougatataki o Mosese kei ira na Isireli ni a dua na nodra valetabu veikauyaki, o ya na valecavu, na vanua e vakayacori kina na cakacakatabu vakalotu ena lawa nei Mosese ka vakayacori—ena kena gauna sa gadrevi kina, ni sa dau vosa mai na Turaga vei Mosese. A tara vakaoti o Solomoni na Tui e dua na valetabu totoka sara e Jerusalemi, e muri a qai vakarusai. A tara tale e Jerusalemi, e dua na valetabu e muri, ena gauna ni nona cakacaka vakalotu na Karisito.
Eda vulica mai na iVola i Momani ni o Nifai a tara e dua na valetabu “me vaka na valetabu ka a tara ko Solomoni” (2 Nifai 5:16). Eso tale na parofita ni Nifai, okati kina o Jekope kei Penijamini na Tui, era vakatavulici ira na tamata ena valetabu (raica Jekope 1:17; Mosaia 1:18).
Kena ivakaraitaki, ena nona tucake tale mai na mate na Turaga o Jisu Karisito a rairai kivei ira na Nifai ena G.T. 34, a lako ki na valetabu (raica 3 Nifai 11:1–11).
A vakatavulica na Parofita o Josefa Simici, “Na Lotu e se bera ni taucoko na kena tuvalaki, ena kena ituvatuva dodonu, ka na sega ni rawa, me yacova ni sa vakacavari na Valetabu, ka na vakarautaki na vanua me vakayacori kina na cakacakatabu vakalotu ni Matabete.”1
Na Valetabu e Kirtland a imatai ni valetabu ena gauna edaidai, ka vakayacora e dua na itavi bibi ena kena vakalesui tale mai na idola ni matabete. Ena saumi ni masu nei Josefa Simici, a sikovi koya o Jisu ena Valetabu e Kirtland ena ika 3 ni Epereli, 1836 (raica V&V 110). A rairai ena lagilagi na iVakabula ka ciqoma na Valetabu e Kirtland me Nona vale. Ena gauna o ya, eratou a rairai talega o Mosese, Ilaisa, kei Ilaija ni dodonu me ratou mai solia na idola ni matabete eratou taukena. A vakalesuya tale na idola ni kaukauwa ni veivauci o Ilaija, me vaka a yalataka o Malakai, me rawa ni da marautaka na taucoko ni veivakalougatataki ni valetabu ena noda bula.
O ira noda painia era vakacavara na Valetabu e Nauvoo ka vakayacora kina na cakacakatabu vakalotu. Na Valetabu e Nauvoo sa ikoya na imatai ni valetabu me vakayacori kina na edaumeni kei na veivauci, ka vakadeitaka e dua na kaukauwa cecere kivei ira na painia ena nodra vosota na dredre ni takosovi na veitokaitua ki Saioni ena Bucabuca kei Salt Lake. Era a vakalougatataki ena kaukauwa e valetabu. Era vauci vata na tagane vakawati kivei ira na watidra yalewa. Era vauci na gone kivei ira nodra itubutubu. E vuqa vei ira era sa mai yali nodra lewe ni matavuvale ena ilakolako, ia era kila ni sega ni koya o ya na kena itinitini kivei ira. Era a sa vauci ena valetabu me tawamudu. E muri, mai na ivakatakila a ciqoma o Peresitedi Brigham Young, era a tara na Yalododonu e vuqa na valetabu ena Ra.
E 130 na valetabu era sa vakayagataki tiko nikua, rawa kina vei ira na lewe ni Lotu yalodina e vuravura raraba me ra lako ki na vale ni Turaga me ra laki ciqoma kina nodra cakacakatabu vakalotu ni valetabu ka veiyalayalati kei Koya.
Na Cakacakatabu Vakalotu ni Valetabu
“Na inaki taumada ni valetabu sa ikoya me vakarautaka na cakacakatabu vakalotu e gadrevi me baleta noda bula vakalou ena matanitu vakasilesitieli. Na cakacakatabu vakalotu e dusimaki keda kivua noda iVakabula ka solia vei keda na veivakalougataki e lako mai vei keda ena Veisorovaki i Jisu Karisito. Na Valetabu sa vanua cecere duadua ni vuli e kila na tamata, e solia vei keda na kila ka kei na vuku me baleta na Buli ni vuravura. Na ivakaro ni edaumeni e veidusimaki ena dodonu ni kena liutaki vakacava noda bula ena vuravura oqo. Na ibalebale ni vosa edaumeni sa ikoya na “isolisoli.” Na cakacakatabu vakalotu oqo e okati kina eso na idusidusi ena sala ka dodonu meda bulataka kina ena savasava na veiyalayalati eda cakava ena noda vakamuria na noda iVakabula.
E dua tale na cakacakatabu vakalotu bibi sa ikoya na vauci tawamudu ena vakamau vakasilesitieli. Na veiyalayalati ni vakamau oqo e vakatarai ira na gone me ra vauci kivei ira nodra itubutubu kei ira na gone era sucu ena loma ni veiyalayalati era yaco me ra tiki ni dua na matavuvale tawamudu.
E vakatavulica vei keda na Vunau kei na Veiyalayalati: “A ka kecega ko sa vauca e vuravura, ena vauci mai lomalagi; io na ka kecega ko sa vauca e vuravura ena yacaqu me vaka na noqu ivakaro, sa kaya na Turaga, ena vauci talega mai lomalagi” (V&V 132:46).
Ena gauna erau sa tekiduru kina e dua na veiwatini ena itutu ni vakamau, me vaka ga e dua na dauveivauci au kila noqu itavi me vaka ga e dua e matataka na Turaga. Au kila ni ka e vauci e vuravura e vauci vakaivola mai lomalagi—me kakua ni voroki kevaka era yalodina tikoga o ira era vauci ka vosota me yacova na ivakataotioti.
Au vakadikeva tiko ena veiyabaki sa oti ni vuqa na veiwatini ka sa rawa me ra taura tiko na kaukauwa kei na vakabulabulataki ni vakamau ena nodra dina ki na nodra veiyalayalati era a cakava ena valetabu. O ira na veiwatini rawati ira oqo e vica na ka era duavata kina.
iMatai, o ira na veiwatini oqo era kilai ira vakayadudua se o cei o ira—era luvena tagane kei na yalewa na Kalou. Era tuva nodra lalawa tawamudu me ra bula vata tale kei na Tamada Vakalomalagi kei na Luvena, o Jisu Karisito. Era tovolea me ra biuta tani na itovo vakayago (raica Mosaia 3:19).
iKarua, era kila na ivunau kei na kena bibi na maroroi ni cakacakatabu vakalotu ni valetabu kei na veiyalayalati ni valetabu kei na kedra yaga ena kena rawati na lalawa tawamudu.
iKatolu, era digitaka me ra taura na veivakalougatataki tawamudu ni matanitu ni Kalou mai na veika sega ni tudei ka taukeni e vuravura.
iKava, o ira na veiwatini oqo era kila ni gauna era vauci kina ena gauna oqo ka tawamudu, era sa digitaka e dua na itokani tawamudu—ka sa oti na nodra siga ni veivosaki kei ira eso tale! E sega ni yaga na vakararai tale tiko!
iKalima, o ira na veiwatini oqo era veinanumi vakai ira ni bera o ira vakataki ira. Na nanumi koya vakaikoya e vakamatea na veika era vakila vakayalo. Na veitaratara vata kei na Turaga ena masumasu, erau tubu vata ka sega ni tawase. Erau dau veivosaki vata, o koya gona ena sega ni yaco na veika lalai me ka lelevu Erau dau veivosakitaka vakatotolo “na veika lalai ka dau vakavuna na mosi” ka na vakalailaitaka na veivakacudrui. Ena sala oqo, ni dau tubu na buebue ni kuroniti ka tagi yani, ena sega kina ni kacabote na vakasama ca. E vinaka cake mo kauta laivi vakalailai na katakata ni bera ni kacabote na kuro katakata. Era tu vakarau me ra soro ka kere veivosoti kevaka era vakararawataka e dua era lomana. Era vakaraitaka nodra veilomani vakataki ira ka ra veivolekati sara. Era veivakayaloqaqataki ka veivakaukauwataki vakataki ira.
Na Veivakalougatataki ni Valetabu
Na valetabu sa ikoya e dua na vale vakatabui, vanua savasava, na vanua e vakayacori kina na veisoqoni ni veivueti kei na cakacakatabu vakalotu e gadrevi me da vakarautaki keda ki na bula vakalou. E bibi sara noda rawata e dua na kila ka matua ni noda vakavakarau me da curuma na vale savasava ka vakakina ni na noda vakaitavi ena veisoqoni oqo kei na veiyalayalati sa so vei ira na veika vakaibalebale vakalevu sara eda na sotava ena noda bula e vuravura.
Eda lako mai ena ena noda lewa vakaikeda mai na mata ni Kalou na Tamada ki na veivakatovolei vakavuravura ena noda galala ni digidigi, ena noda kila ni tu vei keda na “veibasai ni ka kecega” (2 Nifai 2:11). Na noda inaki sa ikoya me da vakaiyaragi ena iyaragi kecega ni Kalou ka vorata “rawa kina na siga ca” vata kei na vakabauta me isasabai kei na iseleiwau ni Yalo Tabu (raica V&V 27:15–18), ena vosota me yacova na ivakataotioti, ka kilikili mo tucake ka bula ena mata ni Kalou na Tamada kei na Luvena, o Jisu Karisito, e veigauna tawamudu—ka rawata na ka e vakatokai na bula tawamudu.
iTaba ni Valetabu e Salt Lake mai vei Welden C. Andersen; imatau: ivakaraitaki ni itaba mai vei John Luke
O Mosese kei ira na Isireli era vakalougatataki ena dua na valetabu cavu, na valecavu, e vakayacori kina na cakacaka ni cakacakatabu vakalotu ka vakamareqeti ena ruku ni lawa i Mosese—ka vanua, ena so na gauna, na nona dau lako mai kina na Turaga me veivosaki vata kei Mosese.
Droini mai vei Ted Henninger