Na Mana ni Totila (Roti)
“Meda mai laki cabe cake ki na ulunivanua ni Turaga, ki na vale ni … Kalou” (2 Nifai 12:3).
Rua na cauravou vakasote vulavula ka vakatai erau a lako mai ki na neitou vale e Honduras. Rau kaya, “Keirau lako tiko mai Na Lotu i Jisu Karisito ni Yalododonu Edaidai.
Kidavaki rau o Nau me rau curu mai. Rau vakavulica na daukaulotu ki na neitou matavuvale na kosipeli i Jisu Karisito. Dina niu se qai yabaki ciwa, ia au vakila e yaloqu na dina ni veika erau tukuna tiko.
“Na cava meda cakava meda lewena kina na Lotu i Karisito?” Taroga o Tamaqu.
Tukuna e dua vei rau, “Mo papitaiso.”
Oti vinaka e dua na vula au sa papitaiso vata kei rau na noqu itubutubu. O taciqu ka se qai yabaki ono, ena qai papitaiso ena loma ni rua na yabaki mai oqo.
Ni sa levu cake na ka erau vakavulica vei keitou na daukaulotu, erau sa qai vakamacalataka ni matavuvale e rawa ni na vauci vata ena valetabu.
Na valetabu voleka duadua e tiko e Guatamala, vica vata na kilomita na kena yawa. Me keitou na sauma na ivodovodo ena basi me rua na siga ka rua na bogi na moce ena bure ni vulagi ena siti. Sega tu na ilavo me neitou ivodovodo, ia o Nau kei Ta erau sega ni yalolailai ena kena sasagataki me keitou lako ki na valetabu.
Sa dau tei sila ena veiyabaki na neitou matavuvale. Keitou dau bulia mai kina na totila ka volitaka vei ira na vulagi era dau lako sivita na neitou koro.
Taura cake o Nau e dua na pepa kei na penikau. Soqona e vica na naba ka kaya, “Me datou na volitaka e 2,500 na totila me saumi kina na nodatou ilakolako.”
Au wadra balavu sara ga. O ya sa dua na iwiliwili ni totila levu! Au qai kaya, “e se bera vakadua ni se bau vaka o ya na wiliwili ni totila me datou volitaka.”
Sega ni bau laurai vei Nau me lomaleqa kina. “Ena vakarautaka na Turaga,” kaya mai o koya. “Raoul, o iko kei Tomasi mo drau vukei tamamudrau ena tamusuki ni sila,” kaya mai o Nau.
Keirau sa qai vukei Papa ena tamusuki ni sila. Ena veisiga me dau bakia o Nau, cakava na madrai droka ka tavuteketaka. Keirau sa qai kauta kei Tomasi na totila ki na koro.
“Dua na basi ni saravanua e lako mai nikua,”au kaya vei Nau ni keirau lesu mai ena imatai ni siga. “Keirau volitaka e levu sara na totila.”
“Dua na ka mana,” kaya mai o Nau.
Ena veisiga keirau volitaka rawa e levu sara na totila. Ena vica ga na vula keitou sa maroroya rawa na ilavo me na kauti keitou rawa ena ilakolako ki Guatamala. Ia, au se lomaleqa voli ga. Au sa dau rogoci ira tiko na daubutako ka ra dau tarova na basi ka dau cici curuma tiko yani na veikau. Era dau butakoca na nodra iyau na pasidia.
“Ena vakacava o ira na daubutako?” Au taroga.
“Na Turaga ena taqomaki kedatou,” kaya cake mai o Nau. Qai taroga mai, “Raoul, o vakabauta li na kosipeli?”
“Io.”
“Sa dodonu gona kina mo kila ni dodonu me da cakava ena kaukauwa e tiko vei keda, meda vakamuria kina na Turaga kei ira na Nona parofita.”
Ni oti e dua na yabaki mai na gauna keitou papitaiso kina, sa tu vakarau na noqu matavuvale me lako ki na valetabu. Keitou vodo basi ki na koro levu o Guatamala. Au na sega ni guilecava na noqu vakila na kaukauwa ni Yalotabu ena gauna keitou sa vauci vata kina ena bula oqo kei na bula tawamudu.
Ena bogi ko ya, niu tekiduru meu masu, au vakavinavinakataka na Tamada Vakalomalagi ena veivakalougatataki ni valetabu.
Droini mai vei Jim Madsen