Papitaiso nei Bubu

Marilena Kretly Pretel Busto, São Paulo, e Brazil

Ena ika 30 ni June, 2001, au a bulia tiko na nona keke ni siganisucu na luvequ yalewa ena gauna e taqiri kina na talevoni. E qiri mai na taciqu mai Brazil, ka tukuna mai ni sa leqa na bui keirau.

E rarawataki na itukutuku, ia au sega ni rarawa. A bula tu na bui keirau me volekata yani na yabaki 102. Au marau ni sa galala mai na yagona qase, vuca oqo ka sa gole yani ki na vuravura ni yalo.

Au qai vakasamataka na kena sota vata na nona mate kei na siganisucu nei luvequ yalewa au qai vakataroga de tiko e dua na inaki ena kena yaco vata ena dua na gauna. Ni toso na gauna, au qai kila na vuna: ena rawarawa kina na noqu nanuma meu papitaiso ena vukui buqu ni oti e dua na yabaki na nona mate. Au sa mani taura kina me noqu na itavi oqo, kau kila niu na waraka ga na nona siganisucu ka tarava na luvequ yalewa.

E totolo wale na kena toso na yabaki A sega ni rawa niu lako ki na valetabu ena gauna sara ga e yabaki dua kina na nona mate na buqu, baleta niu tiko e Potukali kau dau lako ki na Valetabu e Madrid Spain. Ia e sega ni dua na siga meu sega ni vakasamataka kina na noqu itavi meu papitaiso ena vukui Bubu Josefina.

Au qai lako rawa ki na valetabu ena Okotova ni 2002. Keirau a lako vata kei na watiqu kei Mathew, na luvei keirau tagane, ka lako tiko me laki taura na nona edaumeni ena nona vakavakarau ki na kaulotu. Au marautaka na noqu lako tiko ki na valetabu, kau nanuma niu na vakila e dua na ka ena noqu papitaiso ena vukui buqu.

A veipapitaisotaki na watqiu, ia au sega ni vakila e dua na ka. A cakava na luvequ tagane na veivakadeitaki, ia e sega ga. A yali yani na vakanuinui ni sega ni vakilai e dua na ka, ia au sa marau ga ni sa caka na nona cakacakatabu vakalotu na buqu

Ni sa oti na edaumeni, keitou a lako ki na rumu ni veivauci me vauci na Buqu vei rau na nona itubutubu. Ni keitou tekiduru ena icabocabo ni soro me caka na cakacakatabu vakalotu ka sa tekivu vosa na dauveivauci, au vakila ni vaka meu vesuki me tekivu mai uluqu ka curuma na yagoqu. E dredre me vakamacalataki, ia ena gauna o ya, au vakadeitaka na marau nei Bubu Josefina ni sa vauci vei rau na nona itubutubu.