Keirau mai Raica na Valetabu

Rees Bandley, Utah, USA

Ena dua na siga ni vulaimago ena noqu gauna ni veiqaravi ena Valetabu e Salt Lake, a yaco yani e dua na cauravou ka matata ena nona isulu ni sega ni mai curu ena valetabu.

“Keirau lako mai me keirau mai raica na valetabu,” e kaya na cauravou.

“E tiko na nomu ivolatara?” Au taroga.

A vakasama vakalailai na cauravou. Qai kaya, “Io. E tiko e dua na itokani Momani nei tinaqu mai Minnesota. E vakatura me keirau mai raica na valetabu.”

Au a vakauqeti meu dreti rau vakatikitiki na itabagone oqo ka vosa vei rau. Na yacai cauravou o Lars. Au vakamacalataka vua ni sega walega ni rawa ni lako mai ki na valetabu ia e vinakata sara ga ko Tamada Vakalomalagi me lako mai. Au tukuna vei Lars ni taumada, e dodonu me vakarautaki koya, kau vakamacalataka na kena icakacaka.

Ena gauna ko ya, au se qai lesu tale mai kina ki na Lotu ena dua na gauna lekaleka. Au a kaulotu ia au qai biuta na Lotu niu sa vesuki ena bisinisi ni veivakamarautaki ka dau vakayagataka na iduvani kei na alakaolo. Au nanuma ni ratou na taleitaka na noqu matavuvale na noqu cakacaka kei na noqu ilavo, ia a sega sara ga ni bau kauwaitaka e dua na ka oqori na tinaqu. Ia, sa dau biuta voli ga na yacaqu ena ivola ni yaca masulaki ni valetabu, e dua na ka au dau cudruvaka.

Na marama au a vakamautaka sa biuta talega na Lotu. Ena gauna e qai tekivu vakatataro kina ko Tori, na luvei keirau yalewa yabaki walu, me baleti Jisu Karisito, keirau sa tu sara ga ena ivakatagedegede duadua e ra ena neirau bula vakayalo. E dina niu a kaulotu, au sa sega ni qai nanuma tale e dua na ka me baleta na iVakabula.

“Era tu eso na tamata era sa vakarautaki tu me ra vakavulici iko me baleti Jisu,” au kaya vei Tori. “Mo veitalanoa mada vata kei ira?”

Ena vica ga na siga ka tarava erau sa tukituki ena neitou katuba e rua na goneyalewa daukaulotu. A sureti rau mai loma ko Tori ka tekivu rogoca sara na lesoni. Niu vakarorogo toka mai na dua tale na rumu, au rogoca ni rau vakavulica tiko vei Tori na goneyalewa na ivunau au kila ni dina.

“O vinakata beka mo papitaiso?” a tarogi Tori e dua vei rau na goneyalewa ni oti na lesoni.

“Io,” e sauma ko koya.

“E rawa ni papitaisotaki iko o tamamu?”

Au sa sega tu ni lako ki lotu ena 20 na yabaki, ia au kila ni sa voleka ni veisau na noqu bula. Au a laki dabe tiko ena iotioti ni vica na lesoni, keitou sa tekivu lako ki lotu, ka keirau laki raica na bisopi kei na watiqu. Niu sa veivutuni, au sa lewa meu na cakava na veika kece sara au rawata meu sosomitaka na veiyabaki au sa vakamaumautaka tu. Sa veisau na noqu cakacaka, au qarava vakavinaka na noqu itavi ena Lotu, au vauci vei rau na watiqu kei na luvei keirau yalewa, ka yaco meu liganicakacaka ni valetabu. Oqori na sala au kila kina ni rawa me ra na kilikili kaya na valetabu e dua na ilawalawa itabagone lomatarotaro.

Ena vulaitubutubu ka tarava, a vola mai e dua na ivola o Lars, ka vakavinavinakataka mai na noqu vakamacalataka na ibalebale dina ni ivolatara ni valetabu. “Au sa vulica dina e levu na ka me baleta na ivolatara ni valetabu,” a vola ko koya. “Ia, au a qai papitaiso ka ciqoma e dua na noqu ivolatara ena Janueri sa oti!” A tonawanawa na wai ni mataqu ena noqu raica na kena itaba e vakauta toka mai ena nona isulu ni papitaiso kei na nodrau na daukaulotu erau a vakavulici koya.

A vakasakiti na noqu ilakolako lesu ki na valetabu, ka sa dua na veivakalougatataki talei na noqu vulica na ilakolako nei Lars ka vakananuma kina vei au na sala eda rawa ni tara kina na bula me vinaka cake.