Laveti Ira Cake na Tani Vata kei Au

O Cathy Whitaker Marshall, e Washington, USA

Ena Siga ni Vakavinavinaka ena 1990 Au se qai lakova oti ga mai e dua na gauna dredre ni veisere, kau se tiko ena imatai ni yabaki ni vuli loya ena dua na koro levu au vulagi kina. Eratou a lako na luvequ ki na vale nei tamadratou ena vakacagicagi ko ya, ka se qai matai ni gauna ena noqu bula, meu na tiko duadua kina ena siga ni Vakavinavinaka.

Taumada au vinakata meu vakalomalomani au ka tavulaka na tagi. Ia au sa mani tekivu wilika na noqu kalougata. E rua na luvequ totoka, dua na vale totoka, sa toka e dua na madigi ni vuli ka, kei na kosipeli i Jisu Karisito me dusimaki kina na noqu bula. Sa levu dina na ka au vakalougatataki kina.

Ni roro mai na siga ni Vakavinavinaka, au qai kila ni ra nakita tiko e dua na ilawalawa gone vuli loya me ra lako ki na dua na tabana ni kaulotu ena vanua ko ya me ra laki veivuke ena kena vakarautaki e dua na ivakayakavi ni Vakavinavinaka vei ira e sega tu na nodra vale. Au nanuma ni vinaka cake na laki veivuke ena tabana ni kaulotu mai na dabe voli ga e vale ena galili kei na cudru, au sa mani laki duavata kina kei ira na noqu itokani gonevuli.

Ena vica na siga ka tarava au sa taqei pateta natu tiko ki na nodra peleti na tamata dau veitosoyaki, waloloi ka yalovakavinavinaka tu. Na wainimata sa to mai e mataqu e sega ni wainimata ni rarawa au vakila me baleti au; ia, era wainimata ni loloma me baleti ira kece ma luve ni Kalou, veitalia na ituvaki ni bula era tu kina.

Ena sega ni siga ni Vakavinavinaka na siga ni Vakavinavinaka kevaka e sega ni dua na taki ena ovani. Ia sa rui sivia vei au e dua na taki 14 na paodi bibi (6 na kilo), au mani sureti iratou kina e vica na gonevuli mai na veivanua tale eso kei na veiyasana vakayawa me ratou mai duavata kei au. Au vinakata meu wasea e dua na ivakayakavi ni Vakavinavinaka vaka-Amerika, ia au a sureti iratou me ratou cau mai. Au a kerei ira yadua me ra kauta mai e dua na peleti kakana era dau taleitaka mai nodra vale. Sa yaco me dua na gauna ni kana taleitaki ka guiguilecavi dredre na ivakayakavi ena siga ni Vakavinavinaka—na madrai vakayaloka kei na so tale.

A vunauataka kina ko Penijamini na Tui, “Ia au sa tukuna vei kemuni na veika oqo mo ni yalomatua kina; mo ni kila ko ni sa qaravi koya tiko na nomuni Kalou, ena nomuni qaravi ira tiko na wekamuni” (Mosaia 2:17).

Au vulica ena Siga ni Vakavinavinaka ko ya na yalomatua. Ena noqu veiqaravi ena gauna a rawarawa cake kina meu dabe voli ga ka vakasavuliga. Na veiqaravi na ki ki na bulamarau sega walega ena gauna ni vakacagicagi, na gauna ni noda na marautaka na veika e vaka me yali tu mai ena noda bula, ia ena veigauna kece sara. Ke na vakacava sara na noda ituvaki, eda na kunea ga e dua me vukei keda. Ni da vukei ira tiko na wekada eda sa vukei keda tale tikoga.

Au vakadeitaka ni laki veivuke ena kaulotu ena vinaka cake sara mai na tiko galili ka yalo ca voli ga e vale. Oti ga e vica na siga au sa taqeya tiko na pateta natu ki na nodra peleti o ira era via kana tu.