Katobibiaki ni Baina Aika Tatangira
Ngke ai tibwa teuana ana ririki, natira te mwaane ae ara kateniman ae Nolan e taonaki n te aoraki ae te toki ni buro are e irekereke ma kangaanga man te manaoraki ae kaakaiaki. Ngkai ai 14 ana ririki, e korakai ma te mitiin are e bita kawain te rara man te tabo teuana inanon te rabwata nakon are teuana, n reiakin iai taian kataaki, ao e mate iteran rabwatana are teuana.
N aki ongea kataakina aika kangaanga, e a tia Nolan ni karaoa are e riaon ae ti kantaningaia. Ni katoa ana kekeiaki are e karekea iai rikirakena e uota te kakukurei nakoira. E a tia ni karikirakea te tataonaki n nano ma te nanomatoa ae tamaroa ibukin te banna ni katooto.
Ti a tia ngai, ma kainnabau, ae Ryan, ma natira mwaane ake tabeman ake niiman, ni karikirakei maiun tamneira man rinanoan maiura ma Nolan. N taai ake ti bwarannano iai ao n raraoma ibukin arona ni boong aika a na roko, ti waekoa ni kinai kawai ni kabane ake ti a tia iai ni kakabwaiaki, ni kina ana tangira ao ana mwannano Tamara are i Karawa ao Natina are a karekea ibukira n tatabemaniira nako, ao ti uringa te tataro are e kaekaki ngke onoua ana ririki Nolan.
N te tairiki teuana ngke ti aki raoi koaua bwa ti na kanga n tabeakina kataakin Nolan, I katorobubua ngai ma kainnabau n tataro ibukin mweraoina. Ngke ti onon nakon te Uea, ti katerea raoi ara tabeaianga ae onoti ibukin anuan Nolan are e irekereke ma rabakauna ni kareke iango ibukin kakaawakina i bon irouna. Ti bon bubuti ma nanora ni koaua ibukin Nolan bwa e na namakina ana tangira ara Tia Kamaiu ao n ata kakaawakina ae korakora ngkai ngaia natin te Atua.
N te ingabong are imwiina e roko n te umwanikuuka Nolan, ike I kukana iai te kaingabong. Imwaain te kaingabonga e tataneiai n tatakakaro ma tarina ke ni wene n aroria i aon te kaintekateka ae tiburing. Ma e taraa ni iai ana iango ngke e tamwarakea te kaintekateka ae rietaata n te tabo ni kaingabong, ao e tararake n taraai, ao e taku, “Iai miiu ngke e tairiki.”
I namakina ae e taua ma nanona, ao I waekoa ni kan ongora.
“Ko koaua?” I titiraki. “Tera ae riki inanon miim?”
“E mena Iesu ikekei,” e kaeka Nolan, “ao E tauai.”
Iai au koaua bwa Tamara are i Karawa ae tatangira e ongo ao e kaekai ara tataro ao bwa ara Tia Kamaiu bon ara tia ua rongorongo i marenara ma te Tama. A kinaira n tatabemaniira. A ataa kainnanora ao ara konabwai. A ataia bwa a na kanga ni buokira.
E tuangira Moronai, “Ao ngkana arona bwa kam bubuti ma te nano ae koaua, ma nanomi raoi, ao te onimaki iroun Kristo, e na bon kaota te koaua … nakoimi. Ao ma ni mwaakan te Tamnei ae Raoiroi ao kam na kona n atai koauan bwaai ni kabane” (Moronai 10:4–5). I reiakinna bwa te kibu aei e tau arona tiaki tii ibukin karekean te koaua n Ana Boki Moomon ma ibukin naba te titiraki are ti bon ukoukora kaekaana ma nanora ni koaua. Ngkana ti kaitarai kataaki, te uruaki n nano, ao taian kataaki, ao a rangi n tauraoi nanora ao ara iango a rangi ni koaua.
I rangi ni kakaitau ngkai I kaaina ana Ekaretia te Tia Kamaiu, ike I reiakini iai bwaai aika mwaiti n Ana euangkerio rinanon te kamatebwai, te mwakuri ni ibuobuoki, ao te Tamnei ae Raoiroi. Ai kakaitaura ngai n ataakin ara Tia Kamaiu ae e na ibuobuoki, e na karaunano, ao e na kairiira n tatabemaniira nako. I ataia bwa ti kona ni bane ni katobibiaki ni baina aika tatangira (tara D&C 6:20) ngkana ti nako Nakoina.