Ko e Meʻa Naʻe Akonakiʻaki ʻe Siosefá

Ko e Fakahaá mo e Palōfita Moʻuí

Mei he Ngaahi Akonaki ʻa e Kau Palesiteni ʻo e Siasí: Siosefa Sāmita (Lēsoni ʻa e Lakanga Taulaʻeiki Faka-Melekisētekí mo e Fineʻofá, 2007), 223, 226, 232.

Naʻe ʻiloʻi ʻe Siosefa Sāmita ʻa hono mahuʻinga ʻo e fakahaá ʻi he Siasí.

Ko Siosefa Sāmita e palōfita ʻa e ʻOtuá naʻe fili ke ne fakahā ʻa ʻEne folofolá ki he māmaní, ʻo kamata pē ʻ i he ʻUluaki Mata-Meʻa-Hā-Maí. ʻI hono fakahoko ʻe Siosefa ʻa e fatongia ko ʻení, naʻá ne maʻu ha mahino lelei ki he fokotuʻutuʻu ʻo e fakahaá ʻi he Siasí. Ko ha niʻihi ʻeni ʻo e ngaahi akonaki ʻa Siosefa Sāmita fekauʻaki mo e fakahaá pea mo e fatongia ʻo e palōfita moʻuí.

ʻOKU FIE MAʻU ʻA E FAKAHAÁ

“ʻOku laka ange ʻa e tokāteline ʻo e fakahaá ʻi he tokāteline ʻo e ʻikai ha fakahaá; he ʻoku laka hake hono mahuʻinga ʻo ha foʻi moʻoni ʻe taha ʻoku fakahā mai mei he langí, ʻi hono kotoa ʻo e ngaahi fakakaukau fakamāmani ʻoku maʻú.”

“He ʻikai lava ʻo hoko ʻa e fakamoʻuí taʻe ʻi ai ha fakahā; ko e koto kulanoa ki ha taha ke ne ngāue taʻe kau ai ia… . He ʻikai ke lava ʻe ha taha ʻo hoko ko ha faifekau ʻa Sīsū Kalaisi kae ʻoua kuó ne maʻu ha fakamoʻoni kia Sīsū; pea ko e laumālie ʻeni ʻo e kikité [vakai, Fakahā 19:10].”

KO E FOKOTUʻUTUʻU ʻO E FAKAHAÁ

“Pea ʻoua naʻá ke fekauʻi ia ʻa ia ʻoku ʻulu kiate koé, pe ʻoku ʻulu ki he siasí; he kuó u foaki kiate ia ʻa e ngaahi kī ʻo e ngaahi meʻa liló pea mo e ngaahi fakahā kuo fakamaʻú, kae ʻoua ke u fili ha tokotaha kehe kiate kinautolu ke fetongi ia” (T&F 28:6–7).

“ʻOku puleʻi ʻe he Kau Palesitenisī [ʻUluakí] ʻa e Siasí; pea ko e fakahā ʻo e fakakaukau mo e finagalo ʻo e ʻOtuá ki he Siasí, ʻe fakafou mai ia ʻi he Kau Palesitenisií. Ko e founga ʻeni ʻa e langí, pea mo e mālohi pea mo e faingamālie ʻo e Lakanga Taulaʻeiki [Faka-Melekisētekí]. ʻOku toe hoko foki ia ko ha faingamālie ʻo ha ʻōfisa pē ʻi he Siasí ni ke ne maʻu ha fakahā, kae fekauʻaki pē mo hono uiuiʻí pea mo hono fatongia ʻi he Siasí.”

MUIMUI ʻI HE PALŌFITA ʻA E ʻOTUÁ

“ʻOku tokolahi foki mo ha kakai tangata mo fefine poto ʻi hotau lotolotongá ʻoku fuʻu poto ia ke akoʻi; ko ia kuo pau ai ke nau mate pē ʻi heʻenau taʻeʻiló, pea te nau toki ʻilo ʻi he toetuʻú ʻa ʻenau fehālākí.”