I NAMAKINA KAIRAKIU
Ngke I beku bwa te mitinare ae kairake i Norway, e weteia mitinare ni kabane te mition beretitenti bwa e na tuangira ae ti a tia ni butiaki bwa ti na anene ibukin uoua te tetere n te katabu ibukin te London England Tembora n te 1958. I butiaki bwa N na riki bwa te tia katang biano.
Ngke ti a roko n te Tembora, I mimi ni kunea bwa N na katanga te aokan n onea mwiin te biano. Bon akea au ataibwai ma te aokan, ai ngaia are I a tuatua ngkana e kona temanna ni buokai ni kaeti bwaibun te aokan ibukin te anene n taromauri. E bon ongo au bubuti n tabeaianga Tamau are i Karawa, ao e roko te aine temanna ni katoka au kangaanga, ni katauraoa te aokan ibukin te katangitang ni kamotirawa ao ibukin naba katangitangin te kuaea.
Ibuakon au tabeaianga, I a karekea te namakinan rau ae roko irou. Ao ngke I a katanga te aokan ae I aki kataneiai iai ma n aki ataa arona, I namakina ana tangira te Tia Kamaiu bwa e kairai. Imwiin teuana kunan te kuaea, Beretitenti David O. Mckay e tara ara mition beretitenti ao e taku, “E rangi n tamaroa.” E rotai namakinan ae ti a tia ni kakabwaiaki n ara kamataku. E a tia n rangi n nakoraoi.
Iesu Kristo bon Natin te Atua, bon Ana Riki Temanna te Tama. Bon te Meetia ae tabu, te Uea n Raoi. E maiu ao E na manga roko.