Samaki ni Lomanibai ni Valetabu

Mai vei Joshua J. Perkey

Mekesini ni Lotu

E Kentucky, ena ceva kei Amerika, e dau katakata ka bunobunoa ena gauna ni ikatakata Dua na siga era sa raica ni sa tubu tiko na karou drokadroka ena bai ni Valetabu e Louisville Kentucky Sega ni vica ga,—sa bau sivia sara toka!

Era sa qai duavata na Lalai ena Crestwood Second Ward ena Louisville Kentucky Stake me ra sa cakava mada kina e dua na ka. Dua na siga katakata ni vula o June era sa qai cakava e dua na nodra itaviqaravi. “Keimami kau tikitiki ni isulu kei na vokete wai kei na sovu me keimami laki vukea na kena vakasavasavataki na vale ni Tamada Vakalomalagi,” kaya o Sera M., yabaki 10. E suasua sara ga o koya, ia “e taleitaki ni ra tiko kece na noqu icaba.”

Josh H., yabaki 9, e kaya ni vaka e wale sara ga ni savata tiko na tiki ni bai ka tiko sara e cake. Ia e levu sara era a vukei koya kina. Na le 75 na gone ena Lalai e voleka ni ra lako kece sara ga. Lewe levu era kauti ira mai na tuakadra, na ganedra, na tamadra kei na tinadra me ra mai veivuke.

Era kila tu na gone ni ra tiko ena lomanibai ni valetabu, ka ra tovolea me ra rokova tiko. Sega ni bau dua e vakavunene ena vuku ni cakacaka kaukauwa. “Keimami sa barasi sara ga vakaukauwa baleta ni duka e sa kabi dede tu kina,” tukuna o Megan H., yabaki 6. Ia e sa bau veiganiti sara ga. “Au kila ni keimami sa qarava tiko na vale ni Tamada Vakalomalagi.”

E vakila talega o Sera na ka o ya. “Au vakila sara ga na Yalotabu, baleta niu kila ni Tamada Vakalomalagi e marautaka ni keimami cakava tiko na ka o ya,” e kaya cake mai.

Ni sa oti na cakacaka, era sa qai lako ki na vale ni Lotu e tarava toka ka laki kana ka veitalanoataka na veika era sa vulica mai na itaviqaravi o ya.

Era sa vakanamata ga na gone ki na gauna me ra na laki curu kina ki valetabu me ra laki papitaiso ena vukudra na mate. Ia ena gauna oqo, era sa marau tu ga ni ra kila ni ra sa vukea me savasava na tautuba ni valetabu—me vaka ga na irairai ni vale ni Tamada Vakalomalagi.