Sa Yaga na Wawa
Ena gauna au sa curuma yani kina na Valetabu e Buenos Aires Argentina vata kei ira na itabagone ni noqu tabanalevu me keimami laki papitaisotaki ena vukudra na mate, keimami a laki wawa toka vakalailai ena rumu ni veikidavaki. Era sa qai kaya mai na vakailesilesi ni valetabu me keimami gole ki na dua na olo me keimami laki dabe toka e kea ka wawa tale.
Baleta ga ni siga Vakarauwai, era lewe levu era a gole mai ki na valetabu mai na vanua taucoko o Argentina. Keimami a wawa toka e kea ena vakanomodi, me rua veimama na auwa. Sa vaka me yaco mai vei au eso na vakasama vakatani: “E rawa vakacava me keimami mai wawa tu oqo vakabalavu? Au sa wale, ka vinaka cake beka meu a se kua ni gole mai, oqo sa vakaoti gauna sara ga.”
Au a tucake ka tekivu gole yani ena olo. A lako mai e dua na vakailesilesi ka kaya: “Ra cauravou kei na goneyalewa, dou vosota toka mada. Au kila ni sa mai balavu sara na nomuni wawa, ia ko ni kila na cava? Ena vuravura ni yalo e milioni na tamata era sa waraka tu mai na gauna oqo ena vica na senijiuri, kau sa vakadeitaka oqo vei kemuni ni ra sa maqusa sara tikoga me yaco mai na nodra gauna. Era sa veipapitaisotaki ka veivakadeitaki tiko na veitacini matabete, ka sai koya ga oqo na ka e rawa ni ra cakava.”
Ni oti nona vosa o ya, au sa madua sara ga. Au kila sara niu sa nanumi au ga baleta niu sega ni vinakata meu solia e vica na auwa vei ira na tamata o ya ni sa balavu sara na nodra wawa tu mai era sega ni bau rogoca na itukutuku ni Lotu dina ka papitaisotaki e vuravura me vakataki au.
Sa lako tale mai na ivakalesilesi o ya, ka tekivu kacivi ira na lewe ni noqu tabanalevu. E dua na marama a yaduataki keimami sara ena isulu vulavula e rauti keimami. Ni keimami sa vakaisulu, a vesuka sara vakavinaka na ului keimami ena reveni vulavula.
Sa luva na neimami vava, ka keimami sa gole yani ki na loqi ni papitaiso. E dakoba ka cere vinaka na kapete ka vaka me keimami sa sega ni butu tu ena yavai keimami.
Ni sa yaco mai na noqu gauna, au a taqaya me vaka ga ni sa siga ni noqu papitaiso. Ia era veikauwaitaki na vakailesilesi ka ra karoni keimami sara vakavinaka ka keimami yalo vakacegu dina.
Niu sa cabe mai na tobu, sa wawa tu e cake e dua na marama vata kei na dua na tauwelu levu vulavula ka matadredredre mai. Au sa laki veisau sara ka gole tale ki na dua na rumu meu laki vakadeitaki kina. A lako vata kei au na marama a solia vei au na tauwelu ka vakavinavinakataka na lomaqu meu mai vakayacora oqo na cakacaka ni Turaga.
Niu sa biuta mai na valetabu, au sa qai kila ni o ya sa dua na gauna lagilagi duadua ni noqu bula. Na valetabu sa dua na itikotiko vakalou ka sa tiko kina na Yalo ni Turaga, ka dusimaka tiko na Nona cakacaka cecere. Ena yaga sara na kena waraki.
Droini mai vei John Zamudio