Te Riki bwa te Tia Kakoaua ibukin Kristo
Rinanon te mwaaka n te nakoa n te nakoanibonga, Abotoro a rineaki bwa taan kakoaua aika onoti ibukin Kristo n te aonaaba ni kabuta (tara D&C 107:23). Aia kakoaua e bon kakaawaki n Ana mwakuri ni kamaiu te Uea. Ma Abotoro a riai n aki ao a bon aki tei n tii ngaia. Ngaira ni kabane ake ti bwabetitoaki ao ti kamatoaki ti a tia ni katoka iaora aran Iesu Kristo ma te berita “n riki bwa taan kakoaua ibukin te Atua n taainako ao ni bwaai nako, n taabo nako” (Motiaea 18:9). Iai te konabwai iroura n tatabemaniira n riki bwa Ana tia kakoaua. E boni koaua, te Uea E mwiokoia aika mamaara ao aika mangori bwa a na tataekina Ana euangkerio (tara D&C 1:19, 23), ao E bon tangiria bwa aomata ni kabane a na kona n taetae n aran te Uea ae te Atua, are bon te Tia Kamaiua te aonaaba (tara D&C 1:20).
Iangoi aanga tabeua are a kona n riki iai kaain Ana Ekaretia Iesu Kristo ibukia Aomata Aika Itiaki ni Boong Aika Kaitira bwa taan kakoaua ibukin Kristo.
Boni ngaira taan kakoaua ibukin Kristo ngkana ti karekea oin ara kakoaua ae koaua bwa E maiu.
Te riki bwa te tia kakoaua ibukin Iesu Kristo are oin nanona raoi bon karekean oin am kakoaua ae koaua raoi bwa boni Ngaia Natin te Atua, te Tia Kamaiu ao te Tia Kabooa te Aonaaba. Abotoro n taai ake ngkoa ataia bwa Iesu bon te Metia are E berita ibukina ao E taekina Mangautina man te mate n aron are E a bon tia n rinanona. E ngae n anne, te tia kakoaua ibukin Iesu Kristo e aki kainnanoia bwa e na tia n nooria ke ni maeka ma Ngaia. Ngke e kaota ana kakoaua Betero nakon Iesu, “Bon te Kristo Ngkoe, are Natin te Atua are maiu,” e kaeka te Uea ni kangai bwa e aki reke te atatai aei ibukina bwaa e kaan ke ibukin bwaai are e tia n rinanona ma Iesu ma ibukina bwa E kaotia nakoim Tamau are i Karawa (tara Mataio 16:15–17). E kamataata Iesu nakon Toma bwa e kona te aomata ae aki riingnga ao e aki nooria ni karekea te onimaki ke te kakoaua are e reke iroun Toma: “E taku Iesu nakoina, ko onimaki ngkai ko noorai: a kabwaia akana onimaki ngkana a tuai n noorai” (Ioane 20:29).
Ara kakoaua ibukin Kristo e moanaki n taainako ma aia kakoaua tabeman—aomata aika ti kinaia ke ti atai taekaia ao ti onimakinia. Iai iroura aia kakoaua Abotoro are koreaki mwiina ae “E kauta Iesu aei te Atua, are taani kakoaua utina ngaira ni kabaneira” (Mwakuri 2:32). Iai iroura te O ao te Nu Tetemanti ibukin kaman katabuana, Ana mwakuri, ao Ana Mwakuri ni Kamaiu. Iai riki teuana te kakoaua, Ana Booki Moomon, are oin te kaantaninga iai bon “anaakin nanoia Iutaia ao Tientaire bwa Iesu bon te Kristo, ae te Atua ae Akea Tokina, are e boni kaotia ngaia nakoia aaba ni kabane.”1 Iai ana kakoaua te Burabeti Iotebwa Timiti bwa e nooria ao e ongo iroun te Tama ngke e kotea Iesu ao e taekinna bwa bon aio Natina ae Tangiraki (Joseph Smith—History 1:17), ao imwiina e kamatoa te Burabeti n ana kakoaua bwa a mwaiti kakoaua are a tia n kaotaki Ibukina, a kakoaua, imwiina, bwa E maiu. A nooria i angatain te Atua ao a ongo bwanaana are E kakoaua bwa Ngaia Ana Riki Temanna te Tama; (tara D&C 76:22–23). Iai iroura taan kakoaua aika onoti n ara bong aika maeka ibuakora ao mai irouia, ti karekea kamatoaan te kakoaua n oin matara ao taningara. A mwaiti aika kakabwaiaaki n ongo aia kakoaua kaaro, tiibu, ao raao aika kakaonimaki.
Nake a karaoa aia berita aika tabu n te bwabetito a karekea te bwai n tituaraoi ae onoti n te onimaki iroun Iesu Kristo, ni ikotaki ma te bwai n tituaraoi ae te Tamnei ae Raoiroi e reke te kakoaua bwa koaua are ti a tia ni karekei ibukin Kristo a boni koaua. E kamatoa aei Nibwaai bwa e na bong riki: “Ao ngkanne kam na nakonako iaon te kawai ae eti man irariki are e na kairi ngkami nakon te maiu ae akea tokina; eng, kam a tia n rin rinanon te mataroa; kam a tia ni maiu n aron ana tua te Tama ma te Nati; ao kam a tia ni karekea te Tamnei ae Raoiroi, are e kaota te Tama ao te Nati, are e kakoroa iai bukin te berita are e a tia n taekinna, ae ngkana ko rin n te mataroa aio ao e na reke iroum” (2 Nibwaai 31:18; e katuruturuaki riki).
Bon te bwai n tituaraoi mai iroun te tamnei kakoauaan aia taeka tabeman ao te bwai n tituaraoi riki mai iroun te Tamnei ae Raoiroi ataakin ae Iesu Kristo bon Natin te Atua ao e bon tauraki n te kaibangaki ibukin buren te aonaaba (tara D&C 46:13).
Te kakoaua aio e roko n te namakin n angiin te tai—te kukurei, te rau, namakinan ae ko kakoauaa, namakinan ae e mataata raoi. Te Uea e angan Oliver Cowdery te kakoaua ibukin Ana Boki Moomon man te namakin mai iroun te tamnei are e kamatoa bwa taeka ke te mwakuri are e tabe ni koroi a bon koaua (tara D&C 6:17). Te Uea e tuanga Oliver bwa ngkana e tangira riki te kakoaua, e riai ni katuka ana iango iaon te tairiki are e tang ma nanona ni koaua nakon te Uea, bwa e na kona n ataa koauan bwaai aikai. E aki tia te Uea n taekina te rau nakon ana iango ibukin te bwai aei? Tera riki te kakoaua ae korakora ae kona ni karekea nakon are mai iroun te Atua? (tara D&C 6:22–23). Te Tamnei ae taetae nakon ana iango temanna tiaki ti ngaia aron reken te kakoaua, ma ngkana e roko mai iroun te Atua, bon akea ae korakora riki. N ai aron kamatebwaian Ana taeka Kristo ni booki aika tabu ti na kona ni kakoaua bwa ti a tia n ongo bwanaana, ao n atai Ana taeka (tara D&C 18:36), ti na kona ni kakoaua man namakinan kamatoana i nanora mai iroun te Atua bwa ti ata Natina ao bwa E maiu.
Boni ngaira taan kakoaua ibukin Kristo ngkana ti maiuakina Ana reirei.
N ana tai ni mwakuri n te Western Hemisphere, e anga te tua aio te Tia Kamaiu: “Taui i eta ami taura bwa e na oota nakon te aonaaba. Nooria Ngai te oota are kam na taua ieta—are te bwai are kam a tia n noorai bwa I karaoia” (3 Nibwaai 18:24). A riai aomata n noora aron Iesu Kristo iroura. Arora ni mwakuri, n taetae, n taratara, ao ni iango naba a na kona ni kaota Arona ao Ana kawai. E kabwarabwara Aramwa bwa te tia n rinanon te bitaki ae korakora i nanora ao karekean taraana i moamoara (tara Aramwa 5:14). N aron naba aio, te Uea e tuatua bwa ti na riki n ai Arona (tara 3 Nibwaai 27:27). E ngae ngke ti aki mena irarikina n Ana tai ni mwakuri, ngkana ti kakae ni koroboki aika tabu, ti noora Iesu ao te bwai are E taekinna ao E karaoia. Ao ngkana ti katootonga te banna anne, ti bon kaota ara kakoaua ibukina.
I uringa ana katooto te berebitero ae kaain te Katorika are I kina ngke ti uaia ni mwakuri ni ibuobuoki ibukin te botanaomata i Nashville, Tennessee. Te Tama Charles Strobel e karaoa te mwakuri ae baireaki ibukin kanakoaia tabeman imwiin tabeman irouia naake akea mweengaia man maekanan te kawai nakon te burokuraem ni kataneiai are e na karekea te rabakau ibukin te maiu ao karekean te mwakuri ibukia. E kabanei aoa aika mwaiti ni buokia mwaane aikai ni karekea te bitaki ae teimatoa ae tamaroa ao te toronibwai. I miimi ngke I kunea bwa tinana e tiringaki iroun te aomata ae akea mweengana n ririki aika bwakanako. Ana tangira te Tama Strobel ae ai aron ana tangira Kristo e rotiia naba mwaane are e kuneaki ibuakoia teuare e anaa maiun tinana ae kakaawaki n te aro ni iowawa.
Boton aia rongorongo abotoro ao burabeti n rooro nako bon kainnanoan te rairannano ibukin karekean kabwaraan buure rinanon Ana Mwakuri ni Kamaiu Iesu Kristo. Oin ara rairannano e kaota te kakoaua Ibukina ao mwaakan Ana akoi ni kabwarai ara bure ao ni kaitiakiira. Ti kona n aki karekea ara kakoaua ae kororaoi bwa e na manena ma ti riai ni kekeiaki ni katiteboa maiura ma anuan te Tia Kamaiu aika raraoi. E raoiroi ana reirei Beretitenti Ezra Taft Benson (1899–1994) are te tataonannano ni ikotaki ma te botumwaaka inanon te waaki aei:
“Te riki n ai aron Kristo bon te bwai ae reitinako inanon te maiu ao angin te tai e irekereke ma te rikirake ao te bitaki ae waeremwe, ae aki kai nooraki… .
“… Ibukia taan rairaki n aron Bauro, Enoti ao te Uea ae Ramoni boni iai bubua ni nga aomata are a kunea te waaki ibukin te rairannano bwa e beebete, ae aki kai nooraki. Ma n te bong teuana nakon te bong teuana a kaan riki nakon te Uea, ao aki namakinna bwa a karikirakea te maiu n atua. A maiuakina te maiu ae rau ae tamaroa, te mwakuri ni ibuobuoki, ao te anga nano. Titebo aroia ma I-Remwanaite, are e taku te Uea bwa, ‘a bwabetitoaki n te ai ao te Tamnei ae Raoiroi, ao a bon aki ataia’ (3 Nibwaai 9:20; e kaairaki te manrara).”2
Boni ngaira taan kakoaua ibukin Kristo ngke ti buokia tabeman bwa a na Nakoina.
E taekinna Nibwaai ma te kimwareirei, “Ti kaakarabakauakina Kristo, ao ti kimwareirei iroun Kristo, ao ti tataekina Kristo, ao ti taetae ni burabeti ibukin Kristo, ao ti koroi kanoan ara taetae ni burabeti bwa antai ake a na kawaria ibukin kamaunaan aia bure” (2 Nibwaai 25:26). Ti kona naba ni kakaonimaki ni buokia tabeman, moarara riki natira, bwa a na nakon Kristo.
Ana mwakoro ni kibu n taeka Nibwaai ae “ti kaakarabakauakina Kristo” e oti iai bwa ti aki rawa n taekini ara namakin ibukin te Tia Kamaiu n ara marooro ao n ara waaki ni katoa bong. Angiin te tai bon ti imarenan temanna ma temanna are ti marooroakinna iai n anga aika eti ma ni iraorao bwa antai Ngaia ao tera ae E karaoia ao E reiakinna, ni kaungaia naba tabeman bwa a na tangiria ao ni iriiria.
“Ti kimwareirei iroun Kristo” e nanonaki iai bwa ti maiu ma te kukurei are e oti man aroarora bwa iai ara onimaki iroun Kristo. Ti ataia bwa “e tau ana akoi” ibukin kamaiuakira man te mate ao te bure ao ni kakororaoki irouna (tara Moronai 10:32–33). E ngae ngke ti aitara ma taian kananokaawaki ao kangaanga naba, ti ataia bwa Ibukina, ao a kamatoaki kukureira ae akea tokina. Ngkana a oota nako ara onimaki iroun Iesu Kristo, ti kaotia nakoia tabeman ake a “kua man rawawata” bwa a na kanga ni motiki rawaia Irouna (tara Mataio 11:28–30).
“Ti tataekina Kristo” e irekereke ma te mwakuri ni mitinare ae bwanin taina ao irouia kaain te Ekaretia ni ikotaki naba ma are ti karaoia n te bootaki n taromauri, kiraati n te Reirei n Taabati, ao waaki n aron aikai ike e kamatebwaiaki ao e reiakinaki iai taekana. Arora ni ira te waaki bwa tia reirei ao kaain te reirei bon iteran naba kaotan ara kakoaua Ibukina, ao oin ara kamatebwai are aanaki iai irakin te waaki bon te kakoaua riki ibukin kakoauaana.
“Ti taetae ni burabeti ibukin Kristo” nanona bwa kaotan ara kakoaua ibukina man mwaakan te Tamnei (tara 1 I-Korinto 12:3). “Te kakoaua ibukin Iesu bon tamnein te taetae ni burabeti” (Kaotioti 19:10). N aroia ake a taetae ni burabeti n taai ake ngkoa ibukin rokona, ti kamatoa naba taian taetae ni burabeti n te taeka ao n te mwakuri ibukin Ana Kauaoki. Man karaoan taian bwabetito ao otenanti riki tabeua aika tabu ibukia ara bakatibu n te kariaiakaki n te nakoanibonga are kaokaki iroun Eria ibukin kantaningaan “ana bong Iehova are kakannato ma ni kakamaku” (Maraki 4:5–6; tara naba D&C 2; 128:17–18), ti kakoaua bwa Kristo e na manga roko ao a na rairaki nanora nakoia tamara ni katauraoi ibukin Ana kauaoki (tara Maraki 4:6; D&C 2:2).
“Ao ti koroi kanoan ara taetae ni burabeti” e kaotaki iai te wanawana ni karaoan tauan mwiin rongorongo aika teimatoa n ara kakoaua ibukin Kristo. Ti ataia ba taian kakoaua are ti kaotia a bon tauaki mwiia i karawa bwa a na taraia anera; ao a kimwareirei iao[ra] (tara D&C 62:3). Oin ara bakatibu ao tabeman a kona n tarataraia ao ni kimwareirei n ara kakoaua ibukin Kristo aika koreaki ke a tauaki mwiia ibukin kakabwaiakia ao ibukiia naba tabeman imwain bungiakia.
Ngkana ko namakina ana kakoaua te Tamnei ae Raoiroi Ibukina, ni kamatoaki ao ni manga kamatoaki nakon tamneim ni bwaai aika kakaokoro ake ko rinanona ao n taabo aika kakaokoro, n am tai ni kekeiaki ni tabeka rake otan Ana banna ni katooto inanon oin maium n te bong teuana ma teuana, ao n am tai ni kaota am kakoaua nakoia tabeman ni buokia n reiakina taekana ao ni iriiria, ko bon kakoaua ibukin Iesu Kristo. E anganiko te Atua tangirana i nanom bwa ko na mena ibuakoia naake a karekea te kakoaua ibukin Iesu (tara D&C 76:51) ao a kakaonimaki nakon te kakoaua anne inanon maiuia n te maiu ae maamate (tara D&C 138:12).