NGAAHI FAKAKAUKAU MAʻÁ E EFIAFI FAKAFĀMILI ʻI ʻAPÍ

ʻE lava ke fakaʻaongaʻi ʻa e ngaahi fokotuʻu fakafaiakó ni ʻi he loki akó pe ʻi ʻapi foki. ʻE lava pē ʻo liliu ke feʻunga ʻa e ngaahi fakakaukaú ni ki ho fāmilí pe kalasí.

“Ko Hono Fakamālohia ʻo e Tuí Lolotonga Hoʻo Fekumi ki he ʻIló,” p. 10: ʻAi ha kiʻi kai lelei ki he efiafi fakafāmili ʻi ʻapí lolotonga ʻoku mou ako mei he fakamatala ko ʻení. Vahe ki he mēmipa takitaha ʻo e fāmilí ha taha ʻo e ngaahi meʻa ke ngaohiʻaki e kiʻi meʻakaí. Mou aleaʻi ʻa hono mahuʻinga ʻo e meʻa takitaha ko ʻení mo e ʻikai ngata pē ʻi heʻene ʻai ke lelei ange e meʻakaí ka ʻoku toe mahuʻinga foki ia ki ai. ʻI hoʻomou ngaohi e meʻakaí, aleaʻi hono mahuʻinga ʻo e ngaahi tefitoʻi moʻoni takitaha ko ia ʻe nima ʻi he fakamatala ko ʻení mo e founga ʻe lava ke ne fakatupulaki ai ʻa ʻetau moʻuí.

Ko e Mālohi ʻo e Ako Faivelengá,” p. 16: Lau ʻa e ngaahi meʻa mahuʻiga ʻe fā naʻe ako ʻe ʻEletā Sei E. Senisoni meia Palesiteni Poiti K. Pēká. Aleaʻi e ngaahi founga ʻe lava ke tokoniʻi ai kimoutolu ʻe he foʻi fakakaukau takitaha ke mou hoko ko ha tokotaha ako lelei angé. Fakaafeʻi e kau mēmipa ʻo e fāmilí ke nau fokotuʻu ha taumuʻa ke fakaʻaongaʻi ai e ngaahi fakakaukaú ni ke nau hoko ko ha niʻihi ako lelei ange.

“Mei he Toʻu Tangata ki he Toʻu Tangata,” p. 44: Hiki e ngaahi potufolofolá ni ʻi ha fanga kiʻi laʻipepa pea faʻo ʻi ha kiʻi poulu: 1 Nīfai 8:12–18; 1 Nīfai 10:17; 1 Nīfai 15:6–11; Mōsaia 17:1–4; Mōsaia 18:1–3. Paasi e poulú ki ha mēmipa ʻo e fāmilí, pea tuku ke ne toʻo ha laʻipepa mei ai ʻo ne lau leʻolahi e potufolofolá. Hokohoko pehē ai pē kae ʻoua kuo lau kotoa e ngaahi potufolofolá. Fehuʻi ange pe ko e hā ha meʻa ʻoku faitatau ai e ngaahi potufolofola ko ʻení. Aleaʻi hono mahuʻinga ke akoʻi pe ʻoatu e ongoongoleleí mei he toʻu tangata ʻe taha ki he toʻu tangata ʻe taha.

“Ko Hoku Tokouá mo e Kiʻi Kulií,” p. K12: ʻOange ki he mēmipa takitaha ʻo e fāmilí ha fakatātā ʻo ha kiʻi kulī. Lau e talanoa ki he kulií pea tuku ke fakafanongo homou fāmilí pe ko hai naʻe ongo ki ai e kulií mo hono ʻuhingá. Aleaʻi e ngaahi founga te mou mateakiʻi maʻu ai pē homou fāmilí. ʻI he taimi ʻe fai ai ʻe ha mēmipa ʻo e fāmilí ha ʻulungāanga ʻofa ʻi he uike hoko maí, fokotuʻu ʻene fakatātā ʻo e kiʻi kulií ʻi he feituʻu naʻe fakahoko ai e ngāue lelei ko ʻení. Taki e tokangá ki he ngaahi ngāue lelei ko ʻeni naʻe faí ʻi ha efiafi fakafāmili ʻi ʻapi he kahaʻú.